သားရွှေဥ [Complete]

Chapter 17 Uni&Zaw

သားရွှေဥ .....17

                       အပိုင်း-၁၇

ကျောင်းမှာလပတ်စာမေးပွဲတစ်ခါဖြေပြီးပြီမို့၊ သူအပ်
ထားတဲ့ချစ်ထွေးအခြေအနေကို အတန်းပိုင်ဆရာမထံ
သွား၍မေးမြန်းရသည်။
" ဆရာမ ဒီကောင်လေးအခြေအနေဘယ်လိုရှိလဲဗျ..
စကားနားထောင်ရဲ့လား၊ အတန်းထဲမှာ ကောငြိမ်ရဲ့လားဗျာ"

" ကျောင်းစတတ်တတ်ခြင်းတုန်းကထက်အခုတော့အများကြီးအဆင်ပြေပါတယ် ဆရာရေ ...
သူငယ်ချင်းတွေလည်းရနေတော့ ကျောင်းနေရပျော်လာပြီထင်တယ်...
စာလည်းလိုက်နိုင်ပါတယ် တခြားလည်းမဆိုးပါဘူး.."

ဆရာမက ချစ်ထွေးရဲ့အဖြေလွှာရှာပြီးသူ့ကိုပြသည်။
" အောင်မှတ်ရ‌ အောင်တော့ဖြေနိုင်သားပဲ..."

"အိမ်မှာဆရာလည်း သူ့ကိုသင်ပေးတယ်မို့လား.."
" ဒီကောင်လေးကကျောင်းစာနဲ့လုံးဝအဆက်ပြတ်နေတာလေ၊ အခုတောင်တကယ်ကျောင်းတတ်ချင်တာမဟုတ်ဘူး....
ကျွန်တော်နဲ့ အမျိုးသမီးကအတင်းထားလို့သာ၊
ဆရာမဆီ မျောက်တစ်ကောင်အပ်ထားရတာလဲအားနာပါတယ်ဗျာ..."

" မဟုတ်တာပဲ.. ဒါနဲ့ဆရာနဲ့ဘာတော်ကြတာလဲဟင်
ကျောင်းအပ်ထဲကမေးမလို့ဟာ..မမေးဖြစ်ဘူး"

" ဪ ဟုတ်၊ သွေးသားမတော်စပ်ပေမယ့် ကျွန်တော့်အမျိုးသမီးကခေါ်ယူမွေးစားထားတာမို့ သူ့ရဲ့မောင်လို့ပဲပြောရမှာပေါ့..."

ဆရာမလေးကကျေးရွာကြီးဘက်ကမို့ သူတို့အကြောင်းကိုသိပ်မသိတာဖြစ်မည်။
" ဪ အဲ့လိုမျိုးလား...၊ ဒီအရွယ်ခလေးကိုအခုလို
ကျွေးမွေးကျောင်းထားပေးဖို့က လွယ်တာမဟုတ်ဘူး၊ ဆရာတို့ဇနီးမောင်နှံက စိတ်သဘောထားပြည့်ဝကြလို့သာ .. မောင်ချစ်ထွေးကကံကောင်းတာပေါ့"

" အဆိုးထဲက အကောင်းပေါ့ဗျာ..."
မိဘရှိပေမယ့် ပစ်ထား‌ခံရတဲ့ခလေးတစ်ယောက်ကို
ပြန်မွေးစားခံရတိုင်း လည်းကံကောင်းပါတယ်လို့တထစ်ချမပြောနိုင်ဘူးလေ။

>>>>>>>>
ကျောင်းမှာမို့ပုံမှန်အတိုင်းပဲနေပေမယ့် အမှန်အတိုင်းပြောရရင်တစ်ချိန်လုံးသူ့စိတ်တွေလှုပ်ရှားနေခဲ့သည်။
စာသင်တာကနေ့တိုင်းလုပ်နေကြအလုပ်မို့သာအလွဲအချော်မဖြစ်တာ..၊ တကယ်တော့လူကစိတ်တခြားကိုယ်တခြားနဲ့...