သားရွှေဥ [Complete]

Chapter 1

သားရွှေဥ .....1

( ဒီဇတ်လမ်းက မကွေးတိုင်းထဲကနယ်မြို့သေးသေးလေးကို‌အခြေပြုထားတာပါ။
ဘယ်နေရာလဲတော့မမေးကြပါနဲ့...အဲ့နေရာကလူပါရင်ရီပို့ထုနေပါ့မယ်။
ခေတ်ကာလက ၂၀၀၀-၂၀၁၀ ဝန်းကျင်ကိုနောက်ခံထားပါတယ်။ နှစ်လုံးထီအကြီးအကျယ်‌ခေတ်စားတဲ့
အချိန်ပေါ့။
ကျန်တာကတော့ ဖတ်ရှူရင်းအားပေးပါရှင်)
    
                    
                               အပိုင်း- ၁

" ဒီတစ်ပတ်အလျော်ဇယားများလှချည်လား..အေ"
" များဆို ဟိုအေးမေတ္တာကျောင်းကဘုန်းကြီးပျံလေ
၈၁နှစ်ဆိုတာကို လိုက်ထိုးလိုက်ကြလို့ နယ်လုံးကျွတ်
ပေါက်ကြတာကိုး..."

" အဲ့လောက်ဆို ဒိုင်ကိုတင်မရဘူးဆိုပြီး ကြိုပိတ်မှပေါ့အေ့.."
" ဪ ကျုပ်ကကြိုသိမလားဗျ.. ဘိုးလေးကမှ‌ရွှေအကိုလာမပြောခိုင်းတာ..
ညည်းမနေပါနဲ့ကြီးတော်ရာ၊ ကြက်ကန်းဆန်အိုးတိုးပါ ဘုန်းကြီးပျံကအမြဲရှိတာမှတ်လို့..."

" ပြောလိုက်ရင်တော့ဖြင့်၊ နင်တို့က‌မလျော်ရတိုင်း"

ချူသံပါအောင်ငြီးငြူနေသူမှာဒိုင်ချုပ်မယားဒေါ်အုန်းခင်သာဖြစ်ပြီး၊ ခန္တာကိုယ်ကဝဖိုင့်ဖိုင့်မှာရွှေဆွဲကြိုးကနှစ်ခေါက်ကိုချက်အထိရောက်တယ်၊ လက်
ကောက်ကတစ်ထောင်ဆစ်အထိ..
၂လုံး၃လုံးအကျိုးပေးလို့ဒီလောက်မတရားစားသောက်နေရတာတောင်၊တစ်ခါလောက်များအလျော်
ဇယားတတ်ရင်ကြီးတော်ကြီးကပွားလို့မပြီးပေ။

သူကတော့လက်ခွဲဒိုင်ကြီးဖြစ်ကာ၊တစ်ပတ်အတွင်းအလျော်အရောင်းကိုစာရင်းလာရှင်းနေရတာဖြစ်သည်။‌ကော်မရှင်ရတဲ့ပိုက်ဆံ‌ကိုရေတွက်ပြီးပါးစပ်ကလည်းကွမ်းတမြုံ့မြုံ့ဝါးနေလျက်ကနေ..

" ကြီးတော် ပိုက်ဆံကလိုသေးတယ်နော်.."
ကော်မရှင်ခက ၁၀ရာခိုင်နှုန်းလေ၊ မြို့ပေါ်မှာဆိုရင်တော့၁၂ရာခိုင်နှုန်းလောက်ရပေမယ့်..ဒီနယ်ကဘိုးလေးတို့လက်အောက်ကဒိုင်ခွဲမှန်သမျှကတော့
၁၀ရာခိုင်နှုန်းပဲ..
အဲ့တော့ကောဘာဖြစ်သေးလဲ၊အရင်းမလိုတဲ့အသားတင်ဝင်ငွေပဲဟာ...

" ဟုတ်လို့လား ..."
ကွမ်းတံတွေးကိုအနားကထွေးခံထဲကိုပစ်ခနဲနေအောင်လှမ်းထွေးလိုက်ပြီး...
" ရော် ဟုတ်ပါတယ်ဆို ဒီမှာကြည့်..."
" အေးပါဟဲ့..အမလေး ဟင်း..."