في يوم الجمعة.. يوم التجمع العائلي في بيت اليد.. الكل متواجد في الصالة على الساعة خمس العصر.. وقعدتهم راح تستمر للساعة 10 بليل
اليدة: حي الله الغاليين منوريني
أبو محمد: النور نورج يا أمي.. انتي الخير والبركة وسبب لمتنا فهالبيت
سعيد بصوت عالي: عمو مويز بشو مدلعتنا اليوم ؟
العمة موزة تضحك: وانته ماتفكر الا فالبلعه ؟ مسوية كيكة المنجا اللي تحبها وكوكيز بحشوات مختلفة
سعيد: الله عليج ياعموه.. دايمًا مضبطتني بالأكل
العمة موزة تغمز: ماعليه عقب الحرمة بتدلعك وتطبخلك
سعيد: انا خلوني فحالي.. زوجو محمد هوه أكبرنا
محمد رفع حاجبه: ردينا ع طاري العرس.. وبعدين تعال ترى الفرق بيني وبينك سنة بس
سعيد: ولو المفروض الأكبر هو اللي يعرس.. يعني انته ومايد وعقبكم أنا
مايد: بو عسكور خلصت من محمد واستلمتني ؟
سعيد يضحك: جوكم ميت.. نبا اعراس نبا نربش نبا نستانس
العمة شيخة تبتسم: قريب ان شاء الله وبنفرح فيكم كلكم واحد ورا الثاني
سعيد يغمز: عموه ابتسامتج ماتطمن صراحة.. شكله تعرفين اشياء ومخبية علينا
العمة شيخة تقرصه: انته شرايك تكرمنا بسكوتك شويه ؟ من يلست وانته ترمس صدعت فينا
أم سعيد: هيه سكتيه دخيلج.. اكثر واحد يرمس هوه.. محمد ومايد حليلهم مالهم حس كثره
حميد: أنا وحمد عقب العشا بنخليكم شويه.. بنات خالي سارة وعاشه انتو مطلوبات ترى
سارة: كم تدفع ؟
حميد: اعوذ بالله منج... اشرحيلنا الفيزيا وانتي ساكتة مب لازم مقابل
سارة: آسفة لازم مقابل
حميد: حدج قهوة ماشي غير
سارة ابتسمت ابتسامة عريضة: خلاااااص تم
راشد أشر لنورة بعيونه على التلفون، يعني كأنه يقول لها افتحي التلفون
فتحت نورة التلفون شافت راشد كاتب لها بالواتساب
راشد: شعرج طالع، وبعدين معاج انتي ؟
نورة ارتبكت وكتبت له: والله ماقصد الحين بغطيه
راشد: بسسسسرعه غطيه شو تترييين ؟؟؟
غطت نورة شعرها.. وطالعت راشد وانتبهت انه نظراته شرار.. توترت ورجعت تكتب له
نورة: خلاص عاد راشد هد أعصابك... ترى مبين عليك
راشد: مادري متى بتستوعبين الأشياء اللي تضايقني، لازم كل مرة أنبهج، مرة شعرج مرة ايدج
نورة: خلاص حقك علي، بنتبه المرات الياية
راشد: زين، يلا هدي التلفون وايلسي ويا البنات
نورة: ان شاء الله
آمنة: أقول نواري شو جدولج هالاسبوع فالجامعه ؟
نورة: ولا شي، واجبات عادية وعندي برزنتيشن
آمنة: عيل لازم نضبط لنا بالسكن سهرة حلوة ويا البنات
نورة: هيه يبغالنا قعدة حلوة قبل ضغط الميدتيرم
آمنة: بدل ماتسيرين فباص الجامعة، شرايج نمرج انا وراشد ؟ تروحين ويانا على المسا
نورة: أحسن بعد
سارة دخلت عرض: متى نتخرج ونفتك ونعيش الحياة الجامعية
آمنة تبتسم: ماعليه كل شي بوقته حلو، وبعدين لاتتوقعين يعني انه الحياة الجامعية مريحة.. ترى التعب والجهد أضعاف مُضاعفة من اللي فالثانوية
سارة: على الأقل أهون من روتين المدرسة الكئيب، فالجامعه في سكن وبنات من كل الامارات وأجواء حلوة
نورة رفعت حاجبها: يعني انتي واثقة انج بتسيرين الجامعة ؟ يمكن التقنية
سارة بثقة: لا حبيبتي انا وعواش مقررين مع بعض نفس التخصص ونفس الجامعة
آمنة تبتسم: الله يوفقكم ان شاء الله، المهم الحين تركزون بدراستكم نبا نسب ترفع الراس
حميد: لا تدعين لهم بس، ادعيلنا نحن بعد.. كثفو الدعاء دخيلكم نبا نفلح
آمنة ضحكت: اكيد ندعيلكم كلكم... شدو حيلكم اهم شي وفالكم الهدايا الحلوة
حميد: مانبا هدايا، نبغي بيزات قرقشو مخابيكم
العمة شيخة: حميييييد لا تتشرط عيب
حميد يضحك: امييه شوفيج ؟ يعلي صوته: لو سمحتو كل اللي موجودين.. هدايا خريجين الثانوية نبغيها بيزات قد أعذر من أنذر
أبو سعيد: على هالخشم
أبو مايد: فالك طيب
أبو محمد: حمد وحميد المبلغ يعتمد ع النسبة، همتكم عاد
حمد باحراج: ماتقصرون كلكم فيكم الخير.. مانبا الا سلامتكم
العمة شيخة: عساكم ذخر يا اخواني، ماعليكم منه حميد لسانه طويل.. مانبا الا شوفتكم بخير وعافية
