سعيد يالس فالحوي وبايده ملف يراجع الأوراق اللي فيه.. ولابتوبه شغال على أغنية عايض ويغني معاه بكل احساس
يا بلاي أنت ودواي وحاجتي والعون عونك
يا أغلى من كل الحبايب وأغلى حتى من هلي
ردي لي يا عين خلك جعل تسلم لي عيونك
ياللي في قربك حياتي وفي بعادك مقتلي
أم سعيد قعدت حذال ولدها تشرب قهوتها وتبتسم له بكل حب..
سعيد: الوالدة منورتني اليوم وقاعدة وياي برع.. شو الطاري
أم سعيد: الجو يساعد على القعدة برع
سعيد: هيه الحمد لله.. أنا على المسا مواعد محمد بنتعشى برع
أم سعيد: الله يفرحنا فيكم ونشوف عيالكم قبل مانموت
سعيد: بعيد الشر، لج طولة العمر يا أمي
أم سعيد: متى بتفرحني يا ولدي ؟ أبا أشوف عيالك
سعيد بضيق: الوالده لاتيبين هالطاري الله يخليج.. كل شي بوقته حلو
أم سعيد: وانته شو ناقصنك يا ولدي ؟ البيت كبير والمادية مافيها قصور، خبرني شو ناقصنك ؟ وين المشكلة ؟
سعيد يتنهد: مب وقته
أم سعيد: ومتى وقته ؟
سعيد بدا يتنرفز: أمي سكري الموضوع ولاتنكدين علي الله يخليج.. أنا يالس ومرتاح ليش تيبيلي الهم ؟
أم سعيد بزعل: أنا بسير داخل
سعيد يبوس راسها: والله ماتقومين.. حقج علي يالغالية ماقصد.. بس تعرفيني ماحب هالطاري
أم سعيد باستستلام: اللي تشوفه ياولدي.. الله يسعدك دايمًا وفكل حال
سعيد: أجمعين يا الغالية..
مر الوقت على سعيد وأمه بين سوالف ومزح وأخذ وعطا، اتصل محمد لسعيد وقال له انه يترياه برع
سعيد: انا طالع يا الغالية تامرين بشي ؟
أم سعيد: بحفظ الرحمن انتبه على نفسك
سعيد: لاتوصين
في السيارة
محمد: شوفيك معتفس شو صاير
سعيد: رد ينفتح الموضوع اللي مايتسمى
محمد يضحك: لاتلومها، ولدها الوحيد ودها تفرح فيك
سعيد يتنهد: وأنا أسباب رفضي أشوفها وايد قوية.. مب مستعد أضغط على نفسي وأعرس عشان خاطر حد
محمد: ولمتى ؟
سعيد: سكر الموضوع ماريد أتناقش بشي
محمد يأشر على خشمه: على هالخشم، انته بس لاتقلب علينا، خلنا طالعين نغير جو
سعيد: ميود مابيي ويانا ؟
محمد: لا، يقول مشغول
*************************************
عاشة تحط المرهم على ظهر سارة وتمسح بهدوء قد ماتقدر
سارة تتألم: خفي ايدج عواش.. بعدها الكدمات تعورني
عاشة: عوار القلب أشد من عوار الجسد
سارة تتأفف: اذا بتفتحين لي محاضرة.. وبنرجع لموضوع حميد من الحين أقول مش مستعدة أسمع شي
عاشة: كل اللي بقوله انج لازم تثمنين الكلام قبل ماتقولينه.. نظرات حميد ماكانت تبشر بخير.. جرحتيه وايد ترى
سارة: مايهمني ولا مفتكرة فيه
عاشة: بنشوف مع الأيام بتقولين هالكلام ولا لا.. ترى هذا حميد مب حمد ولا سعيد ولا محمد وراشد.. هذا بالذات غير
اندق عليهم الباب
مايد من ورا الباب: أقدر أدخل ؟
سارة: لا، اصبر شويه
عدلت سارة قعدتها وسكرت أزرار قميصها
سارة: ادخل ميود حياك
مايد: ها عواش أردج البيت ؟
عاشة: هيه بروح الحين
مايد: اترياج بالسيارة عيل.. خذي راحتج
قامت عاشة ولبست عباتها.. حضنت سارة وطلعت
*****************************************
في مدينة العين.. جامعة الإمارات تحديدًا
آمنة ونورة قاعدين برع تحت الشجر وفارشين لهم حصير، يحلون واجباتهم ويخلصون الشغل اللي عليهم
وصل نورة اشعار من راشد
راشد: طمنيني عليج خف عوار بطنج ؟
نورة: الحمد لله أحسن
راشد: الحمد لله.. ماوصيج انتبهي على نفسج
نورة: وانت بعد
آمنة: تكلمين منو ؟
نورة بارتباك: وحدة عندي بالكلاس
آمنة: زين ماعليه هدي تلفونج وركزي عشان نخلص ونرقد من وقت
نورة بانفعال: أمون شرايج بالحب ؟
آمنة تضحك: ماعندي راي حاليًا، تركيزي كله بشهادتي وتخصصي عقب يصير خير
نورة: يعني انتي ضد قصص الحب ؟ ما تؤمنين فيها ؟
آمنة: لا نواري.. مب جيه الموضوع، عادي أنا أعترف بالحب، لكن ما أشوف نفسي فيوم بعلاقة، مستحيل.. يا زواج وعقب حب يا بلاها
نورة: ليش هالتشاؤم ؟ الرياييل مب كلهم واحد
آمنة: مب هذا قصدي.. اكيد اصابع ايدي مش واحد، لكن مافيني أدخل بعلاقة حب وأتعذب وينكسر قلبي وأسوي كل شي بالخش والدس.. بصراحة ماعندي طاقة لكل هذا
*******************************************
مر الاسبوع بطريقة روتينية على الجميع.. وياهم اليوم المُنتظر للجميع.. اللي هو يوم اليمعه.. يوم التجمع والسوالف والوناسة
الكل تواجد في المزرعة.. الشباب يجهزون الحطب والفحم للشوي، والأمهات يجهزون الدياي واللحم والذرة والفندال(البطاطا الحلوة)
أما البنات متجمعين مع بعض.. يسولفون شوي ويساعدون أمهاتهم شوي..
نورة تفتح سنابها على ستوري معين عشان تشوفه ويا آمنة.. مندمجين بالفيديو.. فجأة يوصلها اشعار من راشد وكان رقمه باين لأنها مش مسيڤة الرقم
آمنة انتبهت للرقم..بطلت عينها على وسعها: هذا رقم رشود أخوي!!!
نورة بان عليها التوتر والارتباك.. ماقدرت تتكلم
آمنة بصدمة: شو اللي بينكم ؟؟؟؟؟؟
نورة بترجي: أمون خليني اشرحلج
آمنة بعصبية: تشرحين شوووو ؟ شو بينج وبين أخوي ؟؟؟؟ وليش أنا آخر من يعلم ؟؟؟؟ مب ع اساس حسبة اختج ؟؟؟؟ كيف تخبين علي شي مثل هذاا؟؟؟؟
نورة ترجف: خفضي صوتج أمون.. خلينا ندخل وبفهمج كل شي
آمنة قامت: أنا بدخل داخل.. بس ماريد اسمعج ولا أريد أفهم شي
دخلت آمنه ولحقتها نورة.. انتبه على الموقف بالكامل راشد..
ولحقهم
في الصالة
آمنة بتهديد: انا بسير الغرفة.. لاتلحقيني، ابا ايلس بروحي
نورة تصيح: اسمعيني انزين
آمنه طنشتها وراحت.. بهاللحظة دخل راشد
نورة تمسح دموعها: كله منك
راشد مصدوم: شوفيكم ؟
نورة: أمون درت عن علاقتنا
راشد متوتر: الحين من شو هيه معصبة ؟ وانتي ليش تصيحين ؟
عمتهم شيخة كانت فالمطبخ، ودخلت من الباب الخلفي.. شافت راشد لونه مخطوف، ونورة تصيح
العمة شيخة رفعت حاجبها: شكله اللي فبالي كله صح.. شو عندكم رشود ونوار ؟
نورة تصيح زيادة وراحت لعمتها تحضنها
العمة شيخة تحضن نورة: بسم الله عليج، رشود شو سويت فالبنت
راشد: يا الله... ماسوييييت شي!!!!
عمتهم قعدت وأشرت لراشد عشان يقعد
العمة شيخة بهدوء: ممكن تهدين وتوقفين صياح وتفهميني شو صاير ؟
نورة: أمون زعلانة مني وايد
العمة شيخة: والسبب ؟
نورة طالعتها بخوف وتردد
العمة شيخة: أمون وين الحين ؟
نورة من التوتر ماتبا تجاوب
راشد تكلم بدالها: آمنه في الغرفة
العمة شيخة: بروح أناديها وموضوعكم بينحل اليوم وبهاللحظة
راحت عمتهم نادت آمنه وقعدو كلهم فالصالة
العمة شيخة: ممكن تفهموني انتو الثلاثة شو مستوي ؟
الكل ساكت.. محد تجرأ يبدأ بالموضوع
العمة شيخة: وبعدين معاكم، ماتثقون فيني ؟
نورة: لا عمتي، مب جيه الموضوع لاتفهمين غلط
العمة شيخة: عيل يلا اسمعكم
آمنة بعصبية: نورة وراشد بينهم علاقة وانا اكتشفت بالصدفة وأعصابي فلتت
العمة شيخة: صحيح هالكلام ؟
نورة دموعها تنزل.. وراشد هز راسه
العمة شيخة: وكيف بدا الموضوع؟
راشد: أنا بشرحلج كل شي عموه، من ثلاث سنين تقريبًا خذت رقم نورة من اختي امون بدون علمها.. تواصلت معاها، فالبداية نورة رفضت وماعيبها الوضع، لكنني ضغطت عليها ورضخت لي بالنهاية.. ومحد يعرف بهالشي، غير اليوم أمون عرفت وقلبت الدنيا
العمة شيخة: ويوم انك تحب البنت ليش ماتخطبها رسمي وتتواصلون عقب عراحتكم ؟ ليش تسون هالشي من تحت لتحت ؟
راشد بضيق: عمتي انا توني متوظف، وأخوي اللي أكبر مني بعده ماعرس.. خفت أيب طاري العرس ومحد يعبرني أو يهتم!
العمة شيخة: يا حبيبي ليش تربط الأمور فبعضها ؟ أولًا صح توك متوظف وفبداية حياتك بس يوم بتخطبها مابتعرس باجر!! عادي اخطبها ومتى ماناسبتك الظروف بتملج وبتعرس وثانيًا انته شو لك بأخوك اللي أكبر منك ؟ هذا نصيب وكل واحد بياخذ نصيبه بالوقت المكتوب له.. تتوقع شو ردة فعل مايد لو عرف انك تتواصل مع اخته ؟ لاتدمر الثقة بينك وبين عيال عمك.. انتو حسبة اخوان وكل واحد يثق بالثاني ويأمن فيه على أهله.. لاتخربون هالشي بتصرفاتكم
راشد بصدق: يشهد الله علي من يوم كنا صغار وأنا أعز نورة وأغليها، وبعمري ما بغيت لها المضرة، لكن الفترة الماضية مشاعري كانت أكبر مني وماقدرت أسيطر عليها، أنا تواصلت وياها عشان قلبي يطمن عليها وعلى أخبارها
نورة من قوة الاحراج شلت بعمرها وطلعت برع
العمة شيخة تضحك: والله وطلعت مب هين يا رويشد، وانتي يا أمون تهون عليج بنت عمج تعاملينها بهالاسلوب ؟
آمنة: عموه انجلطت، حسيتني غبية، أخوي من صوب مخبي علي وهيه من صوب ساكتة.. وهم أقرب اثنين لي!
العمة شيخة: ماعليه، كل شي بالدنيا له حل، لكن الواحد غلط ينفعل وياخذ المواضيع باندفاعية، اسمعي أول عقب احكمي!!
آمنة: ان شاء الله
العمة شيخة: اسمعني يا راشد، من الاسبوع الياي تكلم أهلك عن نورة واذا حسيت انهم مابيرضون كلمني أنا بحل الموضوع.. واذا بغيت تعرف عن نوره واخبارها عندك أختك كلمها واسألها.. اوردي نحن كل يمعة نتيمع.. كحل عينك بشوفتها كل يمعه شو تبا زياده بعد
راشد يضحك: حاضرين عموه.. اللي تامرين فيه
طلعت آمنة وراحت لنورة
آمنة تهمس: المرة الياية لو تخبين عني شي بذبحج
نورة حاوطت ايدها على كتف آمنة وحضنتها على جنب
نورة: توبة.. ماعيدها... بس شوي شوي علي بالهون
آمنة تردلها الحضن: حقج علي وايد انفعلت ادري
أم محمد: هذييييل وراهم شي، فالمدرسة مع بعض وفالجامعة اربعه وعشرين ساعة مقابلين بعض.. والحين بعد أحضان ؟ ماتملون ؟
العمة شيخة تبتسم: خليهم حسبة خوات.. الله يديم المحبة
أم مايد وأم محمد: آميين يا رب
