بعد صلاة الفجر.. الكل رجع يرقد إلا نورة.. مافيها رقاد.. قررت تنزل المطبخ وتسويلهم ريوق.. سوت دلة شاي وقهوة وفورت البيض.. طلعت زيتون وجبن ولبنة وكرواسوون.. رتبت السفرة في الصالة
دخل راشد وتفاجئ بوجودها: هلا بروح وقلب راشد
نورة ابتسمت له
راشد: ليش قايمه ؟
نورة: ماياني رقاد، فجهزت الأكل.. حياك
راشد قعد مقابلنها: يلا قشريلي البيضة
نورة تضحك: عندك ايد، قشر لنفسك
راشد: ندربج على أجواء الزواج، تخيليني ريلج ويلا باشريني بالأكل وصبيلي شاي
نورة أشرت على عيونها، يعني كأنها تقول من عيوني بالاشارة
راشد: انزيييين قوليها
نورة تستهبل: شو أقول ؟
راشد: انتي عارفة شو أقصد
نورة تبتسم: لا مب عارفه، فهمني
راشد: يعني قولي من عيوني حبيبي، تم يا قلبي، حاضر حياتي، انتي ليش ناشفة ؟
نورة: كل شي بوقته حلو
راشد: أهون عليج ؟ سمعيني كلمة وحدة على الأقل, اذني محتاجة كلام حلو
نورة: ولا نص كلمة بتحصل
راشد: بخييلة
نورة تضحك: وراضية اني بخيلة، تعال انته ليش قايم ؟
راشد: لاني راقد من وقت، فشبعت نوم
نورة: حلو
راشد: انتي الحلوة
نورة انحرجت: رشود ترى والله بقوم
راشد: لا لا خلاص بسكت
دخلت العمة شيخة: صباحكم ورد
راشد ونورة: صباح النور والسرور
العمة شيخة: محد قام غيركم ؟
راشد: لا، الكل راقد، وبخصوص أمس بليل ترى حمد تعب طشونة
العمة شيخة بخوف: بسم الله عليه شو ياااه
راشد: لاتحاتين بسيطة، نزل عليه السكر، شرب عصير واموره طيبة
العمة شيخة بضيق: فديتك يا ولدي، يشوفها من السكري ولا من الربو، في حد كان عنده ؟
راشد: لا
العمة شيخة باستغراب: عيل كيف فتح العصير وشربه ؟ بالعادة يوم ينزل عليه السكر مايقدر يتحرك مول
راشد: مادريبه كان بالمطبخ، بس لاتخافين عموه احنا راقبنا وضعه طول الليل، و أنا على الفجر تأكدت من وضعه بعد
العمة شيخة: الحمد لله يوم انها عدت على خير، دخيلك راشد انتبهو عليه، لاتحسسونه بشي بس ديرو بالكم
راشد: لاتوصين حريص.. حمد وحميد بعيوننا
العمة شيخة بحزن: حمد نفس أبوه الله يرحمه بكل شي، الأطباع والتصرفات وحتى بالمرض يشابهه
نورة وراشد: الله يرحمه ويغفرله
****************************************
على الساعة 10:00 الكل قام للريوق، وتيمعو في الصالة
سارة كانت تحس بضيق ماتعرف شو سببه.. تحس في شي ناقص بحياتها.. في شي متغير عندها.. لكن غرورها وكبريائها منعها تعترف بالسبب الحقيقي للضيق اللي تحس فيه!
أما عاشة فموقف أمس للحين مسبب لها احراج وموترنها.. ومش قادرة تحط عينها بعين حمد نهائيًا
وسعيد، كل شوي يطري على باله شكل آمنة
وطيور الحب نورة وراشد، حبهم كل يوم يزيد.. ومع الوقت علاقتهم صارت أقوى
أما مايد ومحمد، اكثر ثنين هاديين فالعيلة، وحياتهم بشكل عام خالية من المواقف والأكشنات
