بعد مرور ثلاث شهور:
دخلت عليها الغرفه، شافتها يالسه ع السرير، وطالبة وجبة سريعة وتاكلها بشراهة، البنت وزنها زاد أضعاف، وصارت عندها لخبطة هرمونية وبعض المشاكل الصحية بسبب زيادة الوزن السريعة الصادمة للجسم
عاشة تسحب عنها الوجبة: والله مابتكملينها.. بس خلاص، ارحمي نفسج من هالخرابييط، اكلي شي عدل
سارة بجمود: خليني آكل انتي شو معورنج ؟
عاشة بعتاب: سارة انتي صاير عندج موضوع الأكل العاطفي، والله يالسه تدمرين نفسج، مابيفيدج اللي تسوينه
سارة:................................
عاشة: شرايج نطلع اليوم ؟؟
سارة: لا
عاشة برجاء: لمتى ؟؟؟ ارجعي سارة الأولية، الفرفوشة اللي تضحك وتستهبل طول الوقت، والله اني فقدتج
سارة بغصة: وأنا فقدت أغلى ما عندي، من يعوضني ؟
عاشة حضنتها: ربي اللي بيعوضج، لا أنا ولا غيري، رب العالمين بيهديج ويجبر قلبج، بس انتي شدي حيلج وصيري قوية
سارة بادلتها الحضن وصاحت: عواش الموضوع صعب، والله انه صعب
عاشة: يا قلبي عارفة، بس حاولي، وكلنا واقفين وياج، انتي مش بروحج !
سارة: الله المستعان
عاشة: ونعم بالله
مايد يدق الباب: هوود هوود
عاشة: هداا، تفضل مايد
مايد بابتسامة: اسمحولنا قاطعناكم، بس الموضوع مايحتمل التأجيل
سارة باستغراب: عسى ماشر
مايد: بنسير العمرة ان شاء الله، تزهبي
سارة: والجامعه ؟
مايد: بنسير بالويكند الياي، يعني ان شاء الله ما بيفوتج شي
سارة حضنته: يزاك الله خير
مايد يمسح على ظهرها بحنيّه: الله يشرح صدرج وييسر أمرج.. هونيها وتهون يا وخيتي، كلها خيرة من رب العالمين
سارة بغبنة: الحمد لله
**********************************************
راشد بانفعال: عموووه لا ترديني، والله اني ضايق وكاره عمري، أنحرم منها هالمدة كلها ليش ؟؟؟؟
العمة شيخة تتنهد: يا ولد كيف بعد أخليك تشوفها بدون علمها ؟ مب حلوة
راشد برجاء: طلبتج ولا ترديني، المشكله انها ماتيي بيت يدوه، انا تحريت اني بشوفها هناك ع الأقل
العمة شيخة: انته عارف انه الرفض من أبوها مب منها هيه صح !
راشد: عارف، وذليت عمري ذل لعمي عشان يرد لي البنت ومب راضي، حشى اذا نيته يعاقبني يكفيني اللي ياني، والله اني تعلمت الدرس ومابينعاد شي
العمة شيخة: خلاص ماعليه، بشوف اليوم لو قدرت أخليكم تتلاقون
راشد: بتقدرين ان شاء الله، بترررررياج عموه لا تخونين فيني، تصرفي بأي شي دخييييلج، خلاص ماستحمل أكثر
العمة شيخة: انزين انزين لا تحن
******************************************
حميد من عقب صدمته بموضوع التحاليل، صار انسان ثاني، هادي وساكت أغلب الوقت، ويحمد الله ويشكره انه دخل الخدمة الوطنية عشان يلهي شوي ومايذبحه التفكير.. كان يتهرب من تجمع العايلة الاسبوعي، وسارة نفس الكلام، مب عارفين كيف يواجهون بعض بعد اللي صار، ولكنه قرر اليوم يبادر.. لأنه ما بيتمون طول العمر كل واحد يشرد من الثاني ومش قادرين على المواجهة.. كلم أمه وقال لها انه بيكون موجود.. ولازم سارة بعد تكون موجودة
