بعد القفز والجولة الخارجية عند حميد وسارة.. قررو يسبحون الخيول
حميد: انا بسير الجهة الثانية، لو بغيتي شي ازقريني
سارة: أوكي
بعد ماراح حميد، مشى خالد صوب سارة و وقف قريب منها نوعًا ما
خالد: مساء الخير
سارة: مساء النور
خالد: سارة صح ؟
سارة باستغراب: هيه نعم، منو الأخ ؟
خالد: أنا خالد، والمدرب مطرشني اسألج عن البطولة، لو حابة تشاركين فيها
سارة: انا قلتله المدرب قبل، اني مافكر بالبطولات ولا المسابقات أبدًا
خالد: ليش عاد ؟ انتي من سنين فالنادي، وخبرتج مب قليلة، جربي تشاركين، وانا تراني ياما شاركت، وحصلت على مراكز حلوة، فلو شاركتي بساعدج خطوة بخطوة وبيكون الموضوع سهل
سارة ابتسمت: مشكور، بس أنا مافكر بالبطولات أبدًا، يمكن لو غيرت رايي مستقبلًا تساعدني
خالد: تمام اللي يريحج، عن اذنج
سارة: اذنك معاك
حميد كان يراقب الوضع من بعيد، وبداخله يغلي، راح صوب سارة و واضح عليه الانزعاج
حميد: شو عنده هذا واقف عندج ؟؟ شو يبا ؟؟
سارة: يقول المدرب مطرشنه يسألني لو بشارك فالبطولة
حميد بنرفزة: والمدرب ماعنده ريول ولسان عشان ايي بروحه ويتفاهم معاج ؟!! ليش مطرش خالد يعني
سارة: حميد بلاك معصب ؟ الريال محترم ترى وماغلط بشي
حميد باستهزاء: نحن الشباب أدرى فبعض، على أي اساس حكمتي انه محترم ؟ وبعدين تعالي تراه كان وايد لاصق فيج!!! لا تخلين حد يلصق فيج جيه مرة ثانيه، ولا تاخذين وتعطين بالكلام ويا أي حد
سارة: حميد أعصابك، كلها كلمتين رديت فيهم عليه وخلصنا.. تراك دراما، وايد مكبر الموضوع!
حميد بعصبية وصوت شوي مرتفع: اصطلبي وانتي تكلميني، شو دراما بعد، أقولج انا ريييييال وأفهم فالريايييييل وأعرف نواياهم، خالد وصخ، افهمي الولد وصخ وعنده سوابق، خلج بعيد عنه ولا تحتكين فيه نهائيًا
سارة تتنهد: ان شاء الله
حميد خذ نفس عميق عشان يمسك أعصابه، وحس بتأنيب الضمير وانه شد عليها بالاسلوب.. بعدها بثواني
حميد: اسمحيلي ماقصد أكلمج بهالاسلوب، بس من خوفي عليج
سارة ابتسمت: انته مشكلتك خواف زيادة عن اللزوم، وتحاتي والموضوع بسيط مايستاهل
حميد: بنت خالي ومن لحمي ودمي، لازم بحاتيج
سارة: الأمور طيبة ماعليه، بتقدر توصلنا البيت انا وعواش ؟ ميود مشغول اليوم
حميد: أكيد أقدر، بتيوون عند يدي ع المسا صح ؟
سارة: هيه ان شاء الله
حميد: أسميها الأيام تركض، اليوم راس السنة، الله يجعلها سنة خير علينا
سارة: آمين يا رب، بتطولون في القعده ؟ يعني بتمون لين وحدة بليل ؟
حميد: هيه أعتقد، ويمكن عماتج مسويين فعاليات حقنا كالعادة
********************************************
موزة: ترى عالمسا اخواني وعيالهم بيوون، يعني توكل بدون مطرود
سلطان يبوس خدها: ماشبعت منج
موزة تدزه: سلطان خلاص عاد
سلطان مسك ايدها: والله ماشبعت، ودي أيلس وياج أكثر
موزة: انته من ثلاث ساعات يالس ويااي، ناوي ترقد فبيتنا شو ؟؟؟؟
سلطان يبتسم ببلاهة: ماعندي مانع، لو بتفرشين دوشك فالميلس راضي، مب لازم ارقد بغرفتج وعسريرج
موزة تضحك: ها اللي ناقص بعد
سلطان بنبرة مليانة حب: الحمد لله انه ربي بلغني هاللحظة، وصرتي من نصيبي وحلالي
موزة تبتسم: فديت قلبك، وانت أول حب و آخر حب وأجمل شعور أعيشه
سلطان: الله يتمم الباقي على خير، واشوفج بالفستان الأبيض
موزة ترص على ايده: آمين يا رب
*******************************************
على المسا كان الكل متواجد في الحوي.. خلصو من العشا، وياكلون سويتات ويشربون قهوة وشاي
العمة شيخة ترفع الدلة: منو يبا قهوة ؟
سعيد: صبيلي عموه
العمة شيخة: من عيوني
مايد: من قدك يا سعيد، انته أكثر واحد تحبه و تدلعه عموه شويخ
العمة شيخة تبتسم: لا فديتك لا تقول هالرمسة، كلكم من صغيركم لكبيركم عزيزين وغاليييين، قدركم واحد
مايد: أمزح عمو أمزح
العمة شيخة: لوتي، أدريبك يالس تنغز
مايد: انتي ماتقصرين مع الكل عموه، الله يعطيج الصحة والعافية
سعيد: ماشي فعاليات اليوم ؟
العمة موزة: طبعًا في
العمة شيخة: اكيد في فعاليات، بس ريحو شوي عقب الأكل، بعدين بنبدا
حمد كان يالس و واضح عليه التعب والارهاق، غير انه فيه رجفة جدًا خفيفة محد لاحظها غير عاشة.. كانت تراقب ملامحه وتصرفاته.. صبت كوب شاي وراحت تعطيه
حمد ابتسم: مشكورة، بس تراني مابا شاي
عاشة: اشرب شوي عشان تتدفى، عادي تيي داخل وياي ؟
حمد باستغراب: ليش ؟
عاشة: تعال وبتعرف
قام حمد وبايده الكوب يلحقها، دخلو غرفة العمة موزة
حمد: شو تبين فغرفة عموه ؟
عاشة: بطلعلك فروة تلبسها
حمد: انا مش بردان عادي
عاشة التفت عليه وابتسمت: تراني لاحظت انه فيك رجفة خفيفة
حمد بصدمة: ما شاء الله عليج، مايفوتج شي!! محد من اللي قاعدين لاحظ
عاشة بعفوية: الناس اللي احبها أركز بأبسط تفاصيلها
حمد تنح فيها.. قلبه خفق من كلامها.. أما عاشة ولا حست باللي قالته.. تتصرف طبيعي جدًا ومش مبين عليها شي.. لأنها كالعادة خوفها على حمد طاغي عليها
عاشة حصلت الفروة وعطتها له
حمد ابتسم: تسلميين
عاشة: يسلمك ربي، خذيت ادويتك ؟
حمد: هيه
عاشة: يلا عيل نروح برع
حمد: عواش لاتعوديني على هالاهتمام، تراج وايد شاغلة نفسج فيني
عاشة: انته تستاهل كل خير، وبالأول والأخير تراك ولد عمتي، لاتقول شفقة و مادري شو.. أنا هذي تصرفاتي مع الكل ترى
حمد ابتسم: فيج الخير
عاشة: يلا نروح برع وياهم.. اذا عقب بغيت تشرب شي دافي خبرني بخلي الخدامة تسويلك
حمد: ماتقصرين
طلعو عاشة وحمد يكملون قعدتهم فالحوي
العمة شيخة بصوت عالي: نداااااء للجميع، الكل يتجمع هنيه وبنسوي دائرة وخلكم مستعدين لأول فعالية
سارة بحماس: شو بنسوي عموه ؟
العمة شيخة: عندي أقلام وأوراق، كل واحد يكتب أمنية يتمناها في 2024 أو شي ينتظره او اعتراف، عادي اللي يخطر فبالكم اكتبوه وخذو راحتكم، عقبها بنحط الاوراق كلها فبوكس وبنوزع الأوراق عشوائي وبنقراها، طبعًا محد يكتب اسمه، كل شي بيكون مجهول، مفهووم ؟
محمد: اعترض
العمة شيخة ترفع حاجبها: خير ان شاء الله ؟ شعندك ؟
محمد: يمكن حد من الشباب يعرف خطي، عقب بيعرفون شو كاتب
سعيد: من زين خطك انته، جنه نقش دياي
محمد يضحك: لا جد فكر فيها.. ماينفع نفت العلوم عقب ننكشف
مايد: يا ريال شو بنكتب يعني نحن ؟ أحسها بتكون أشياء عادية.. الا اذا انت عندك بلاوي هذا كلام ثاني
العمة موزة تقاطعهم: يا حلوييين، تراكم يالسين عند أهلكم وأقرب الناس لكم، يعني شوفيها لو حد عرف منو كاتب الشي الفلاني ؟ خذوها ببساطة وروح رياضية
العمة شيخة: يلا بسم الله انا بوزع الورق والأقلام.. عندكم عشر دقايق.. اكتبو اللي تبونه عقب كسفو الورق زين أهم شي لحد يحط الاوراق مكشوفة ويبين اللي فيها
