مايد: سوي عمرج ماسمعتي شي، مافيني حيل أفتح هالموضوع
نورة: أنا أختك، فضفض لي يمكن أقدر أساعدك
مايد باستهزاء: أنا ماقدرت أساعد نفسي، وين انتي بترومين تساعديني!، مابيدج شي
نورة بحنيّه: ماعليه حتى لو ما أقدر أسوي شي، شال همك بروحك ليش ؟ أنا مب غريبه، أنا أختك سترك وغطاك
مايد: فيوم كنت أخطط حادث لوحدة، والبنت حبيتها من أول لقى ونظرة، دشت قلبي، أدري بتستغربين وانه شسالفة شفتها وحبيتها على طول و........
نورة تقاطعه: لا أبدًا، الحب والمشاعر مش بإيد الانسان، مستحيل ألومك، انزين حبيبي كمل
مايد: صارت بيننا علاقة، يعني مكالمات وأخذ وعطا.. ماطلعت وياها ولا غيره، أساسًا مستحيل أرضى عليها، المهم يا وقت الجد بعد ماتخرجت من الجامعه، قلت لها بتقدم لج، قالت اصبر بكلم أهلي، فجأة انقطعت عني اسبوع تقريبًا.. خفت عليها وحاتيتها وايد، عقبها رجعت تكلمني وهيه منهارة، أمها رافضة، وليومج هذا رافضة
نورة باستغراب: وليش الرفض ؟
مايد: لأنهم فوق واحنا تحت
نورة: بس الحمد لله نحن حالتنا تعتبر ميسورة والخير موجود، ثانيًا لو كانت تحبك صدق بتحاول تقنع أمها، لأنه هذا مب عذر !
مايد: لو تعرفين بنت منو مابتقولين هالكلام، ولا تشككين بحبها، البنت تحبني ولو ماتحبني ماكانت بترفض الخطاطيب وبتيلس بدون عرس كم سنة
نورة: يلا انزييين خبرني هذي بنت منووو؟
مايد: حصة *****************
نورة بطلت عينها على وسعها: ميووووووود تستهبل! بشووووو كنت تفكر يوم حبيتها ؟ صدددددمتني
مايد بغصة: لا تزيديني هم
نورة: إنزين والحل ؟ شو تحس في أمل ؟
مايد: ساس البلا كله من أمها، لأنها متسلطة وشورها هو اللي يمشي، لو أمها رضت أمورنا طيبة لكنها معندة، وتراها البنت الوحيدة من بين أربع أولاد
نورة عقدت حاجبها: أيوا يعني حبيت دلوعة البيت
مايد: وبس يا نورة هذا كل اللي عندي
نورة بمكر: ميوووووووود
مايد: خييير ؟ هالنبرة تخوفني
نورة بفضول: عادي تخبرني عن الحادث ؟
مايد سرح وابتسم، بدا يشرح لها الموقف..
كان فدورية، و وصله بلاغ الحادث وتوجه له مباشرةً.. دقيقتين و وصل للموقع.. راح لها ودق الجامة عشان تنزلها
مايد: السلام عليج اختي
حصة بغبنة: وعليكم السلام
مايد: تعورتي ؟ شي ياج ؟
- حصة بدت تصيح وماردت عليه -
مايد بخوف: اطلب لج الاسعاف ؟؟؟ بشو تحسيين ؟ فيج ويع ؟
حصة تشهق: مافيني شي، بس أول مرة أسوي حادث وزايغة
مايد: ماعليه اهددي، الأمور طيبة، انزلي من السيارة واركبي سيارة الدورية لين مايوصلون أهلج، دقيتي لمنو ؟
حصة برفض: لا.. أخوي قال لي ماتحرك لين مايوصل
مايد كاتم ضحكته: انزين انتي مبندة السيارة، بتفطسين حر، انا مابركب سيارة الدورية، بتيلسين فيها بروحج
حصة باصرار: لا مابنزل، عادي مرتاحة جيه
مايد: أخوج مطول ؟
حصة: ربع ساعة تقريبًا
مايد ابتسم: ماعليه عطيني ليسنج والهوية، واذا بغيتي اي شي ازقريني
