اليوم كانت أول زيارة لراشد ونورة.. دخل الميلس بإيده ورد وعلبة شوكليت.. ابتسم لها وسلم عليها سلام الخد
راشد: شحالج حبيبتي
نورة: الحمد لله بخير وعافية انته شحالك ؟
راشد: تمام الحمد لله
نورة: كل مرة بتزورني بتيب ورد ؟ ياخي لا تتعبل وتكلف على نفسك مايحتاي
راشد: مايغلى عليج شي، تستاهلين وزود.. هاه شخبار الجامعه هالاسبوع ؟
نورة: ضغط.. ولكن كل شي يهون دامه آخر كورس الحمد لله
راشد: الله يعديه على خير يا رب
نورة: آميين
راشد شبك ايده الثنتين بطريقة تلقائية وسرح.. نورة من دخل عليها وهيه حاسة انه مب طبيعي أساسًا
نورة مسكت ايده: فيك شي رشود ؟ عسى ماشر ؟
راشد يمسح على ايدها: ما من شر حبيبتي، بس أحس الوقت مش مناسب عشان أتكلم
نورة: أفا عليك، مابيننا هالرسميات إحنا.. قول اللي فخاطرك
راشد بارتباك: ماعرف كيف أبتدي بالموضوع
نورة: قول ولا تحاتي شي مولية
راشد: بغيتج تلبسين نقاب أو غشوة
نورة تحس كأنه حد صب عليها ماي بارد.. من الصدمة تمت تطالعه بدون ماترد
راشد بقلق: شفيج ؟ ليش صخيتي فجأة ؟
نورة باستنفار: أول زيارة لك عندي فالبيت، وياي تقول لي تنقبي ؟ راشد انته شفيك ؟
راشد باستغراب: وبلاه النقاب ؟ ماظن اني طلبت شي غلط ولا عيب وحرام.. ريال وطلب من حرمته تغطي ويهها.. أظن من حقي هالشي!
نورة بانفعال: ويوم انك تبا حرمة منقبة ليش خطبت وحدة سفور؟ ليش خطبتني أنا ؟ كان خطبت وحدة تغطي ويهها وريحت راسك
راشد يتنهد: نوار ماله داعي هالكلام، كيف بعد أخطب غيرج ؟ تراج كبرتي الموضوع وايد، إلا هو نقاب
نورة بعصبية وبدا صوتها يعلى: حاول تفهمني، الموضوع مب اعتراض على النقاب نفسه.. انا مب معترضة على النقاب ولا اللي يلبسون نقاب.. كل انسانة حُرة بنفسها وتسوي اللي تبغيه، بس انته تعرف اني أكشف ويههي صح ولا لا ؟ أمي ماتتنقب، عماتي، أمك وخواتك ما يتنقبون.. حريم العايلة كلهم يكشفون ويووههم.. كيف جيه تييني فجأة إلبسي نقاب ؟ وأعتقد انه حجابي ولبسي ساتر واني حشيم الحمد لله.. حق شو النقاب فهمني ؟
راشد: ياقلبي اسمعيني وركزي معاي... أنا مالي خص فأمي وخواتي وحريم العايلة، مثل ماقلتي كل واحد حُر بنفسه، أنا علي من حلالي.. انتي حرمتي حلالي أنا.. وأنا أغار على حلالي، و ودي انج تغطين ويهج.. وين الغلط ؟؟ ومن ناحية انج حشيم أنا أشهد على هالشي، ستييير ورزينة ماعليج قصور فالحشمة ما شاء الله عليج
نورة تحاول تقنعه: راشد انزين بتغشى فالأماكن الزحمه، أو الأماكن اللي فيها رياييل... بس ما بلبس نقاب.. النقاب إلتزام كبييير ترى، لو لبسته خلاص لا بُد ألتزم فيه كل وقت وفكل مكان
راشد يحضنها ويحاول يمتص غضبها: وأنا هذا اللي أبغيه، يمكن فالبداية يكون الوضع غريب عليج، بس تراه مب صعب عادي.. البسيه وبتتعودين عليه
نورة بوّزت وحاولت تبعده عنها
راشد يرص عليها أكثر: قلب راشد وعيونه، لا ترديني، أنا ريلج حبيبج، طلبت هالشي ومن حقي.. أحبج وأغار عليج شو فيها ؟ مافيها شي صح ولا لا؟
نورة:...................
راشد يمسح على ظهرها: زعلانة مني ؟
نورة بضيق: لا
راشد: مب مقتنعة للحين ؟
نورة بصوت مغبون: مايهمك اقتنعت ولا لا.. المهم أنفذ أوامرك
نورة مازالت بحضن راشد، رفع ايدها وباسها: أفا عليج حبيبتي، هذا طلب من شخص يحبج ويموت فيج، هذا مب أمر ولا تسلط.. حاولي تشوفين الموضوع من جهة ثانية، شوفيها من ناحية حبي وغيرتي عليج
نورة خازت عن حضنه وقالت ببرود: ان شاء الله.. من أسير السوق بخذلي نقاب وببدا ألبسه على طول
