موزة بضيق: أنا حامل
سلطان كاتم ضحكته: بسسس ؟؟؟ هذا اللي مزعلنج ؟ الله يهديج
موزة: توه الناس ع الحمل والتعب، كنت أبا أول فترة تمر بهدوء و روقان
سلطان يمسح على ظهرها: مب زين تقولين هالرمسة حبيبتي، في ناس يتمنون ظفر ياهل، حمدي ربج وشكريه، وتفاءلي ماتدرين يمكن تمر عليج شهور الحمل خفيفة
موزة دمعت: لو يبت ولد بسميه على أبوي
سلطان: تم، انتي بس خلي ولدنا أو بنتنا توصل بالسلامة ويصير خير ان شاء الله
- موزة ردت تصيح -
سلطان حضنها: يا ويلي، هذي هرمونات الحمل ؟ ما شاء الله بدينا من الحين! بس هرموناتج ضاربة لا يكون حامل بتوم ؟
موزة بعصبية: سلطاااااااان، لا تستظرف دمك
سلطان ينزل عشان يبوس بطنها: ولدي حبيبي، بالهون على أمك، ارحمها عشان ترحمني، لا تغصص فيها، ترى محد بياكلها غيري
موزة تضحك وتمسح على شعره: مجبور تتحملني وتوقف وياي، أنا زوجتك حبيبتك
سلطان يسحب ايدها اللي على راسه ويبوسها: إنتي مش بس زوجتي وحبيبتي، إنتي قلبي وروحي ودنيتي كلها
********************************************
سعيد يمسك ايدها: أفا عليج يالغالية، احنا من متى نتفاهم بهالطريقة ؟
أم سعيد:............................
أبو سعيد: ماعليك يا ولدي، أمك مصيرها تطخ وترضى
سعيد يحضنها على جنب: أهون عليج تزعلين مني؟ من متى تستخدمين وياي اسلوب الضغط ؟ ما بكلمك عشان بالنهاية ترضى باللي أنا أباه !
أم سعيد بعتاب: مايهمك رضاي ؟
سعيد: أكيد يهمني، انتي الغالية و راس المال
أبو سعيد يزفر: يا حرمة انتي وبعدين معاج ؟ حشى محد رايم يتنصخ منج ! اسمعي الولد انزين عطيه مجال يرمس، ماخذتنه بشراع وميداف وضاربة البوز شبريين
أم سعيد بغيض: بدل ما تفهّم ولدك انه اللي يسويه غلط، يالس تلومني ؟ انصحه، عقّله بدل ما تهازبني
أبو سعيد طنشها والتفت على ولده: سعيد أبوي قول كل اللي بخاطرك مرة لا تخلي شي
سعيد يتنهد: انا ماكنت أبا أفتح بيبان قديمة، ولكن لازم أتكلم عشان تكون الصورة واضحة
سعيد يلتفت على أمه: تراني لازم أتقدم لآمنه، البنت عندها علم واخوها عنده علم وعمتي شيخة بعد تعرف، لأنه ...
أم سعيد تقاطعه بعصبية: ما شاء الله !!!!! الناس كلها تدري عن هالموضوع وأنا آخر من يعلم ؟؟؟ سعيد انته شو ياك ؟؟؟
سعيد: أمي حبيبتي الله يرضى عليج اسمعيني ولا تقاطعيني، ممكن ؟
أم سعيد تصرخ: تفضل، اصدمني أكثر وأكثر
سعيد بهدوء: أنا كنت أحب وحدة لمدة طويلة، لكن الله ماكتب وعرست البنت، لهالسبب كل ماتيبون طاري الزواج أنا أرفض وأعصب عليكم، ولو تذكرون يوم انقلب حالي وسافرت برع ثلاث اسابيع، وعقب يوم رديت وضعي كان مب لهناك، فهالفترة البنت عرست، عقب عمتي شيخة درت، ومن يومها وهيه على راسي، ماهدتني لين ماصار حالي أحسن، ويا الوقت اللي قررت فيه إني أعرس، فقالت لي عموه لا تسير بعيد بنت عمك موجودة.. أخوها محمد عنده علم بهالعلاقة، لكنه ماعارض زواجي من اخته، بالعكس شجع الموضوع، وهذا كل اللي صار
