حطت ايدها ورا ظهرها، وهو مشى صوبها لين ماصار مجابلنها
راشد باستغراب: شو خشيتي ورا ظهرج ؟
نورة بصوت يرجف: ولا شي
راشد مد ايده بهدوء وسحب عنها علبة الدوا، إنخطف لونه وهوه يقرا، تنهد بصوت مسموع، وقرر يسألها، تمنى فداخله تجاوبه بإجابة ثانية
راشد: حبوب منع الحمل ؟
نورة هزت راسها بدون رد
راشد بغبنة: ليش ؟ ماتبين عيال مني ؟
نورة تبلع ريقها: لا راشد لا، بس أنا مابا عيال الحين
راشد باستهزاء: واللي ماتبا عيال ماتخبر ريلها ؟
كمل بصراخ: ماتعرفين انه فالشرع والدين حرام اللي سويتيه ؟؟؟ انزين ماتبين عيال ماعليييه ارمسسسي، انططططقي، أساسًا هالأدوية بتسبب لج مشاكل هرمونية وبلاوي لو انوخذت بداية الزواج يالفالحة
نورة بنفس صراخه: انته انسان ماتسوي إلا اللي براسك وبس، كلمتك هيه اللي تمشي، وأنا ؟ بالطقاق، نفااااد مب مهم اللي أبغيه، يعني لو يييت وقلتلك نأجل موضوع الانجاب بترضى ؟؟؟؟؟ خسي ترضى بتسوي اللي يريحك وبسسس
راشد بانفعال: منو قال لج مابرضى ؟ انتي استخفيتي ؟؟؟ كيف قمتي تفكرين نورة مخج شو صار فيه ؟؟؟؟ كيف حكمتي على شي وانتي ماسألتيني حتى، أنا مب متسلط لهالدرجة ؟
نورة بغضب: انته مب متسلط ؟؟؟؟ انته متسلط وأناني وماتفكر الا بنفسك وبس،، وهالشي خلاني أحس بانعدام الأماااان وياك
راشد طالعها بنظرات مفجوعة، آخر جملة عورت قلبه
نورة بتأكيد: ما أحس وياك بالأمان، لهالسبب ماريد عيال منك، لأني ما أدري بكمل وياك ولا بننفصل، ماستبعد فيوم نتطلق، كل شي جايز
راشد بانكسار: اطلعي برع
نورة بصدمة: راشد !!!
راشد قرب منها وصارخ بأعلى صوت: قلت بررررررررع، ما ودي أمد ايدي عليج، تووووكلي
نورة تمسك ايده بترجي: وين أروح ؟ انته معصب الحين ومب عارف شتقول، أنا بسير بيلس فالصالة لين ماتهدى
سحب ايده منها بحدّة، شل عباتها وشيلتها ورماها عليها
راشد بحدة: إلبسيها واطلعي، الحيييين !!!
نورة من خوفها لبست بسرعة
نورة تصيح: تطردني ؟
راشد سحبها من ايدها بعنف لين ما وصلها عند باب المُلحق، دزها وقفل الباب
أما نورة كانت مذهولة من الموقف، واقفة تحت الشمس، ماعندها تلفونها وحتى سويج سيارتها، شو تسوي بعمرها ؟
يلست على عتبات الباب ودموعها تنزل، محمد دخل الحوي بهاللحظة وانتبه عليها
محمد باستغراب: عسى ماشر مرت أخوي ؟ شو ميلسنج برع بهالحر
نورة: أخوك طردني وقافل الباب
محمد تنهد: لا حول ولا قوة الا بالله، انزين قومي ادخلي عند عواش غرفتها، ولا ايلسي عند أمايه
نورة: ماريد حد يعرف عن شي، ممكن توصلني بيت أهلي ؟
محمد: حاضر، تعالي السيارة
نورة: ليش السيارة ؟ البيت قريب اوقف لي شوي لين ماوصل
محمد: الدنيا لاهوب ماينفع تمشين، اركبي عندي السيارة وبوصلج
