تحديدًا في آخر ليلة من رمضان.. على الساعة 12 بليل.. سلطان اتصل مكالمتين لموزة وماردت عليه، وفي المكالمة الثالثة ردت
موزة بعتب: احنا ماقلنا مافي تواصل لأنه العرس قرب خلاص ؟
سلطان: اشتقت لج يا حلوة
موزة تتنهد: وأنا أكثر
سلطان: وانتي شو ؟ كمليها
- سلطان يحاول يسولف وياها ويغير جوها، لأنه عارف ومتأكد انه مزاجها بيكون معتفس، وبتتذكر أبوها، وهذا كان سبب اتصاله-
موزة:...............
سلطان: ليش ساكتة ؟
موزة بغبنة: بسكر أنا مشغولة
سلطان: والله ما تسكرين، بنسهر لين الصبح مع بعض، شرايج ؟
موزة بضيق: سلطان الله يرضى عليك، والله مالي بارض لشي
سلطان: عيون سلطان انتي، خليني ع الخط، حتى لو بترقدين برايج بس مابسكر
موزة: راسك يابس
سلطان: مب كثرج
موزة: انزين بغسل ويهي وبفرش اسناني عقب بنسدح ع السرير وبدق لك اوكي ؟
سلطان: برايج سيري خلصي كل شي وانا بتم ع الخط
موزة: يا حبك للخساير يا سلطون!! والله بدقلك من أخلص
سلطان: حبيبي عندي مكالمات مجانية أنا لا تحاتين
موزة: خلاص اللي يريحك.. بسير وبرجع
سلطان: زين
راحت موزة فرشت اسنانها وسوت عنايتها المعتادة.. لبست بجامتها وانسدحت ع السرير.. تقريبًا كل هذا خذ منها نص ساعة
موزة: ألو
سلطان: نعيمًا حبيبتي
موزة: الله ينعم عليك
سلطان: مافي سوالف ؟ شو يديدج ؟
موزة: ولا شي
سلطان بحنيّه: مزمزتي، تراج كاتمة فقلبج وأنا فاهمنج، أفا عليج بس لمتى بتخشين عني ضيقتج ؟ خليني أوقف وياج و أشل همج.. أنا ريلج حبيبج ليش تعديني غريب ؟
موزة بدت دموعها تطيح: لا حشى ما عدك غريب، لكن كيف أشكيلك من هم إنته عايش فيه ؟ ليش أزيدك ؟؟
سلطان: لا تحاتيني، أنا مابنكر انه جرح فقد أمي وأبوي للحين ما طاب، ولكن أنا موضوعي من سنين، قلبي صار قوي.. انتي فبداية المراحل ترى.. تحتايين اللي يوقف وياج ويسندج
موزة شهقت: خبرني كيف تخطيت ؟ أنا فكل مناسبة تذكرت أبوي، والله أتذكره فكل وقت سلطان.. مايفارق خيالي
سلطان: منو قال انج لازم تنسين وتتخطين ؟ هذا أبوج اللي رباج وتعب عليج.. مابتنسينه وحتى يوم بتعيلين بتطرينه وايد لعيالج.. مابيغيب ذكره عن لسانج.. لكن يا عيون سلطان هذا قضاء ربي وحكمه، واحنا علينا نتصبر، كل ماتذكرتيه افرشي سجادتج وادعي له، صدقيني مابينفعه غير الدعاء.. انتي ضروري تكونين قوية، عشان أمج، أمج حرمة عودة لا تنسين، بتيلس تحاتيج ويزيد همها، مايستوي تعذبينها وياج.. أنا أدري انه محد بيسد مكان أبوج لكن اعتبريني حبيبيج وريلج وأبوج وأخوج، اشكيلي دوم، لا تكلميني بس وقت الفرح والرخا
موزة تمسح دموعها: انته الدنيا كلها بعيوني، أنا بدونك ماعرف شو بسوي
سلطان: انزين حبيبي انا الحين عند باب بيتكم شرايج تنزلين
موزة بحدة: تسسستهبل ؟ انته شفت الوقت ؟ شو يايبنك عند بيتنا
سلطان: مالت عليج، قلت بقيس النبض شويه، ولو ييتج مابتستقبليني شو؟
موزة: لا طبعًا.. ياينا بأنصاف الليل حق شو
سلطان: ياخي بعد هالكلام الحلو المفروض أكون عندج.. أنا دنيتج كلها المفروض تلبين رغباتي
موزة تضحك: تحب تستغل الفرص، ماشي لقى أبدًا، العرس ماباقي عليه شي
سلطان: اصبري علي بسوي فيج النون ومايعلمون
موزة: الله أكبر عليك.. سلطان تراك تخوفني، دوووم تهدد، بغير وقت العرس وبيتأجل ترى
سلطان: ها اللي ناقص تأجلين العرس، أتريا متى بس هالكم يوووم يمرون على خير وتكوووونين عندي، متى بس بتستوين حرم سلطاااااان ؟
موزة: ماعليه حبيبي، هانت مابقى شي
سلطان: منو بيوديج مصلى العيد ؟
موزة: يمكن أسير ويا أختي ولا أخوي.. بشوف من يمرني أول
سلطان: عموه ماخلصت عدتها ؟
موزة: بعدها.. على الشهر الياي بتكون خلصت خلاص
سلطان: وقت العرس صح ؟
موزة: هيه
سلطان: زين الحمد لله
موزة بتردد: عادي اسألك سؤال ؟ بس لا تزعل مني.. واذا ماتبا تجاوب بعد عادي
سلطان: خذي راحتج ولا تحاتين
موزة: كيف تقضي العيد ؟ يعني وين تروح؟ انت تسيرلهم ولا هم ايونكم ؟ وكيف علاقتك بالأهل ؟
سلطان ابتسم: هذا سؤال يزعل الحين الله يهديج، شوفي حبيبتي بخصوص أهل أبوي التجمع عند عمتي الكبيرة، دايمًا على العشا تسوي ذبايح والكل يتيمع عندها ونتلاقى هناك.. بحكم انها أكبر وحدة فالعيلة وبحكم انها تسكن بعيد عننا فكلنا نسير هناك.. وبخصوص أهل أمي أنا ماعندي غير خالة وحدة وخال واحد، يسكنون حذال بعض، نمرهم على الصبح.. وبخصوص العلاقة الحمد لله كل شي تمام.. عانيت شوي من أهل أبوي كانو يبون يتدخلون فكل شي، وانا ماحبيت هالشي أبدًا.. فسويت حدود، وبخصوص أهل أمي خالتي لها معزة خاصة خصوصًا انها تشبه أمي وايد، ودايمًا حنونة علينا، عمرها ماضرتنا بشي، وخالي بعد علاقتنا وياه زينه لكن شوي بعاد عنه
موزة: شو سبب البعد ؟
سلطان: ولا شي، هو وحرمته طبيعتهم هاديين وبحالهم
موزة: أيوا
سلطان: يلا عن شو بعد بتسئلين ؟
موزة: لا خلاص
سلطان: أنا حافظنج ترى، اسئلي وماعليج ؟
موزة بارتباك: كيف تحملت المسؤولية بروحك ؟ ليش ماخليت حد يعاونك.. يعني مثلًا لبس البنات والتفصيل وهالأشيا.. انته ماعندك علم فيها.. وسلامة بعد كانت وايد صغيره حزتها، فكيف تصرفت ؟
سلطان: أول ماتوفو أمي وأبوي أنا كنت توني متوظف.. يعني فبداية حياتي.. و عاهدت نفسي إنه أخواني أمانه فرقبتي، وبتعلم كل شي عشانهم، كنت ألجأ دايمًا لخالتي، أتصل لها وماتقصر، وكانت تقول لي بييك البيت، وأنا ماطيع، وكانت تبا تشل سلامة عندها.. وبعد مارضيت، وديتها الحضانه لين مارجع من الدوام وأجابلها.. ريلج بدل حفايظ وسوا مرضعة، وكل شي تتخيلينه.. فالبداية كل شي عندي كان صعب، كنت منهار نفسيًا، سلاموه ياهل وميثة وحمدان بعمر حساس، يحتاجون تربية ورعاية.. لكن الحمد لله، رب العالمين يسر لي كل شي، ويوم قامو يكبرون المواضيع صارت أسهل بوايد
موزة: حبيبي انت، الله يجزيك خير عن كل شي مريت فيه، صدقني ربي بيعوضك.. واخوانك مابينسون معروفك
سلطان يتنهد: ونعم بالله.. عانيت وايد والله
موزة: كله بأجره حبيبي، ماعليك يوم بيي عندكم البيت بعاونك
سلطان: مايخصج فالبيت،، وقتج كله حقي أنا و بسسس
موزة: أناني
سلطان: صدقيني آخر واحد يفكر بنفسه أنا، تفكيري دايمًا مع غيري
موزة بحب: فديت عينك.. يا أطيب قلب
سلطان: اليوم لسانج يقطر عسل، راضيه علينا شعندج؟
موزة: ودومني راضية عليك.. أساسًا ماعرفت الرضا الا وياك
سلطان يصفر: عاششت الموز عاشت
موزة تضحك: يالبايخ، شوفيك متحمس ؟
سلطان: من متى حارمتني من صوتج وكلامج الحلو، شهالقانون الغبي بعد.. حق شو قريب العرس مايستوي الريال يتواصل مع حرمته ؟
موزة: عشان يشتاق
سلطان يتنهد: سنيييييين ونحن ذابحنا الشوق
موزة: سلطان يلا عاد.. لمتى بتتم تيبلي هالطاري ؟
سلطان: لين ما أموت، بخبر عيالج وأحفادج انج مشترطة علي نعرس ونحن اعمارنا ثلاثييين
موزة: سلطاني، بزعل منك
سلطان: عاد عند سلطاني نحن مانروم نقول شي، كله ولا زعلج ياعيون سلطاني وقلبه وروحه
موزة ابتسمت: الله يحفظلي سلطان بكل مافيه، شرايك أسكر ؟ اليوم سامحتك بالمكالمه، عقب مافي سماح، مفهوم ؟
سلطان: حاضر سيدي
موزة: مع السلامة
سلطان: بحفظ الرحمن
******************************************
صباح العيد، خلص راشد من صلاة العيد وتوجه مباشرة لبيت عمه، نزل من السياره وبايده باقة ورد كبيرة داخلها ظرف، فالحوي تلاقى ويا مايد اللي طالعه بنظرات خبيثة
