أبو مايد وأم مايد كلهم يالسين فالصالة.. ناقشو بنتهم عن موضوع الملجة
مايد: نواري أكيد ؟ نرد عليهم خلاص
نورة هزت راسها بحيا
مايد باس راسها: الله يتمم لج على خير أختي حبيبتي
نورة: آميين، عقبالك
التفتت على سارة: مافي كلمة مبروك ؟
سارة حضنتها بقوة: ماتخيل البيت بدونج
نورة: ياقلبي ساروه.. مارحت بعيد أنا.. أي وقت تبيني بتحصليني
سارة بامتعاض: هيه صح، من ياخذج رشود وين بنحصلج احنا ؟ لاصق فيج اربعه وعشرين ساعه
نورة: يلا عاد، شهالرمسة بالغتي
سارة: وانا الصادقه، انتو الحين مخطوبين والتلفون ماتهدينه.. كيف عاد عقب ؟
نورة تضحك: بنشوفج يوم بتعرسين شو بتسوين
سارة بثقة: عادي حبيبتي، بيكون وضعي وياه مكالمة وحدة باليوم مدتها نص ساعه بالكثير
نورة: هيييييييه خير ان شاء الله، بنشوف، بذكرج عقب بهالرمسة انزييين
سارة: ماعليه بيننا عقب
أم مايد بحنيّة: نواري تعالي عدالي بكلمج شوي
نورة: آمري يا الغالية
أم مايد: انتي عارفة انج داخلة على خطوة كبيرة، ومرحلة يديدة فحياتج، بتواجهين أشياء حلوة ومرة حالج من حال كل المتزوجين.. بس المهم بهذا كله انتي مقتنعة براشد ؟ راضية فيه كزوج تعيشين عمرج كله معاه ؟ يا امييه راشد والنعم فيه مايعيبه شي بس اعتقد انتي ادرى بأطباعه.. يا تغيرينه يا تتعايشين وياه.. لكن اذا عندج شك انج ما بتستحملينه بعدج فالبر
مايد بتأييد: نعم كلام أمي صح.. والنعم فيه بس شخصيته صعبه اذا بترومين تتأقلمين معاه
نورة بخوف: بلاكم تيمعتو عليه؟ تراكم يالسين تخوفوني.. راشد مب سيء لهالدرجة
أم مايد تتنهد: يا امييه محد قال انه سيء، لكن هذا الواقع احنا نكلمج باللي نشوفه، لاتمشين ورا قلبج حكمي عقلج واستخيري عدل وربي يكتب اللي فيه الخير.. لا تستعيلين على شي، ترى من حقج تمددين فترة الخطبة اذا تبين تتعرفين عليه أكثر
نورة تبتسم: استخرت ودعيت والحمد لله احس اني مرتاحة لكل شي أسويه
مايد: شوفي الحق ينقال، راشد من صغره يحبج وكلنا عارفين هالشي، وبعمري صراحة ماشفت حد يحب هالكثر، بس ها مب معناته انه الحب يغني عن كل شي، لا في أشياء وايد أهم.. التفاهم والتوافق بين الطرفين
نورة: لا تحاتون الأمور طيبة.. وانا متأكدة من قراري وان شاء الله مابندم على شي
أم مايد ومايد: ان شاء الله
أبو مايد يتنهد: والله وكبرتني يا نويّر وبتروحين عنا
نورة بوزت ولوت عليه: مالي غنى عنكم يالغالي، أنتو الخير والبركة
أبو مايد يلوي عليها: الله يهنيكم ويسعدكم ويألف مابينكم يا رب العالمين
***************************************
سلطان دق باب المكتب ودخل على موزة.. و ويهه منخطف لونه
موزة وقفت: بسم الله شفيك سلطان ؟
سلطان: عادي تيين وياي مدرسة ميثوه ؟
موزة: أكيد عادي، بس شو صاير ؟
سلطان بغيض: اللي صاير فضيحة وسواد ويه.. هالبنت مابترتاح الا لو خلتني أكسر راسها
موزة: استهدى بالله.. وفهمني شسالفه ؟
سلطان يتنهد: خلينا نستأذن ونطلع.. بالدرب بفهمج الموضوع
