في جهة ثانية.. عند المسبح.. سعيد يالس بروحه.. ويغني، وللمعلومية سعيد صوته فنان
البقا لله
يا مشاعر ياحنين
يا وله خمسة سنين
ما القوي الاك يالله
تبري جروحي وعله
تحيي شعورٍ غفى
احتريه وما صحى
طالبك يا شعور قله
والله اني احتريه
العمة شيخة تبتسم: الله على هالصوت
سعيد ردلها الابتسامة
العمة شيخة: وين وصلت بأفكارك ؟
سعيد تنهد: أفكر بحياتي اللي قضيتها وحيد.. وشكلي بقضي باقي عمري وحيد بعد
العمة شيخة تتنهد: أفا عليك يا سعيد، هذي حكمة ربك ولازم ترضى فيها
سعيد: الحمد لله على كل حال.. كان ودي يكون عندي أخ ولا أخت على الأقل.. شخص أشاركه وقتي وأكلمه بأي وقت بدون حدود ولا قيود.. ميود وحمود ما منهم قصور، فكل طلعة وفكل سفرة انا معاهم.. لكن الأخ غير عموه، والله غير
العمة شيخة: أنا فاهمة عليك، لكن هذا حال الدنيا.. مب كل شي نتمناه بنحصله، ثانيًا اللي فالماضي المفروض يبقى فالماضي وننساه صح ولا لا ؟
سعيد يغمض عينه بضيق ويلف ويهه الجهة الثانية: عموه دخيلج لا تفتحين الموضوع خلاص ارحموني
العمة شيخة تمسك ايده بحنان: الحب مب غلط ولا عيب، بس اذا الشخص مش مكتوب لنا نوقف حياتنا ؟
سعيد بحزن: عموه انا ماتكلم عن يوم ويومين.. انا حبيتها خمس سنين على التوالي، كانت الدنيا بعيوني، أول حب فحياتي، بنيت عليها أحلامي وسعادتي وكل شي.. وبغمضة عين كل شي راح!! راحت بغمضة عين عموه، مادري عذابي متى بيخلص.. مادري هل بقدر أتخطاها ؟ اللي حرق يوفي انه أول مولود لها سمته علي.. واللي يقهر أكثر انها راحت من ايدي لسبب جدًا تافه وغبي.. شو يعني البنت لولد عمها ؟ متى راح تندثر هالأفكار ؟ واذا البنت فقلبها حب تدفن الحب وتاخذ ولد عمها ولا ولد خالها ؟
العمة شيخة: كلامك كله صح.. هذي عادات مالها لزمة وتسبب دمار.. لكن يا حبيبي أرجع وأقولك انه كل شي بالأول والأخير قسمة ونصيب، مابتاخذ الا اللي مكتوب لك
سعيد: ونعم بالله
العمة شيخة تمسك ايده وتسحبه: يلا قوم، الكل يالس هناك وانته هنيه بروحك ليش
سعيد يضحك: انتي دايمًا تخربين جوي
العمة شيخة: اذا هذا جوك أكيد بخربه!!، كيف تباني اسكت وانا اشوفك يالس بروحك وشايل هموم الدنيا على راسك
سعيد: خلاص حبيبتي ماعليه بيي معاكم
*****************************************
يا وقت العشا
مايد بصوت عالي: عليكم بألف عافية، اذا في اي ملاحظات على الشوي نستقبلها
محمد: ونحتاج مكافأة على تعبنا صراحة
العمة موزة: فديت الشباب ماقصرتو يعطيكم العافية، من ناحية الهدايا كل حد بيحصل هدايا
مايد: كيف ؟
العمة موزة: عقب العشا بنلعب تهادو وتحابو كلنا.. الكبار والصغار والبنات والأولاد
مايد: ممتاز
سعيد يرفع ايده ويدعي: يا رب احصل هدية حلوة وغالية يا رب
أم سعيد تضحك: ويا هالويه، الهدايا مش بقيمتها، الهدية حلاتها لما تكون من شخص تعزه هذي قيمتها الحقيقية
سعيد: معلمات اللغة العربية ليش دايمًا فيلسوفات ؟
أم مايد: خس الله عدوك، لاتغلط على المعلمات
سعيد: عاد انتي اخصائية اجتماعية وماترضين على موظفاتج.. بس تراكم متقاعدات.. خلااص خلصت مهمتكم
أم مايد بثقة: متقاعدات صحيح، لكن خرجنا أجيال يُضرب فيهم المثل
سعيد يرفع حواجبه بطريقة عبيطة: نسكر الموضوع، اذا بديتو مدح احنا مابنخلص ترى.. عيايز شو بيسكتكم ؟
بو سعيد: يالهرم، انته لسانك دومه فالت ليش
الكل كان يبتسم ويضحك على سوالف سعيد واستهباله..
سُفرة الأكل كانت طويلة وعامرة بالأطباق.. الكل قعد وبدا ياكل
سارة: الفتوش وين ؟
حميد كانت عداله السلطة ومطنش.. كأنه مايسمع
مايد: عندنا صحن واحد بس صوب حميد
العمة شيخة: حميد ناول بنت خالك السلطة
حميد بدون مايلتفت لسارة: ان شاء الله
سارة انغاضت بس مابينت، تقول فخاطرها هذا بلاه ؟
خلصو من العشا.. لعبو لعبة تهادو وتحابو.. بعدها الكبار رجعو البيت.. وبدت سهرة البنات والشباب...
***************************************
الساعة 11:30 في الليل..
الكل ملتم فالصالة.. الشباب يلعبون سوني وبلييستيشن، عماتهم موزة وشيخة بجهة يسولفون بروحهم.. والبنات بجهة قاعدين
مايد: أحس بيوع، سويرة سيري المطبخ سويلنا اندومي، بتشوفين كيسة الاندومي بالسدة اللي عند الثلاجة
سارة: ان شاء الله
دخلت المطبخ وصادفت حميد
سارة: شو تدور حميد ؟
حميد بدون مايلتفت عليها: طاسة نسوي فيها الحب
سارة: انا اعرف وين بطلعلك
طلعت الطاسة وكانت بتغسلها..
حميد يسحبها عنها: تسلمين، انا بغسلها بروحي وبنشفها
سارة باستغراب: على راحتك
************************************
البنات كانو موزعين عليهم مهام التنظيف والترتيب.. كلهم جهزو الغرف للنوم وخلصو.. إلا آمنة كانت عليها غرفة الشباب.. وماخلصت
آمنة كانت ماخذة راحتها.. الشيلة على كتفها.. وشعرها مفتوح...تجهز اللحف والمخدات وهيه تغني بكل أنوثة
