سلطان بتوتر: ماريد أسبب لكم ازعاج ولا أثقل عليكم
موزة بزعل: أفا عليك بس، شو هالكلام حبيبي ؟ ترى انته مب بس نسيب العايلة، إنته صرت مننا وفينا، أهلك هم أهلي، دام ميثوه بخاطرها تتعرف على البنات أمانه لا تكسر بخاطرها
سلطان: عارف حبيبتي عارف، وأنا بعد أشوفكم عيلتي ومني وفيني، بس يعني انتي عارفه هذا تجمُع عائلي، شي خاص فيكم حق شو تييكم البيت.. أخاف ماتاخذون راحتكم وهيه وياكم
موزة بغنج: سلطاااااني
سلطان يتنهد: سلطاني ذاب وانصهر خلاص، بعد هالكلمة مابردج، ماروم أقول لا أصلًا
موزة تضحك: صدق انك خفيف
سلطان: ماخليتي فيني عقل
موزة: أتريا البنات اليوم اوكي، ولا تحاتيهم بحطهم فعيوني
سلطان: فديت عيونج
موزة ابتسمت: فدا، يلا حبيبي بسكر تامر ع حاية ؟
سلطان: سلامتج، استودعتج الله
********************************************
الحريم والبنات كلهم كانو موجودين بالصالة..
موزة: بنات، ميثة وسلامة خوات ريلي ما وصيكم عليهم، سولفو وياهم وطيحو الميانة
سارة بحماس: لا تحاتين عموه الموضوع عندي
موزة تبتسم: الله يستر، بس عاد لاتخورينها عند البنت وتاخذين راحتج زيادة عن اللزوم، أخافها تحرم تزورنا مرة ثانية
سارة بوّزت: عموووووه عاااااد شو هالرمسة
موزة: أمزح أمزح.. خذي راحتج وسوي اللي تبينه
أم محمد: وتراني عزمت أم خالد وبنتها.. لا تقصرون ويا البنت
آمنة: أم وإخت المرحوم خالد ؟
أم محمد: هيه
آمنة باستغراب: ليش عزمتيهم أمي ؟
أم محمد: بيننا وبينهم عشرة عمر أمون، صح ولدها توفى بس ما بنقطع علاقتنا فيهم، ان شاء الله بنبقى على تواصل وياهم وأخوج بعد أنا موصيتنه يزورهم بين فترة وفترة.. الناس للناس يا بنتي وربي يجبر قلبهم ويصبرهم
آمنة باقتناع: صح كلامج أمايه، آمين يا رب
*********************************************
سلطان اتصل: مواز، انا نزلت ميثوه الحين بتدخل
موزة: زين حبيبي ماعليه، بطلع لها عند الباب
سلطان: مشكورة حبيبتي، و....
موزة تقاطعه: أووووص ولا كلمة، مابيننا شكرًا وعفوًا، يلا أنا بسكر الحين بطلع لها
سكرت عنه بدون ما تسمع رده
موزة فتحت باب الصالة واستقبلت ميثة بابتسامة عريضة، بينما ميثة كانت تمشي و واضح عليها انها مستحية ومتوترة
ميثة تهمس: مَرت أخي، أحس إني هونت برد بيتنا خلاص
موزة ضحكت: ميثثوه ريلاكس و ادخلي يلا، وأضمن لج انج بتحبين البنات و بترابعينهم
سلمت ميثا على الكل، ويلست عند سارة وعاشة، بعد الكلام المُعتاد والترحيب والسؤال عن الحال، بدت سارة تحاول تسولف معاها
سارة: وعلومج يا مييثة ؟
ميثة ابتسمت: تسرج علومي، سارة عادي تعرفيني على الموجودين ؟
سارة: حاضرين، بنبدا من اليمين تمام ؟
ميثة: تمام
سارة تأشر: هذيل حريم عمي، أم محمد وأم سعيد، وأم مايد اللي هيه أمي أنا، والأخيرة عمتي شيخة أم التوأم حمد وحميد
ميثة: والبنتين اللي معتزلات ع صوب ؟
سارة: اللي على اليمين أختي نوار، مالجة على ولد عمي، واللي على اليسار أمون أخت عواش.. هذيل اربعه وعشرين ساعه مع بعض.. يعني باختصار حياتهم كلها مع بعض ونفس الكلام عندي أنا وعواش بحكم اننا بنفس السن
ميثة: الله يحفظكم لبعض
