سارة باستهزاء: هيه صح.. واضح من تصرفاتك والموقف البايخ اللي صار، أول موقف يصيرلنا وانته ما شاء الله سيدة صدقت وأول واحد وقف ضدي
حميد بانفعال: وبعديييين يعني ؟؟؟ سارة أنا أحبج، يا غبببببيييية أحبج، أنا ماشكيت فيج، أنا غرت علييج، مابا حد يقرب صوبج ويكون حولج وحواليج غيري أنا, أنا وبس
سارة انفجعت، تمت تطالعه بصدمة... شو هالاعتراف المفاجئ؟ شو هالقنبلة اللي عقها فويهها ؟
حميد يتنهد: مااااكنت برمس، انتي حديتيني، انا من متى منطب وساكت عشان تكونين على طبيعتج وياي وتاخذين راحتج... عشان تبقين قريبة، بس بعد اللي قلته اظن بتصير حدود وحواجز بيننا، صح ؟؟
سارة بلعت ريقها ونزلت راسها
حميد يبتسم: رضيتي الحين؟ جوابي يسد ؟
سارة تصد الجهة الثانية وبصوت يرجف: وأنا بعد أحبك
تنح فيها حميد.. مصدوم من سرعة الرد.. أبدًا ماتوقع تكون بهالصراحة والشفافية... توقع انها بتكابر وماتعبره!! أما هيه ابتسمت بحيا وطلعت على طول
حميد يهمس: خس الله عدوها، يعني طول هالفترة تمثل اني شرات أخوها والحين فجأة أحبك ؟ والله هذي مب صاحية ولوتيّة عودة
*****************************************
راشد يكلم نورة بالواتساب
راشد: ها نوار؟ اكلم عموه شيخه، نملج قبل رمضان ؟
نورة فاتحة محادثته.. اونلاين وقرت كلامه لكن ماردت
راشد: نواري، على ضمانتي مابتندمين لو وافقتي، والله أنا بساعدج وبسويلج كل شي ومشاوريج بقضيها معاج.. مابتنضغطين، وياج خطوة بخطوة.. وحتى دراستج مابتتأثر ترى
نورة: مشكلتي فالحياة ماقدر أردلك طلب.. تمام كلم عموه
راشد: فدييييييت قلبج
نورة: جب لاتساحلني بالرمسة.. لسانك ينقط عسل يوم تحصل اللي تباه
راشد: مافيني صبر.. اخاف املج واقولج يالله نعرس بعدها بيومين
نورة: والله ياويييييلك ويا سواد ليلك.. ماشي عرس لين ماتخرج، خلني ارتاح رشود لاتصدمني تبا كل شي ورا بعض، لا تعيلني وتخبل فيني
راشد: لاتحاتين حبيبي امزح وياج.. العرس عقب التخرج ماعليج
نورة: ان شاء الله
*****************************************
راشد بند تلفونه وراح عند عمته، همس لها: عموه ممكن اكلمج شوي
قامت العمة وراحو على طرف بعيد شوي
العمة شيخة: ها رشود قول اللي عندك
راشد بابتسامة عريضة: ناوي أملج قبل رمضان
العمة شيخة تضحك: شو استوى ؟
راشد: ولا شي بس انا مستعيل
العمة شيخة: رشوووود ؟ لايكون ضغطت ع البنت ؟ شكلك كلت فوادها من الحنّه
راشد: لا والله عموه.. انا ماييت اكلمج الا بعد ماخذت الموافقة من نوروه
العمة شيخة: كلمت اهلك ولا بعدك ؟
راشد: صراحة متلوم
العمة شيخة باستغراب: ليش ؟
راشد بارتباك: يدي توه متوفي، أخاف أفاتح أبوي بالموضوع يزعل ولا يحز بخاطره.. انتي شرايج بالوقت عموه زين ؟ ولا نأجل ؟
العمة شيخة لمعت عينها: يدك الله يرحمه أكثر واحد استانس يوم خطبت، وناسته ماتنوصف وهوه يشوف أحفاده بيعرسون، ولا بعد اللي ونسه أكثر انك بتاخذ بنت عمك مب من برع العيلة.. لكن ربك ماكتب يلحق على عرسكم ويشوف عيالكم
راشد يبوس راسها: الله يرحمه ويغفرله يا رب
العمة شيخة بحنان: لا تحاتي أهلك.. الموضوع عندي.. بس عاد لازم أرمس نوروه قبل بسألها عن كمٍ شي عقب برمس أهلك
راشد قام: مشكورة عموه ماتقصرين
العمة شيخة: العفو حبيبي.. خل نوروه تيي صوبي
راشد: تمام
كتب راشد لنوره تروح عند عمتهم وراحت لها
