يوم اليمعة، في الحوي تحديدًا، الكل متواجد وعندهم هداياهم.. لأنه يوم الاعتراف وتسليم الهدايا، وكانو يالسين على شكل دويرة
العمة موزة: يلا بسم الله نبدأ ويا مايد، وعقب الدور بيمشي على اللي بعده
مايد يمد الكيس لسعيد: تفضل
سعيد بصدمة: قلم كارتييير اللي كان بخاطري ؟
مايد يبتسم: ماخليتها بخاطرك
سعيد يمسك ويهه ويبوس خده بقوة: فديييييتك والله
مايد يمسح خده: الله يقرفك، لا تبوسني كأني حرمتك
سعيد يضحك: احمد ربك انك حصلت بوسة مني
سارة تعطي الكيس لحميد: وهذا عطرك المفضل
حميد: تسلمييين بنت خالي، بس شعرفج انه عطري المفضل ؟
سارة تبتسم: اخوك حمد ماقصر، سألته وجاوبني
نورة تمد ظرف لعمتها موزة وتحضنها: بما انج عروس وقربت ملجتج، قررت اخذلج جلسات عناية من الصالون اللي تحبينه
العمة موزة تردلها الحضن: يا فاهمني انته، أحلى هدية
سعيد يمد كيسة الذهب لعمته شيخة: وأنا الغلا كله يبتلها ذهب على ذوقي، يا رب انه يعيبج عاد
العمة شيخة: حبيبي انته، اي شي منك أكيد انه حلو
محمد يمد الكيس لأبوه ويبوس راسه: سامحنا ع القصور الوالد، تستاهل أكثر
ابو محمد: ما منك قصور يا وليدي تسلم
راشد باحراج يمد الكيسة لنورة: تفضلي
العمة موزة بفضول: شو يايبلها ؟
راشد يضحك: فضولج ماله حل عموه، يبتلها الشموع اللي تحبها
نورة تبتسمله: مشكور
آمنة تمد الكيس لأمها وتحضنها: وأنا طلعتلي ست الحبايب، يبتلها البخور ودهن العود اللي تحبه
أم محمد: تسلميلي بنيتي
عاشة تمد الكيس لعمها بو سعيد وتبوس راسه: بما انك قارئ نهم مثلي، يبتلك كتاب على ذوقي
ابو سعيد يبتسم: مشكورة بنيتي
حميد يمد الكيس لخاله أبو مايد: تفضل خالي، يبتلك ساعة على ذوقي
أبو مايد: مشكور يا حميد لا خلا ولا عدم
حمد يمد الكيس لمايد: يبتلك علاقة سيارة، عاد اسمحلي ماعرفت شو ايب وانتبهت على سيارتك بدون شي
مايد يبتسم له: بالعكس هدية حلوة، ماقصرت حمد
العمة موزة تمد الكيس لراشد: وانا تتوقع شو يبتلك ؟
راشد: عطر ؟
العمة موزة: لا، يبتلك بشت، صح توه الناس معرسنا بس عاد انا متحمسة
راشد يبتسم: تسلمين يالغالية
العمة شيخة تمد الكيس لحمد: وانا ولدي حبيبي طلع لي، يبتلك ديوان شعر كان خاطرك فيه
حمد: مشكورة أمييه
أبو مايد يمد الكيس لعاشة: وانا طلعتلي بنت اخوي عواشه، عاد يابنيتي انا ماعرف بسوالف البنات وذوقهم لكن أدريبج تحبين الكتب.. خليت سويره تساعدني ويبتلج روايتين
عاشة بحب: ولا يهمك عمي، كل شي منك حلو
أم مايد تمد الكيس لسارة: وانا طلعتلي بنتي سويرة الحلوة، بما انج فارسة وتحبين الخيول، طلبتلج من الموقع اللي تتعاملين معاه دوم ملابس للنادي
سارة تحضن امها بقوة: فديييتج يا أحلى أم
أم محمد تمد الكيس لمحمد: وانا يا ولدي يبتلك عطوراتك المفضلة
محمد: فديتج تسلمين
أبو محمد يمد الكيس لأم مايد: وأنا طلعتلي مرت أخوي أم مايد، عاد وخيتج أم محمد انقذتني، كل شي فالكيس من ذوقها
أم مايد: ماقصرت يابو مايد تسلم
أبو سعيد يحضن أم سعيد: وانا طلعتلي أغلى وأعز زوجة في الوجود
أم سعيد باحراج وتهمس: مب جدام الخلق انزييين
سعيد يصفر: اللي مايبا يعرس بيعرس وهو يشوف هالرومانسية والحنان حتى وهم بهالعمر
أبو سعيد يرفع حاجبه: بلاه عمرنا ان شاء الله ؟ شو تشوفنا شياب
سعيد: أفا عليك الوالد، انته فبداية الخمسين، يعني توك فبداية حياتك ولا يهمك
أبو سعيد: جب عن هالهذرة الزايدة، الشباب شباب القلب والروح.. ولا الجسد مصيره التراب
سعيد: ماعلينا، الحين شو الهدييية ؟
أبو سعيد: خاتم ألماس
سعيد: يا سلام عليك
أم سعيد: وانا طلعتلي أمونه، عاد يا أميه مب أنا اللي منقية الأغراض وحدي، سعيد ناشب فبلعومي، أقوله سوالف بنات شعرفك فيها.. الا ويختار وياي.. ان شاء الله يعيبج ذوقنا عاد
بهاللحظة، محمد والعمة شيخة يطالعون سعيد بنظرات خبيثة، ومحمد كاتم ضحكته..
سعيد يحاول يبعد الاحراج عنه: اميه السموحة يعني، بس انتي ذوقج تعبان، لازم يصير تدخل سريع مني
آمنة: لا تغلط على مرت عمي لو سمحت، أي شي منها اكيد انه حلو، مشكورة حبيبتي ماقصرتي
أم سعيد تبتسلمها: العفو عيوني
العمة موزة: طبعًا خلصنا من العشا، وخلصنا من توزيع الهدايا، الحين نحتاج طرب
سعيد: كم تدفعون ؟
العمة موزة: عندي صفعه جان تبا
سعيد يضحك: انزين مب يايب العود وياي اليوم
حميد: مب لازم، بس غنيلنا
سعيد: شو تبون انزين ؟
حميد: ألمح له
سعيد: شهالمود اللي عندك حميد
حميد يضحك: ليش يعني بلاها الاغنية ؟
سعيد: مش ذوقي هالأغاني، بس عشان خاطرك بنغنيها، يلا شغل اللحن على الاقل لأني مابغنيها بدون شي
حميد يفتح تلفونه: ثواني
