الممر مزحوم، الكل متواجد في المستشفى ماعدا أم محمد يلست مع اليدة في البيت، واضح عليهم التوتر والترقب
دخل سلطان وكان متجاهل وجود الكل، توجه لموزة وحضنها
موزة شهقت بحضنه وحاوطت ايدها على ظهره
سلطان يمسح على ظهرها ويهمس: بس حبيبتي بس، اهدي شوي واذكري الله
موزة بعدت عنه ومسحت دموعها: منو خبرك ؟
سلطان: سعيد
موزة: ادعيله سلطان، أنا مالي حياة بدون أبوي، ماقدر أعيش بدونه
سلطان يرص على ايدها: الحمد لله على كل حال، ان شاء الله خير حبيبتي
ابو محمد وابو مايد وابو سعيد، الاخوان الثلاثه.. أعصابهم تلفانة وكمية الخوف اللي فقلبهم محد حاس فيها، لكنهم مخبيين مشاعرهم ومتماسكين، ومظهرهم يبين عكس اللي بداخلهم.. مظهرهم يبين انهم أقوياء وصامدين
بعد ساعة، طلع الدكتور والتمو الاخوان حواليه
ابو سعيد بخوف: طمننا يا دكتور
الدكتور يتنهد: الوالد تعرض لسكتة قلبية، أنعشناه الحمد لله، لكن الأكسجين نقص عنده وايد فا....
ابو مايد يقاطعه بقلة صبر: وبعدين ؟؟
الدكتور: الوالد دخل فغيبوبة وحالته حرجة، دعواتكم له يا اخواني
ابو محمد دارت فيه الدنيا، واستند على اليدار: أبوي بيعيش يا دكتور ولا لا ؟
الدكتور بحزن: دعواتكم، الله قادر على كل شي، واذا في حد مب شايفنه من فترة الأفضل تبلغوه عشان يزوره
ابو مايد ساعد اخوه وخلاه يقعد على الكرسي: اذكر الله يا اخوي
ابو محمد يدمع: أبوي يودع، قلبي مب متطمن من طيحته هالمرة، قلبي ناغزني ياخوي ناغزني
ابو مايد: ماعليه احنا لازم نقوي عمارنا، الحريم شو بيستويبهم اذا شافونا ؟ قوي قلبك ياخوي والله كريم
راح ابو سعيد جهة الحريم
العمة شيخة بلهفة: طمنني يا اخوي
ابو سعيد بملامح جامدة: دعواتكم
العمة شيخة بعصبية: كلمني عن حالة ابوي، اشرحلي، فهمني ابوي شوفييييه ؟ شو هالبرود
ابو سعيد حضنها ومانطق بحرف، العمة شيخة رجفت بحضنه، وفهمت الوضع بدون شرح!! بعدت عن حضن اخوها وراحت لأخوها بو محمد مسكت ايده
العمة شيخة ترص على ايده: لا تخبي علي، ابوي حالته صعبة، ولازم نكون معاه كلنا ونسلم عليه صح ؟
ابو محمد هز راسه ونظرة أسى في عيونه
العمة شيخة راحت للبنات والشباب: دعواتكم ليدكم بنات، ادعوله فكل سجدة، وتصدقو عنه.. وشباب عليكم بسقيا الماء، وانتو طالعين من البيت شلو كراتين ماي وزعوها فالمسايد أو على العمال.. لا تقصرون فشي سوو كل اللي عليكم
العمة موزة تطالع اختها بنظرات مرعوبة.. يا رب مش اللي فبالي، يا رب لااا... انا اعرف اختي، هالويه أعرفه... هالملامح حافظتنها... هذا الويه نفسه شفته بوفاة ريلها.. من صدمتها ماتعبر ولا تطلع حزنها.. والواحد مايعرف شو اللي فقلبها بالضبط.. يا رب لا تفجعني يا رب
ابو محمد راح صوبهم: بنات وشباب، ادخلو سلمو على يدكم
سارة بخوف: ليش ؟ يعني اقصد يدي مافيه شي، بيطلعونه بغرفة عادية وبنشوفه صح ؟
ابو محمد: بنيتي يدج فالعناية المركزة ودخل فغيبوبة
العمة موزة بصدمة: ابوي بغيبوبة!!!! بيصحى منها ولا لا ؟
ابو محمد: العلم عند رب العالمين، ادخلي عند ابوي موزة، وعقب البنات بيدخلون وبترجعون البيت
العمة موزة تصيح: انا مابرجع البيت، بيلس عند أبوي اليوم كله
ابو محمد بضيق: يا موزة لا تتعبيني فوق التعب اللي احسه، امي ترى في البيت مع حرمتي بروحهم، بيحاتونكم.. ارجعو يلستكم هنيه ما منها فايدة ترى
سلطان يطمنها: انا بدخل وياج موزة، يلا تعالي
