بعد مرور إسبوعين :
العايلة كلها متيمعة في مزرعة حاجزينها، متعودين كل صيف يحجزون مزرعة عشان المسبح والألعاب المائية، وآخر شي يكملونها مبيت
على العصر الكل يالس صوب الفوالة، بحركة سريعة من سارة سحبت الكلنكس وحطته على خشمها
اليدة: لا إله إلا الله..شو تآنسين يا أميه ؟؟ يا بنت نشفتي، خلص دمج، لمتى بترعفين ؟؟؟؟ شوفيلج حل.. سيري الدختر
العمة موزة: أمايه هذا ماله علاج، البنت مسوية كَيّ كم مرة.. هالنزيف مرات من البرد والحر أو نفسيًا
اليدة باستغراب: الصيف من متى داخل علينا.. والبنت من متى ترعف، وبعدين بلاها نفسيتج ؟ حبيبتي ما عليج من حد.. بنفادهم اللي مزعلينج.. لا تعورين راسج فيهم
- من قالت اليدة بنفادهم مايد بطل عينه ع وسعها أما سارة ضحكت -
سارة: لا تدعين عليهم يدوه.. برايهم.. قولي الله يسامحهم ويهديهم
اليدة رفعت عصاها: بمرغج مراغ بهالعصا، وانتي كل من هب ودب بتخلينه يضيق بج ؟
سارة ابتسمت: الله كريم يدوه.. ما باليد حيله
مايد قام: أنا بسير أجيك على المسبح والمضخات.. محد يطب فالمسبح لين ماخبركم
اليدة: شو ها بعد مضخات، الا هو مسبح يا ولدي شو بتطالع فيه ؟
مايد: فديتج يدوه المسابح فيها شرات فتحات التصريف، تبدل الماي يعني شرات الفلتر لكن شوي غير، لو كانت خربانه ولا قوية زيادة عن اللزوم، ممكن تمسك فريل حد لا سمح الله ويتأذى أو يغرق.. أنا صاحب المزرعة خبرني انه كل شي تمام.. لكن ماعليه للاحتياط انا بجيك أحسن
اليدة: زين فديتك يزاك الله خير
راح مايد للمسبح يتأكد من كل شي، بعدها بمدة قامت سارة وراحت له
سارة حضنته، بصوت مغبون: والله ما بخوووز عنك، مابهدك لين ماترضى، خلاص عاد مايد، ارحمننننيي
مايد بادلها الحضن، مجرد مسح على ظهرها انفجرت صياح
مايد بصدمة: يا الله يا سويرة، لا تباغميين خلاص, لهالدرجة زعلي مأثر فيج ؟
سارة بصدق: أخوي العود، ليش ما بتأثر ؟ مايهون علي كل ماشفت ويهي صديت، ما تكلمني، ولا تسولف، و الله أعلم شو النظرة الخايسة اللي حاطنها فبالك عني
مايد بانفعال: محشومة، احنا مربيينج أحسن تربية، الواحد مرات تاخذه المشاعر لدرب ثاني.. لكنني واثق فيج
سارة تطالعه بنظرات مكسورة: عيل ليش قلت لي انه الثقة انعدمت ؟
مايد: ماعليه لحظة غضب سامحيني عليها
مسك ايدها: تعالي نيلس ع الكراسي، وخبريني كل شي، بالتفصيل المُمل وبالحرف الواحد بدوون أي نقصان
طالعت فيه سارة بنظرة ارتباك وخوف
مايد يحاول يطمنها: أوعدج مابيصير الا الخير، انتي بس ارمسي وفهميني كل شي يخصج انتي وحميد.. وشو اللي صار بالضبط
سارة: تمام
