يوم الأحد.. الساعة 5 العصر تحديدًا
نورة تبوس راس أمها وأبوها وتسلم عليهم
مايد: منو بيوديكم العين محمد ولا راشد ؟
نورة: راشد
مايد: زين عيل بطلع اسلم عليه، شنطتج وين ؟
نورة: بتطلعها الخدامة الحين
مايد: انا بشلها ماعليه
مايد يخاشم راشد: حي الله ولد العم
راشد: الله يحييك
مايد: ياخي كل مرة انته توصلهم.. خلها المرة الياية علي
راشد: ولا يهمك ميود.. أنته ومحمد ظروف دوامكم مختلفة عني، أنا أموري طيبة
مايد: يعطيك العافية ماتقصر
راشد ابتسم: الله يعافييك
مايد باس خد نورة وحضنها: مع السلامة، انتبهي على نفسج
نورة تردله الحضن: ان شاء الله
تحركت السيارة.. مرت نص ساعة من الهدوء التام..نورة كانت ساكتة ماتكلمت نهائيًا... راشد كل شويه يرفع راسه ويشوفها من المنظرة الأمامية
كتب لها بالواتساب: ليش ويهج مصفر ؟ مريضة ؟
نورة: بطني يعورني
راشد: شو السبب ؟
نورة حست بإحراج وتوهقت.. يا ربيه أنا كيف أفهمه الحين؟ مرت خمس دقايق ونورة ماردت عليه!!
راشد كتب لها: وقتها من الشهر ؟
نورة: هيه
راشد: الله يخفف عنج حبيبتي
نورة: آمين
بعد عشر دقايق وقف راشد عند الشيشة
راشد: أنا بيب لكم هوت شوكلت تبون شي ثاني ؟
آمنة ونورة: لا
بعد مانزل راشد قالت آمنة: سبحان الله الهوت شوكلت يا فوقته، دافي وبيخفف عنج الألم
نورة: خذت مسكن ومافي فايدة.. ان شاء الله الكاكاو يفيد شوي
ركب راشد السيارة وعطاهم الأكواب
ابتسمت له نورة ابتسامة دافية.. وقالت فخاطرها الله لايحرمني من حبه ويحنن قلبه علي دايمًا يا رب
ردلها راشد الابتسامة.. وقلبه ذايب من نظرتها وبسمتها
****************************************
في جهة ثانية..سارة تتصل لعاشه
سارة: نسير الاسطبل اليوم ؟
عاشة: متعايزة
سارة: خلي عنج الكسل وقومي
عاشة: اعتبريني مرافق لأني مابركب
سارة: عادي عواش المهم تيين وياي، ميود بيودينا خلج جاهزة بعد عشر دقايق
عاشة: تمام
****************************************
في اسطبل الخيول تحديدًا..
سارة: مزاج اليوم يبا صقر
عاشه بصدمة: ساروه مابتسيطرين عليه، استهدي بالله.. هذا من أصعب الخيول!!
سارة بتحدي: عادي، الواحد يجرب شو المشكلة
عاشه: ساروه عن الينان عن يستويبج شي
سارة: مابيصير شي ماعليج.. انتي بس راقبي الوضع، وتعالي صوب الحواجز
عاشة بطلت عينها بوسعها: سااااااااااارة!!!!! لا بالله تخبلتي... ماخذتلي خيل ولا مرة ركبتيه ومن أصعب الخيول وبعدين تبين قفز حواجز، انتي صاحية ؟
سارة بعدم اهتمام: ياخي ليش تكبرين المواضيع؟.. مابيستوي شي
عاشة بيأس: بكيفج ساروه.. والله يستر، انا بيلس ع الكرسي براقب الاوضاع ازقريني لو بغيتي شي
سارة تطرشلها بوسه بالهوا وراحت ركض للخيل..
فالبداية كانت الأمور طيبة عند سارة.. فجأة حست انها ماتقدر تسيطر ع الخيل.. ارتفع الخيل بطريقة عنيفة ومفاجئة.. سارة من صدمتها ماقدرت تمسك العنان وطاحت بقوة على ظهرها..
حميد كان موجود فالجهة الخلفية شاف الموقف لكن مايعرف البنية منو.. راح لها ركض
حميد واقف عند البنية وهيه مغطية ويهها
حميد بتوتر: لو سمحتي اختي تحتاجين اساعدج ؟
سارة خوزت ايدها عن وييها وابتسمت له بابتسامة غبية
حميد بصدمة: ساااااروه!!!
سارة تتألم: عواش وين ازقرها تساعدني
حميد يدور بعينه: عواش محد شكلها راحت الكوفي داخل.. ماعليه انا بساعدج
حميد مسك ايدها ورفعها بهداوة
سارة يات بتوقف لكنها صرخت
حميد بخوف: شوفييييج ؟
سارة تغمض عيونها من الألم: جسمي كله شاد علي.. مش قادرة أوقف
حميد: مافي حل غير أني اشلج
قرب منها حميد ورفعها بكل رقة
حميد ونبضات قلبه تزيد: يودي رقبتي زين
حاوطت ايدها على رقبته وهيه ميتة من الاحراج
نزلها حميد على أقرب كرسي.. واتصل بعواش..
يات عواش ركض وهيه تلهث: نوديج المستشفى؟؟؟؟
سارة: لا مايحتاج الألم أحسه يخف مع الوقت
عاشه: انا قلتلج ماتركبيين صقر شو استفدتي الحين ؟
حميد بعصبية: سارة مايعنادون بهالأمور... هالمرة عدى الموضوع بسلام وكانت بسيطة.. المرة الياية عادي تتكسر ضلوعج
سارة: لاتعورون راسي بهالنصايح.. خلاص انتهى الموضوع وصار اللي صار
حميد بعصبية أكبر وصوته بدا يعلى: هذا اللي ربي قدرج عليه ؟ مانعور راسج ؟ انتي مستوعبة اللي صار ولا لا ؟ ترى الاصابات ممكن تكون خطيرة لا تستهينين بهالمواضيع
سارة بنظرة تحدي: وبصفتك شو مشتط علي وتصارخ ؟
حميد رفع حواجبه: بصفتي شو ؟؟؟؟؟ ليش انتي شو تعتبريني ؟
سارة باستهزاء: أعتبرك ولا شي.. ولو سمحت مرة ثانيه لا يعلى صوتك علي لأني ماحب هالأسلوب
حميد غمض عينه من الغيض.. وتنهد بقوة عشان يمسك أعصابه... وقام عنهم
عاشة بصدمة: حرام عليج!! ماكان له داعي اللي قلتيه أبدًا
سارة: لا يفرد عضلاته علي.. أونه معصب ويعلي صوته ليش ان شاء الله؟
عاشة: انتي غبية ؟ ولد عمتج وكان خايف عليج مايبالها تفسير
سارة: مب محتاجة حد يخاف علي
عاشة بيأس: استغفر الله العلي العظيم.. انتي الكلام معاج ضايع.. اتصلي لمايد خل نروح.. وانا بيي معاج البيت بدهن ظهرج بمرهم عضلات
**********************************
ركب حميد السيارة راجع للبيت وقلبه محترق من كلمة سارة
الحين أنا ولا شي ؟
من تطلب شي أول واحد يلبي لها.. أتعمد أفتح معاها مواضيع ونقاشات.. أعزز لها وأشجعها دوم...كيف هان عليها ترمي الكلام ؟
ماعليه يا سارة.. ماكون حميد لو ماطلعت هالكلمتين من عيونج
