الصبح، الكل كان متيمع فبيت اليدة، لأنهم يايبيين حنايات حق عرس موزة
العمة موزة بضيق: قلتلكم مابا حنا، كيف يعني تحجزون حنايات وتحطوني بالأمر الواقع !
العمة شيخة: شقايل بعد ما تتحنين بعرسج ؟
أم محمد: فديتج موزان، هذي ليلة العمر، وانتي امبونج تموتين بشي اسمه حنا، لو ماتدانين الحنا بنقول
العمة موزة بألم: بس أنا مالي خاطر و .........
العمة شيخة تقاطعها: الحزن بالقلب، أبوي تقريبًا بيمر على وفاته خمس شهور، ولو تمر ستين سنة ذكراه فالبال والقلب بيحن له دوم، عرس وسويتي فالبيت، وبتكون حفلة بسيطة واحترمنا رغبتج، خلاص تعدلي وتزيني حق ريلج المسكين، افرحي وفرحيه معاج
العمة موزة تتنهد: ان شاء الله
رن تلفون نورة، وردت عليه
نورة تهمس: هلا حبيبي
راشد: ماصورتيلي الحنا ؟
نورة: بعدي ما تحنيت
راشد: انزين من تخلصين صوري ايدج
نورة بحيا: أوكي
العمة شيخة بصوت عالي: العاشق الولهان، ماتروم تصبر شويه ؟
راشد يضحك: عطيني برمسها
مدت نورة التلفون لعمتها
العمة شيخة: شوفيك حاشر حرمتك ؟
راشد بصراحة: ودي أشوف الحنا
العمة شيخة: بعدها مابدت أصلًا.. أعطيك شورٍ زين ؟ عقب ماتخلص تعال شلها، حوطو وطالع حناها
راشد بامتنان: الله عليج، ليت كل الناس مثلج وشرواج، هاه بتخبرين أمها ولا أدق أستأذن؟
العمة شيخة تبتسم: مرخوص انته وياها، سيرو برايكم أنا بخبر أم مايد
أم مايد عقدت حاجبها: شو بتخبريني بعد
العمة شيخة: نسيبج بيشل بنتج.. بياخذون لفة وبيرجعها
أم مايد بعصبية خفيفة: انتووو مابسكم من الهوامة ؟؟؟؟ عقب العرس سيرو وين ماتبون، ماخذين راحتكم أشووووف
راشد: شت شت عصبت.. عموه الترتيب عندج ضبطيني دخيلج
العمة شيخة: يا أم مايد هالجيل ترى غير عننا، هالطلعات مُش ولا بد منها، مب نحن خلف الله علينا، نيلس فالميلس والقبيلة كلها يالسة ويانا، كأنه الريال بيشلني وبيشرد
أم مايد: عاد نحن هذا سلكنا، وأشوفه هذا الصح دامهم مالجين بس يعني الحدود مطلوبة !، وأبوها امّره مخلنها عهواها هيه و ولد عمها، مايطلبون شي إلا وقال تم
العمة شيخة: صدقه أخوي، الزمن تغير، خلهم ياخذون راحتهم ويعيشون حياتهم، وبعدين هذيل عيال عم، يعني نورة ماعليها خوف ويا راشد ولا انتي شرايج ؟ شايفة عليه شي ؟
أم مايد بانفعال: لا حشى، والنعم فيه، مأمنة على بنتي وياه و واثقة فيه
العمة شيخة تأشر بمزاح: هذييه أمه، الحين بتغضب عليج لأنج ترمسين عن ولدها
أم مايد تلتفت على أم محمد: يا وخيتي لايكون شليتي فخاطرج علي ؟ والله إني ماقصد
أم محمد تبتسم: أفا عليج الولد ولدكم، عيالنا متربيين مع بعض، بالعكس إن بِدَر منه شي مايرضيكم.. عليكم فيه استلموه أنا ماعندي مانع
راشد: ماشي تفاهم سيدة باعتني الوالدة
العمة شيخة: من تخلص نوروه تعال شلها، وعن الحشرة، لا تيلس تدقدق كل شوي
راشد: حتى فحرمتي مناشبيني ؟؟؟
العمة شيخة: الله يعين نوروه عليك، مُزعج
راشد: صدقيني عسل على قلبها
العمة شيخة تضحك: اوكي ياطيور الحب انتو.. يلا مع السلامة
وسكرت المكالمة على طول
