في يوم الخميس تحديدًا
الصبح الساعة 10:00
راشد يكلم نورة بالواتساب
راشد: يا عيون راشد.. تبين تختارين الدبلة ؟ ولا أختارها أنا ؟
نورة: انته اختارها
راشد: اخاف مايعيبج ذوقي ولا ذوق خواتي
نورة: اي شي منك حلو يا قلب نورة
راشد: فديت عينج، وأخيرا سمعت منج كلمة حلوة! ماعلينا الورد طبعًا أحمر مثل ماتحبينه صح ؟
نورة: أكيد
راشد: اتريا باجر بأحر من الجمر.. حبنا وأخيرًا بيصير على العلن
نورة بحب: اللهم لك الحمد
******************************************
يوم اليمعة، يوم الخطبة، الكل كان مربوش ويساعد.. أمون وعواش عند نورة فغرفتها يساعدونها تتجهز.. أما سارة كانت مخلصة أمورها من وقت وتساعد أمها وترتب معاها.. بخصوص الخطبة المعازيم هم الأهل والناس المقربة بس.. يعني حفلة خطوبة بسيطة
أم مايد: سويرة حبيبتي سيري ميلس الرياييل، دخنيه قبل مايوون
سارة: ان شاء الله
راحت سارة.. رتبت الميلس ع السريع.. وقامت تمشي فيه بكل الجهات تبخره
حميد كان شال صينية كاكاو كبيرة بايده.. رفس الباب بقوة عشان يدخل.. سارة انتفضت بقوة وكان الفحم على وشك يطيح على ايدها وتحترق
حميد بخوف: انتبهييييي
سارة من الصدمة بس واقفة وتطالعه..
حميد: اسمحيلي ماكنت ادري انه في حد هنيه.. الصينية ثقيلة عشان جيه رفست الباب بقوة ماقصد
سارة ابتسمت: حصل خير
حميد يطالع المدخن اللي بايدها: المرة الياية استخدمي المدخن اللي فيه غطا احسنلج، توه الفحم كان بيطيح على ايدج وتروحين فيها.. اسمحيلي مرة ثانية
سارة: ولا يهمك الأمور طيبة
حميد وقف لثواني يتأملها.. كانت لابسة مغربية فخمة لونها اسود.. والمكياج كان جريء، سموكي اسود ولون الروج أحمر صارخ، وشعرها مفتوح ويغطي ظهرها بالكامل.. باختصار شكلها كان مُلفت وفخم
سارة استوعبت الموقف.. انه حميد واقف يتأملها!!
سارة بتوتر : تبا شي ثاني حميد ؟
حميد وعينه بعينها: لا.. سيري داخل الرياييل بيون بعد شوي.. اذا بتدخلين الميلس ولا بتخطفين حذاله تغطي.. ياويلج تطلعين بهالمنظر
سارة هزت راسها بحيا وطلعت
***************************************
في صالة الحريم.. الكل كان متواجد.. بعد العشا دخلت عليهم نورة وعلى ويهها ابتسامة رقيقة.. الكل سلم عليها وبارك لها
عروستنا كانت طلتها بسيطة وجميلة.. لابسة مغربية على شكل فستان خفيف، بحزام يبين تفاصيل خصرها.. لونها كان وردي فاتح.. اما المكياج كعادة نورة، تحب المكياج البسيط اللي يبرز ملامحها والشعر ويڤي..
باقة الورد كانت عبارة عن خمسين وردة جوري حمرا، وعليها شريط قماش مكتوب عليه -طالبين القرب منكم-أما الدبلة فكانت من ذوق راشد.. اختار دبلة سوليتر من المحل اللي تحبه نورة وتتعامل معاه دايمًا.. وكان ماخذ هدايا عبارة عن عطور.. بعد العطور المفضلة لنورة
وطقم ذهب أبيض خفيف، كذلك من المحل اللي تحبه نورة.. باختصار كل شي موجود كان باشراف راشد واختياره
قامت أم محمد عشان تلبس نورة الدبلة والطقم
أول مالبست نورة الخاتم طلع صوت اليباب (الزغاريط) من الحريم
أم محمد تحضن نورة: بالبركة بنيتي، الله يسعدكم ويتمم لكم على خير
نورة تبوس راسها: آمييين عموه
البنات كانو مستانسات.. سارة ملتهية بالتصوير، صورت كل التفاصيل بالخطبة ورتبت صور جماعية للكل، وأمون تسولف مع نورة وقاعدة معاها كل الوقت، أما عواش كانت تساعد الحريم بالضيافة وشوي تقعد مع البنات
***********************************
في ميلس الرياييل
ابو مايد: تباركت يا راشد، عقبال الملجة والعرس الله يتمم لكم على خير
راشد: الله يبارك فيك يا عمي، آميين
مايد يالس عدال راشد وكلمه بصوت منخفض: ماوصيك عليها رشود، حطها بعيونك، نورة قلبها رهيف، الله الله فيها.. انته طبعك حاد وعصبي، بس ان شاء الله تعاملك وياها بيكون مختلف
راشد: لاتوصي حريص يا مايد، اختك بعيوني، والله يقدرني واسعدها وماتشوف المضرة
مايد: هات تلفونك.. بكتبلك رقمها.. خذو راحتكم بالتواصل بس في شي واحد انساه.. الحين كشفتك، انا اقول هذا ليش دايمًا متعب عمره
راشد باستغراب: مافهمت عليك شو تقصد ؟
مايد بخبث: يوم تودي اختك العين وتمر ع نوروه.. اونه على اساس مايسيرون بالباص والسيارة اريح لهم.. طلعت مب هين
راشد ابتسم له باحراج
مايد: امزح وياك، خذ راحتك بالنهاية مب غريب انت.. خطيبها و ولد عمها
راشد يضحك: الحين عاد بالذات بتكثر روحاتي للعين.. كل شوي بوديهم.. ادور لي سبب
مايد: يا حيك تبا تكحل عيونك كل شوي يعني
راشد: هيه نعم.. اصبر عمري لين العرس
**************************************
انتهى اليوم بكل سعادة على الجميع.. والكل رجع لبيته
الساعة 11:30, سارة طلعت برع فالحوي قعدت على الكرسي وخلت دموعها تنزل بكل راحة
حميد فتح باب الحوي ودخل.. انتبه عليها وراح صوبها.. كان واقف وراها
حميد: ليش يالسه بروحج ؟
سارة نقزت وطالعته بخوف: انته حالف توقف قلبي اليوم ؟
حميد انتبه على دموعها واستغرب!!
حميد: امي ناسية بوكها.. ييت اخذه، ماجاوبتيني شو تسوين برع ؟
سارة: خلك هنيه بدخل بيبه لك
حميد: لا
سارة باستغراب: ليش ؟
حميد: ممكن تيلسين وانا بيلس وياج شوي ؟
سارة: اخاف حد يشوفنا
حميد: الشباب كلهم متيمعين عند سعيد.. مايد ما بيرجع الحين
سارة قعدت وقعد حميد حذالها وبينهم مسافة
حميد: ليش هالدموع كلها ؟
سارة تلف ويهها عنه: مافيني شي
حميد: علينا هالكلام ؟ انا اعرفج من يوم كنا صغار.. ماتيلسين على هالكرسي الا اذا فيج شي
سارة: يهمك يعني تعرف اللي فيني ؟
حميد: أكيد يهمني
سارة: والله مايهمك.. لو يهمك مابتعاملني بهالطريقة الايام اللي فاتت
حميد يتنهد: لاتخلطين المواضيع فبعضها.. انتي الحين في شي مضيقبج شو هو ؟
سارة مغبونة: اختي
حميد: بلاها اختج ؟
سارة تغطي ويهها وتشهق: بتعرس عني وبتروح خلاص
حميد كاتم ضحكته: الله يرضى عليج، تراها الا خطبة، اختج بتعرس بعد سنه ولا سنتين.. وبعدين منو هيه ماخذة يعني ؟ ولد عمج والبيت هذوه خطوتين.. متى مابغيتي سيريلها مشي بعد
سارة: ماتخيل البيت بدونها حميد
حميد بحنان: ماعليه ساروه.. هذي سنة الحياة.. انتي لاتصيحين اهم شي، ماحب اشوف دموعج
سارة صدت عليه و حطت عينها بعينه.. وردت تصيح اكثر
حميد توتر أكثر: يا بنت شوفيييج ؟ اتكلمي لاتخليني على اعصابي
سارة تمسح دموعها وتطالع الجهة الثانية: أنا آسفة عاللي قلته قبل وضيقت خاطرك فيه، حقك علي
حميد: انتي حمارة وغبية بعد
سارة طالعته بصدمة: سلامات!! شعندك تغلط
حميد ينزل راسه: ماكذبت، عيل هذي كلمة تنقال ؟ اعتبرك ولا شي ؟ هنت عليج ؟
سارة: لا والله عمرك ماهنت ولا بتهون..انته تعرف انه لساني طويل.. وماقدر اسيطر على ردات فعلي وكلامي.. بس ماتوقعتك بتشل بخاطرك لهالدرجة.. حشى يا كلمة ردي مكانج.. ولا انك تعاملني بهالاسلوب حميد
حميد بانفعال: انا بالذات لازم تسيطرين على نفسج معاي.. ماتحمل ابدًا الكلام الجارح.. وبعد يكون منج ؟ وايد ثقيلة علي
سارة: ماحيدك حساس حميد
حميد: مايخص الحساسية بالموضوع.. بس انتي غير ومكانتج غير
سارة تبتسم: الله الله من قدي.. وانا بعد انته غير عندي، اكثر واحد اعزه من الأهل.. اقرب واحد لي يفهمني ويسمعني دايمًا.. حسبة أخو عزير وغالي
حميد يضحك: مالت عليج.. الغبي بيتم غبي طول عمره.. المشكلة أنا اليوم ضاعت علومي، رحت فخرايطها
سارة ترفع حواجبها: شكلك اليوم وايد بتغلط علي.. بسير داخل ايبلك البوك.. وبعدين توكل بيتكم بدون مطرود
حميد: سيري برايج
راحت سارة يابتله البوك..
حميد ابتسم: تصبحين على خير.. وخلاص لاتصيحين، روقي وهدي اعصابج
سارة بابتسامة أعرض: وانت من اهل الخير والعافية.. احلام سعيدة
حميد: أنا وين بلاقيها الاحلام السعيدة من وراج؟ دخيلج عقب ماروح سيري شوفي ويهج.. انا اليوم عشت رعب من السواد اللي شفته
سارة تطالعه باستغراب ومش فاهمة عليه!!
راحت الحمام عند المنظره تطالع شكلها.. انفجعت لما شافت الآي شدو والآي لاينر كله سايح و ويها مخبوص من الألوان.. تمت تضحك, وقالت فخاطرها حميد شافني بأحسن حالاتي وأسوء حالاتي مادري بصراحة كيف تحمل يكلمني ويواسيني وانا هذا منظري.. لو حد مكانه بيمصخرني وبيضحك علي لين مايقول بس.. شكلي مايتشاهد
************************************
نروح لطيور الحب.. اول مادخلت نورة غرفتها اتصل لها راشد
راشد: يا هلا بحرم راشد
نورة بحيا: اهليين فيك
راشد: مبروك ياعيونه.. الحين تحمليني عاد، اربعه وعشرين ساعه بدقلج.. تردين علي عاد الحين ماعندج عذر أبدًا
نورة: الله يبارك فحياتك، خذ راحتك فأي وقت وكل وقت
راشد: شرايج بتجهيزات اليوم ؟
نورة بحب: فديت عينك تسلم، ابهرتني والله، لهالدرجة عارف لي وحافظ أدق تفاصيلي ؟
راشد: فدوة حبيبتي، هيه والله كل شي يخصج حافظنه وعارفنه.. ماخليت اي حد يتدخل او يختار شي حتى أمون
نورة: حرام عليك كله ولا أمون.. خلها تقول رايها وامشي عليه.. نوار بعد تعرف لذوقي مستحيل تختار شي مايناسبني
راشد: انا عارف.. بس يوم مهم مثل هذا ولحظة مهمة مثل هذي.. كل شي بيكون على ايدي أنا
نورة: الله لايحرمني منك
راشد: ولا منج عيوني انتي، عادي اصارحج بشي ؟
نورة: اكيد، تفضل
راشد: سامحيني لو ضغطت عليج فيوم، انا ادري في وايد اوقات استحملتيني فيها.. بس كل اللي اباج تحطينه فبالج اني رغم كل شي احبج واحتاج منج تطولين بالج معاي ومهما صار تصبرين وتكون ايدج بايدي
نورة: مسموح حبيبي.. وأنا أموت فيك، ان شاء الله مابيكون بيننا الا كل خير.. انا معاك فالحلوة والمرة
راشد: توعديني ؟
نورة: أوعدك
*******************************************
اتصل سعيد لعمته..
سعيد : حي الله العمة
العمة شيخة بخوف: شو مسسستوي ؟ فيكم شي ؟
سعيد باستغراب: لا مافينا شي بلاج عموه ؟
العمة شيخة تتنهد: استغفر الله العلي العظيم، حبيبي سعيد انته شفت الساعه ؟
سعيد: لا والله ماشفتها
العمة شيخة: الساعة يا حبيبي 12:00!! شو الموضوع المهم والضروري اللي خلاك تصرعني وتدقلي فهالوقت ؟
سعيد يضحك: سامحيني حبيبتي والله مانتبهت على الوقت.. انا قلت رادين من الخطبة متأخر اكيد مابتكونين راقدة الحين.. عموه بغيت اكلمج فموضوع باجر لو فاضية، اقدر امرج الصبح نطلع نتريق وأقولج اللي بخاطري ؟
العمة شيخة: اكيد عادي حبيبي، انا ماعندي شي مرني على الساعه تسع ونص
سعيد: حاضرين.. تصبحين على خير نوم العافية
العمة شيخة: تلاقي الخير فديتك
