ولنا في الحلال لقاء

__ جزء 2 __

Part 02
__ ماما أني جيييت __ حمدلله على سلامتك ترتيل واش درتي فيها اليوم __ الله يسلمك ماميثو راه كيما كل يوم بصح اليوم واحد سامط هكذا داير روخو حاجة حاب يشوف روحو عليا جاي يهدر على نقاب تع داعش وكون جيتي زينة ماديريش نقاب لكن الحمد لله فاتت على خير عطيتو زوج كلمات وخليتو __ الحمد الله ربي يهدي ما خلق و يبعد عليك كل الأذى، نحطلك تتغداي درك ولا تسناي خاوتك __ طبعا نستناهم مامي. دخلت لبيتي ولا نقولو عالمي الخاص، لي نحس فيه بأنه مملكتي اكيد نحببا وانا لي خيرت من ديكورها لسريرها للألوان تعها لي تخليني ديما فرحانة كي نشوفها بدلت قشي ورحت توضيت وخرجت نصلي ، خلصت صلاتي قعدت مع ثليفوني نكونكثي في الانسثا تعي به نرد على رسائل المعلقة ،  مدايرة الانسثا تاعها هادف للارشاد ونصح ومحتواه ديني وكونها تقرا شريعة . دخلت لرسالة لولة لقيت رسائل - " السلام عليكم ورحمة االله وبركاته ، مالقيتش واحد يعاوني من غيرك اني عندي بروبلام كبير وعلابالي مكاش لي حيعاوني قدك " كملت في رسالة تانية " عندي فترة شاركت في دورة علم شرعي اونلين في زوم بالانترنت وكنت نحضر ونشارك ونسقسي يعني متفاعلة ومركزة المية بالمية لحتى لقيت ميساج دخلني من الدكتور من لي منشطين الدورة من فايس تاعه يقولي انا نشوفك ديما تحضري محاضرات لكن عندك محاضرتين غايبة فيهم قلت نطمن عليك ، تصدقي اترتيل مش حنكذب عليك فرحت بزااااف باهتمام تاعو وخاصة انو اي بنت ترتبط وتزوج بواحد ملتزم ، رديت عليه انا متشكرتك بزاف يا دكتور وحضرتك ادخلت السرور على قلبي لكن موضوع مايخلصش هنا هو انو صرا بيناتنا كونطاكث وانا بصراحة كنت نرد عليه ومافكرتش نحبسو حتى وحد نهار قالي بلي راه معجب بيا واذا نرضى نكون زوجته الثانية ؟ انا ضحكت عليه وحطيتو يتمسخر قتلو انا كيما بنتك يادكتور قالي بصح انا نحس اتجاهك بمشاعر تانية انا رايح نجي ونطلبك من باباك انا ماصدقتوش .. وهدرنا موراها ببزاااف حتى حسيتو بدا يتجاوز حدودو وانا كنت نرد عادي حت وحد نهار قالي امحي ديسكيسيو لي بيناتنا قادر كاش واحد يشوفها وهذا واش صرا باختصار ، الصراحة انا منيش حننكر بلي راني غلطانة وعطيتو فرصة أنو يتجرأ عليا هكذا لكن ربي عالم بلي راني ندمانة بزاااف تعيشي قوليلي كيفاه ندير وكيفاه نتصرف اني معرفتش . خلصت ميساج تعها هبطو دموعي على خدي حسيت بالحزن عليها وعلى البنات لي كيفها على الأقل هذي عرفت غلطتها وندمت عليها كاين بزاااف بنات كيما هكذا في بداية الالتزام تعهم يبداو يبنيو احلام بلي يديو شيوخ وشباب ملتزمين وهذي سبب من اسباب الفتنة "فالملتزم لايُفتن إلا بملتزمة، والملتزمة لا تُفتن إلا بملتزم"  مسحت دموعي لي نزلو على خذي ودعيت بيني وبين ربي " اللهم ألهمني الرشد والصواب" بديت نرد عليها قتلها __ وعليكم السلام و رحمة الله و بركاته شوفي حبيبتي الحمد لله أنك حاسة بلي راكي غالطة رانا كاامل معرضين للفتنة ، وطبعا شيطان مش رايح يطلقنا في حوالنا بالعكس يبقا ورانا حتى نهار نموتو ، ولي راكي فيه نتي درك نسموه فتنة من باب طاعة يعني الشيطان جاك من بابا الطاعة ، شغل نتي عجبك هدرة تع الدكتور وخلات قلبك يهتز ليه واكيد ردك هو العامل الاساسي انو يكمل هدرتو معاك هو معذور لكن مش مبرر انو مغلطش أسأل الله أن يحفظنا ربي يسامحو وربي يهديه ، ماعليك نتي درك تروحي تقفلي عليك الباب هذا نهائيا كيفاش تقفليه ماتزيديش تحضري محاضرات اونلين مع دكاترة شباب وتاني بلوكي هذا الدكتور ماعندكش مبرر تهدري معاه نهائيا وردي بالك مشيطان مش رايح يخليك على راحتك وربي قاعد يختبر في توبتك إذا كانت صادقة ولا لالا ، درك ماعليك غير تكثري الاستغفار وتصلي ركعتين توبة من هذي غلطة ، واتشكري ربي انو سترك ومكبارتش وصلت لباباك ولا خوك راكي تعرفي انو حنا البنات اكثر شي نحافظو عليه هو سمعة تعنا واي حاجة تخدشها ولو كانت صغيرة ، درك ماعليا نقولك غير اتهلاي في روحك وطمنيني عليك واي حاجة تحتاجيها أني هنا . بعثت الميساج رايحة نشوف ميساج تاني به نرد عليه سمعت صوت خويا صغير جا من المسجد يسقسي عليا ودخل يجري لبيتي __ رتووولة اي هنا توحشتك __ ههههه اوووو صباح برك ونت معاي قبل ما تروح تقرا في مسجد