ولنا في الحلال لقاء

__ جزء 49 __

الجــزء التاسع و الأربعين 🦋🥀
بقلم ملاك 🦋🥀
تعدات العطلة ويوسف مابين خدمتو والمسجد وجمعية تاعو وزاد في مجهود تاعو به يتعلم كثر ويتعرف على دينا كثر وحفظ تقريبا 15 حزب من قرآن الكريم كان هدفو يحفظو ويخدم بيه في حياتو ويكون من حفظة القرآن الكريم مابقاش يوسف لي نعرفوه في الاول ولا صاحب خلق ودين محبوب من طرف خدامين تع  شركة باباه ومش مصدقين بلي كان متكبر عليهم من قبل حبوه بسبب تواضع تاعو ... بدا العام جديد تع القراية وهذا هو العام لخر تع يوسف في الجامعة وياخرج .. يشوفو معاه لي يقرو معاه مش مأمنين بلي هو يوسف خلصو القراية وهو في حال كي رجعو لقاوه على حال شكلو برك يخلي طرف لوخر يحترموه بسيف وعلاش لالا ورزقو ربي الهداية .. يمشي يوسف قاصد الأونفي ويشوف مع الارض به يغض البصر تاعه __ سبحان الله مغير الأحوال متأكيد هذا يوسف لي ماخلا حتى طفلة في جامعة ومامشاش معاها ؟ . خطهدرها طفل مع صاحبة __ الحمد لله هداه ربي والله فرحتلو بزاف ربي يثبثه ويثبثنا ... حضر المحاضرة تاعو لي كانو عندو .
في العشية عند سديم لي كانت مع إسراء __محاضرة طويلة تقتل . قالتها اسراء لسديم __ كي شغل كنتي مركزة راكي رقدتي نص محاضرة __ هاو لازم شيخ يجيب الرقاد باقي يهدر ويرحي وحدو ومش حاب يسكت __ استغفري واش دانا لشيخ __ استغفر الله ، شحال نحبك كي تفكريني نحبك بزاف ، كنت حابة نتعرف على رتيل قبل ما تروح. ماكملت هدرتها لقات سظيم طرطقت بالبكا زربت اسراء حضنت سديم __ شبيك علاش راكي تبكي __ توحشت رتيل بزاف يا اسراء حتى اني معلابالي بحتى حاجة من ساعة لي سافرت خايفة تكون كاش حاجة صراتلها لا قدر الله __ بعيد شر عليها  ماهيش تفتح الفايس ولا واتس ولا اي حاجة توصللها؟ __ الفيس والانستا مسحتو بسبب واحد الحكاية هكذا والواتس ماتفتحش من نهار سافرت قريب تولي عندها عام من سافرت وماعلابالي عليها والو حنهبل .. قطع كلامهم ثليفون سديم شافت مع ثليفونها ضربتها بسمة ورا نقابها __ السلام عليكم الزين .. ايه خلصت .. اوك نستناك .. في أمان الله . كوبات شافت مع إسراء وعلامات تعجب لي على وجها طرطقت عليها بضحك __ حرام نحب خويا ولا شاه __ لالا ياختي حبيه ربي يحفظكم لبعض  __ آمين .. انا نخليك درك لانو راه جاي يديني . سلموا على بعضاهم وخرجت لباب لقات خوها يسنا فيها قدام الباب ، ركبت وديمراو .. في الطريق لاحظ يوسف تيهان سديم قطعهولها __ ممكن نعرف وين راكي تخمي برنساس  سديم؟ . ضحك على كلمات خوها لي يجبرو بخاطرها شافت معاه بنضرات حزن __ رتيل ايوسف. مع سمع اسمها فرينان على جنب طريق __ شبيها رتيل؟ صراتهلها حاجة؟ رجعت؟. هدرهم ورا بعض وباين خايف عليها __ لالا هي بربي إن شاء الله تكون لاباس انا مانعرف عليها والو من ساعة لي سافرت فيها انا والبنات جبنا سيرتها وانا توحشتها بزااف. سند يوسف راسو على كرسي وتنهد تنهبيدة من أعماقو ، شافت معاه سديم وشافت الحالة لي صراتلو حكمت يدو لعلها تخفف عليه __ مزالك متفكرها؟ شاف معاها يوسف وتبسم معاها __ وانا من وكتاه نسيتها باش نتفكرها؟ __ مممممم هذا موضوع كبير ومهم احكيلي اني نسمع فيك __ واش نحكي يابنتي؟ مهبولة؟ وزيد مزلتي صغيرة على الحوايج هذو ههههه __ صغيرة!!! بليييز انا ختك بليييز . رجع نوض طنوبيل وديمارا وفي نفس الوقت يحكي لاختو واش مخبي داخلو من نهار شافها وهي ساكنة في بالو __ عمري ماريح ننسا لحضة وحدة جمعتني بيها ياسديم ، نهار عرفت بلي راهي سافرت حسيت دنيا كحالت في وجهي وفي الاول التزمت على جالها بكل صدق و شيطان قدر يضحك عليا في النقطة هذي ، بعد ما عرفت راهي سافرت بقيت نروح لفادي به نسي روحي فيها بصح في كل خطرة كنت نكذب على روحي مكاش طفلة قدرت تخطف قلبي زيها مع أنها مدارت والو ولا حكات معاي ولا حتى حاجة مشتركة بيناتنا وماعلاباليش رايها فيا ولا نقولو كيفاش كانت تشوف فيا ، معرف كيفاش ترجع تشوفني درك ، علابالك اسديم حاسيتها معايا نهار ضربني فادي برصاص ، تصدقيني كون نقولك في العملية حسبتها معاي ، ماتستغربيش من هدرتي بصح هذي هي الحقيقة و الحمد لله عندي يقين بالله بلي راهي حتكون زوجتي في يوم من الأيام لانها احد اهم دعواتي في الصلاة وفي سجودي وفي قيامي ، عمري ما حبيت وحدة غيرها. كانت سديم تسمع لخوها وهي تبكي ورا نقابها وفي هدوء به مايحسش بيها خوها مكانتش متوقعة يكون مخبي الاحاسيس هذو كامل ليها ويحكي بكل صدق __ علاش سكتي؟ اني خلصت كلامي . دار يوسف لختو لقا نقابها سارد من دموع تعها __ انت احن واحد شفتو حتى من حبك ليها كان نقي يا يوسف  __ ايه الحمد لله علابالي .. هدرها به يضحك ختو __ ربي يجمعك بيها عاجلا غي آجلا __ وربي يرزقك الجزوج الصالح . حبس الطنوبيل قدام دار زرب نزل وفتح باب تع طنوبيل جيهة ختو __ اتفضلي مولاتي . تبسمت معاه ونزلت وكان كاين لي يتفرج فيهم بدون قصد ...

#كبسو_العدوات🙂👍🥀