ငါ့တပည့်တွေက ဘုရင်တွေ

အပိုင်း 86

အခန်း ၈၆ : ယွင်ဟွမ်း၏နယ်မြေဟောင်း

ဤနေရာသည် တိမ်လွှာဖီးနစ်အင်ပါယာ၏တည်နေရာဟောင်းဖြစ်၏။

ဟုန်ရင်သည် စိတ်ဆုံးဖြတ်ထားဟန်မျက်ဝန်းအစုံဖြင့် သူ(မ)ရှေ့ရှိအပျက်အစီးပုံကြီးကို ကြည့်လိုက်သည်။

တစ်ချိန်တုန်းက တိမ်လွှာဖီးနစ်အင်ပါယာမှာ ဤပြည်မကြီး၏ တစ်ခုတည်းသောအုပ်ချုပ်သူဖြစ်သည်။

အင်အားစုအားလုံးကိုစုစည်းပြီး ကောင်းကင်ဘုံလမ်းမထက်မှာတိုက်ခိုက်ခဲ့သည့်တိုက်ပွဲကြောင့် တိမ်လွှာဖီးနစ်အင်ပါယာသာမက တိုက်နယ်ကြီးတစ်ခုလုံးပင် ပြင်းထန်လှစွာသောထိုးနှက်မှုတစ်ခုကို ခံစားခဲ့ရသည်။

မရေမတွက်နိုင်လောက်အောင် များပြားသောဂိုဏ်းများ၊ မိသားစုများနှင့် လျှို့ဝှက်မျိုးနွယ်စုများ သေကြေပျက်စီးခဲ့ရလေသည်။

ပညာရှင်များသည်လည်း တစ်ယောက်ပြီးတစ်ယောက် တိုက်ပွဲကျကုန်လေ၏။

အမွေအနှစ်များကလည်း သမိုင်းကြောင်းတစ်လျှောက် အမြစ်ဖြတ်ချေမှုန်းခံခဲ့ရသည်။

သို့သော် ဟုန်ရင်ကတော့ ကောင်းကင်ဘုံလမ်းမထက်တွင် တိုက်ပွဲဝင်ခဲ့ခြင်းကို နောင်တမရချေ။

ထိုအချိန်တုန်းက ဤတိုက်နယ်ကြီး၏ခွန်အားမှာ အထွတ်အထိပ်သို့ရောက်ရှိပြီးဖြစ်၍ ၎င်း၏အဆင့်မှာ ထပ်မံကျော်ဖြတ်စရာပင်မရှိတော့ပေ။

အကယ်၍ သူတို့သာ ကောင်းကင်ဘုံလမ်းမကို အနိုင်ယူပြီး ပိုမိုမြင့်မားသောကမ္ဘာတစ်ခုဆီသို့ မထွက်ခွါနိုင်ပါက သူတို့သည် အိုမင်းလာသည်အထိ သေရဖို့ထိုင်စောင့်နေကြရုံသာရှိ၏။

ထို့ပြင် ထာဝရအသက်ရှင်နိုင်ရေးကို မမက်မောသောကျင့်ကြံသူဟူ၍ ရှိပါ့မလား။

အသက်အရွယ်အိုမင်းလာပြီး သေသွားလိုက်ချင်သူများရှိပါ့မလား။

ဟုန်ရင်မှာ မခံမရပ်နိုင်လောက်အောင်ဖြစ်ခဲ့ရသည်။

အခြားဂိုဏ်းများနှင့် လျှို့ဝှက်မျိုးနွယ်စုများကလည်း ထိုအဖြစ်ကို အလိုမရှိကြပေ။