-
عند ورد اخذت لها ردبول وهي تتمشى حول العزبة تنهدت وهي تدخلت بيت الشعر وزاد فضولها من لمحت دفتر شكله قديم تنهد واقتربت وهي معقده حاجبينها بفضول مسكت الدفتر بوزت شفايفها : بس ذا ماعليه غبار يعني جديد اخذت الدفتر وجلست برا وبدت تفتح اول صفحة وكانت قصيدة تقول : "
..
ياوجودي وجد من نفسه جزوعه
باقيٍ فيها علومٍ مانستها
لابغى عن سجته ينسى دموعه
مرته ذيك العلوم وحولتها
واشعلت نارٍ حطبها من ظلوعه
تاكل اللي فوقها واللي تحتها
كل ما اذكر من خذت قلبي قطوعه
واقتفاها النوم وعيوني قفتها
..
تنهدت وهي تقرا ولا هي فاهمه شي من القصيدة انتبهت لتوقيع وكان توقيع باسم " الشاعر : متعب بن عبدالعزيز " ضحكت بسخرية : ماصدقت نجد وهي تقرا لي قصايدك لكن الحين صدقتها اثاريك شارع
بدت تقلب الصفحة الثانية وهي تقرا القصيدة الثانية ب اندماج :
..
على جيدك تلبي لك قلاده لولها حجاج هنا
كان الشعر موضع سجوده موضع قلاده
يا شبه الماء وارق من الندى وانعم من الديباج
تدللتي ، على من هام فيك ، وحبك زياده
لجل ضحكة عيونك جاتك بيوت القصيد
افواج قصيد يذهل انصار الأدب ويثير نقاده
وكالعاده ،، حضورك للحفل والحاضرين سراج
تمرين المكان وتخطفين الضوء ،، كالعاده
انا شاعر ، نهاره ما يجاري ، نوره الوهاج
بعث فيه الله آيات البيان آيات لعباده
معي { زهد المعري } ما معي { صوفية الحلاج }
وروح فيك ماهي عن كلام الناس نشاده
..
عقدت حاجبينها بـ فضول وصدمة : يحب ؟ بس مين ليكون يحب ذيك شيخة !
~ متعب الي وصل العزبة وهو يشوف البنت الي جالسه على الكرسي عقد حاجبينه بفضول واقترب بشويش وجاء بيتكلم وسمعها وهي تقول : يحب بس مين ليكون ذيك شيخة !
وسع عيونه وهو يرفع انظاره لدفتره الي معها اخذ نفس بعصبية عرف انها ورد من صوتها الي يميزه صوتها الانثوي الهادي تنحنح : لو سمحتي
فزت ورد بخوف وهي تحط الدفتر بوجهها : يمااااااا يماااا
رفع نظره متعب وناظر عيونها لثواني سرح فيها للحظة حاول يصد لكن مااقدر يصد عنها عيونها تجذبه وتسحره بشكل غريب صحى على ورد الي تقول : شسمه هذا دفترك اسفه اخذتها احسبها مو لك
تلاشت عصبية متعب ونطق وهو يمد يده : حصل خير هاتي الدفتر
مدت له الدفتر بخوف بلعت ريقها وحست ان موقفها جريء وقليل ادب شبكة يدينها : اعتذر والله مااحسبه لك
متعب زفر بهدوء : ماعليه قلت لتس حصل خير
شدت على يدينها بتوتر وهي ودها تساله عن القصيدة تشجعت ونطقت باسمه لاول مره : متعب
وقف بمكانه وهو يسمع اسمه بمنطوقها بلع ريقه بخفوت وهو يحس انه اسمه حلو اخذ نفس وهمس : حتى اسمي صارر حلو تنهد وهو يستغفر ربه رد عليها : لبيه
ورد بتوتر : شوف ممكن اسالك انت فعلا شاعر ؟
متعب هز راسه وهو ماوده يطول الهرج معاها لاجل محد يشوفهم كذا : لا مو شاعر ناقل ابيات
ابتسمت ورد بهدوء : يعني تسرق ؟
متعب ناظر لـ سماء : من نقل الشعر ماهو بسراق يابنت العم المهم بتجلسين بروحتس هنا
ورد تكتفت : ايه بجلس بروحي هنا
عقد حاجبينه متعب : وليه ماتجين عند النياق الكل هناك
ورد هزت راسها بـ نفي : ماابي
مسح على لحيته : تمام بس ادخلي داخل الظاهر فيها مطره
استغربت ورد من انه جالس يطول معها بالحكي : بدخل بس لا تطولون
ضحك متعب عرف انها خايفه : قولي انتس خايفه
رفعت حاجبها ورد : بنت فزاع ما تخاف شي
ابتسم متعب وهو يمشي ويتركها ونطقت من شافته يمشي همست : نرجسي اف
دخلت الخيمة وهي تجلس وبدت تاكل من الاكل الي جايبينها
-
« بعد مرور ثلاث ساعات اغربت الشمس »
البنات بالخيمة وهم يضحكون ويسولفون والعيال برا الجو بدا يبرد سيف وهو يسوي الشاهي ناظر لعيال : عيال من يبي شاهي
تميم : انا صب لي
سيف رفع حاجبه : ابلع ابلع
ضحك تميم : تبي تنحط بدال الحطب ؟
سيف ضيق عيونه وناظر لسياف وفيصل وهم يسولفون خزهم : عندكم بلا يا سرابيت
سياف كشر : انطم لا بارك الله فيك ماعندنا بلا
فيصل : تبي تسمع انثبر واسمع
سيف تنهد : ليتني معرس على الاقل مااقابل وجيهكم
نايف ضحك : وليه ماتعرس
سيف : والله تبي الصدق ودي اعرس لكن ابوي قال التوأم مايعرسون اذا الجحش متعب مااعرس
متعب كان ساهي وبعيد عنهم ساج بخياله وتفكيره بالموقف الثالث الي جمع بينه وبين ورد تنهد وهو يناظر لـ سماء ويتذكر عيونها وعى على تميم الي كان يناظر متعب ب استغراب من هدوءه وسرحانه ردفه: متعب متعب
متعب التفت لهم ناظر لـ تميم : لبيه
تميم : وين وصلت بعالم هواجيسك
متعب اخذ عصى النار وهو يعدل الحطب ونطق وهو يقول : يقول الشاعر
ضحك سياف وهو يحب يسمع اشعار وقصايد تميم ومتعب : اسلللم وش يقول
ضحك متعب بخفوت ونطق : "
..
خشف ريـمّ جيدها فارق عن كل جيد
البشر من تحتها والسماء بـ علوّها
ضعت بين عيونها السود والثغر الفريد
عادها بـ اول سنين الزهور..وتوّها
لينت قلبي وانا خابر ان قلبي حديد
ما دريت ان المشاعر علي يا قوّها
كنّ رمش عيونها سيفٍ يشيله حاكم
ما خلق في وسط قلبه رحمه و ماويّه
عنقها تضفي عليه بشعرَها المتراكم
و لولها المنضود دونه جمرتينٍ حيّه
..
صفقوا سيف وسياف وفيصل سيف بصوت عالي : اسلم اسلم ياابو عز
نايف غمز له : والحين تقول خثاريد !
متعب ضحك : ايه خثاريد
تميم : صح لسان شاعرها وسارقها
التفت له يخزه : اعقب ماهو كل من نقل شعر صار سارق
فيصب بـ فضول : من وين لك يااخوي هالقصايد
متعب تنهد : خثاريد من وحي الخيال بس
تميم وهو حب يغير الموضوع : الا سعود وذياب ماهم جايين !!
سياف : مدري ماضنتي يجون
« عند البنات »
عند البنات كانو يسولفون ويضحكون نجد وتعتدل بجلستها همس ناظرت لـ نجد : يوه يا نجد اخوتس متعب مهووس بالوضحة
نجد ضحكت : صادقه والله كل شي الا الوضحة
بلعت ريقها من تذكرت القصيدة الي قرتها وتكلمت : هو يحب ؟
نجد ناظرت البنات كلهم ضحكو بنفس الوقت ناظرت لهم برفعة حاجب : خير وشفيكم تضحكون !
انهار وهي تضحك : ياورد ماحسبتك غبيه
ورد خزتها : وجع وش غبية بهبدك ترا
نجد : ابك لا لا الوضحة ناقة بس صح هو يحب لكن يحب ناقته وضحة ويموت عليها
ورد : اها توني افهم
ابيار وهي تحس بالبرد : بنات وشرايكم نرجع ؟
همس : صادقة خلونا نرجع
نجد : اجل خلونا نشيل الاغراض ونكمل بيتنا الجلسة
بدو البنات يجهزون اغراضهم وبعد كم دقيقة طلعو من الخيمة تكلمت نجد بتنحنح : متعب بنرجع البيت
متعب قام لهم وجاء بيتكلم لكن شافها ورا انهار صاده بنظراتها تنهد وهو يناظر نجد : يلا امشو
التفت متعـب لعيال ونطق : انا بوديهم وراجع لكم
تميم : ودنا نرقد هنا اليوم
سيف : يلا ياحبيبي ارقد انتي انا وفيصل بنرجع بليل البيت
متعب : يلا يلا راجع لكم بس اوصلهم
مشوا البنات يركبون السيارة كالعادة نجد وانهار قدام وراء ابيار ورد وهمس ورد مكانها خلف متعب تماماً و همس بالوسط وابيار بالجهة الثانية
-
« مكان ثانية عائله جديدة في بيت الجد مقرن ال عتيق »
جالس بصدر مجلسه وعنده فهاد يسولف معاه دخل عليهم رعد : السلام عليكم
الجد مقرن و فهاد بصوت واحد : وعليكم السلام
تقدم رعد وهو يقبل راس جده مقرن : مرحبا يا جد !
الجد مقرن : مرحبا بك علومك وعلوم الشغل معك
ابتسم رعد وهو ياخذ فنجان من فهاد : والله زين الحمدالله
الجد مقرن يناظر فهادويناظر رعد : اشهد انكم قايمين فيني مااعدكم احفادي اعدكم عيالي
ابتسم فهاد وهو يبوس راس جده : وحنا عيالك يا جدي
تنهد رعد وطرى على باله ابيار حفيدة التاجر سليمان نطق : ايه ياجد ماودك نبارك للجد سليمان قد انهم واصلين الديرة لهم كم يوم
شهق مقرن بفرحة : اسالك بالله يا رعد ؟ متى وصلو يابوك امس رجعنا من المزرعة مااحسبهم راجعين لديرة
ابتسم رعد من فرحة جده لـ وجود اعز رفيق له : ايه اليوم العصر جتني حفيدتي وطلبت قلادة ذهب منحوته باسمها
فهاد : ما شاء الله والله مادرينا
الجد مقرن : اجل يا عيال تجهزو بكره بنروح لهم نقوم بالواجب
رعد وفهاد بنفس الوقت : ابشر على هالخشم
مقرن : وانت يا فهاد احجز سيف بناخذ معنا لهم
فهاد اشر على خشمه : تبشر ياجد
مقرن : وانت يا رعد قم خلص قلادة بنتهم وصلها لهم بكره العصر
رعد اعتدل بوقفته : اجل بقوم اشتغل عليها وبوصلها بدري لهم
مقرن وهو يتمدد : وانا برقد لي شوي ثم اقوم
قام رعد ولحف جده وقفل النور وطلع هو وفهاد برا المجلس لاجل يتركون جدهم يرقد
-
« عند البنات »
وصل متعب البنات لبيتهم ونزلوا البنات من السيارة وحرك سيارة
دخلوا البنات البيت وهم يسولفون ويضحكون دخلو السالفة ابتسمت ام سعود : يهلا ببنياتي
كلهم بصوت واحد : هلافيتس
ورد مالقت امها : عمه وين امي ؟
ام سعود : راحت لبيتكم اجلسي عادي
ورد حست ب احراج ناظرت للبنات وهمست : بنات فشله للحين عندكم انا !
التفتو لها بصدمة همس قرصتها : وجع وشذا الكلام !
ابيار ضيقت عيونها: تراتس بنت عمنا شفيتس انتي مهبوله
ورد بتردد : مدري مدري مستحية
نجد تاففت : اقول اقول امشي بس امشي
صعدوا البنات فوق وقابلوهم شيخة وغلا تخصرت غلا بعصبية وحدة : نعم نعم وش قلت الادب تطلعون للعزبة بدونا !
ابيار بسخرية شمقتهم : اي اشوا طلعنا ولا قلنا لكم ولا كانت الجلسة ثقيلة
شيخة رفعت حاجبها : ابياروه اسكتي لا ادق وجهتس
هنس ناظرت لـ شيخة بحدة : خير شفيتس انتي هذي اسيل جالسة تحت عند امي وعمتي ولا تكلمت وقالت وليه وليه
نجد خزتهم من فوق لتحت : السيارة صغيرة ماكفتنا متعب وتميم وسيف معنا وين نحطكم
شهقت شيخة بصدمة وسعت عيونها : متعب معاكم ؟؟؟؟ نعم هو موديكم ليه مااخذتوني
نجد وهي ناويه تقهر شيخة : اي هو الي معنا وازيدتس من الشعر بيت هوالي وصلنا ذالحين عندتس شي
شيخة ابتسمت بمكر وناظرت ورد : عادي اساسا متعب مايلفته اي شخص
ورد استنكرت نظرتها وضحكت بسخرية وبهمس : حمدالله وشكر
انهار بضحكة : تدرين وش المضحك انتس عايشه بوهمتس
ورد ابتسمت على كلام انهار كملت انهار تغيض شيخة : صدقيني ما درا عن هوى دارتس ويلا فارقي عن وجيهنا
غلا بحده طيرت عيونها : انهار احترمي نفستس شيخة اكبر منتس
نجد ضحكت وهي تمشي : يعطيها العافية عرفنا انها كبيرة بالعمر وصغيره بالعقل صدق
شيخة شمقتها بنظراتها مشت هي و غلا تحت دخلوا البنات
جلسوا البنات ورد نزلت العباية والطرحة ونقابها وجلست : يبنات ذول سايكووور صدق
همس : من ؟
ابيار وهي ترمي نفسها على السرير : مافي غيرهم الشياطين
ضحكت نجد وانهار تكلمت : هههههه والله صادقه شياطين
همس : قايله لكم تستسات
نجد وهي تطلع ايباد انهار : يلا يلا خلونا نبحث عن فلم نبي نتابع افلام تكفون !
همس فزت من شافت رسالة تحذير طقس صرخت : بنات بينزل مطرررر مطرررر
ضحكت ورد : اسالك بالله ؟؟؟؟
همس وهي توريها الجوال : شوفي شوفي
ورد كملت بلعت ريقها ناظرت البنات : اي والله تحذير طقس في مطر
همس : يالبيه يالبيه اخيراااا اخيرااا
ابيار تنهدت : الحين تبلشنا كل شوي تنقز تشوف مطر ولا
نجد شهقت بفرحة من اختيارها للفلم : شوفو لقيت فلم اكشن
كشرت همس : وع مانبي اكشن نبي رومنسي
خزتها انهار : شعندتس بالرومنسي هاه ؟
همس مسكت خصلات شعرها وبدلع : يمكن يمكن في شخص بحياتي
شهقت نجد : اح طلعتي عاشقه
ضحكت همس : تعقبين مب عاشقة الا صح عاشقة المطر
ورد بتكشير وخوف : مااحب المطر
شهقت همس : هاه ؟؟؟؟
ورد ناظرت للبنات الي استغربو منها ورجعت تتكلم : يبنات مااحب المطر والله
نجد : يويلي غريبه انتي وليه ماتحبينه
ورد بتوتر : بنات بابا توفى والدنيا مطرررر اكره المطررر مااحبه خايفه لازم ماما عندي
نجد وهي تهديها وتغير الموضوع : يبنات شوفو الفلم كوميدي
بدو البنات يسولفون ويضحكون ويتابعون فلهم
-
« عند العيال بالعزبة »
بعد مرور اربع ساعات سيف وسياف وفيصل راقدين بيت الشعر وسعود وذياب و تميم ونايف ومتعب جالسين قدام شبة الضوء
سعود : يعال مادريتو ؟
ناظرو له متعب عقد حاجبينه : بوش ؟
سعود : خابرين رفيق جدي مقرن ال عتيق
متعب : ايه خابرينه اظن انهم بالمزرعة مارجعو لديرة
سعود : لا يا رجال شفنا محلهم فيه ناس والظاهر انهم رجعو لديرة
تنهد متعب : دامه محلهم مفتوح اجل فعلا رجعو لديرة
حس متعب بقطرات المطر على وجهه وبدت تمطر فزو العيال : مطر يا عيال مطررر دخلو كلهم بيت الشعر ذياب وهو يمد يده للمطر : يمرحبا يمرحبا حي هالشوفه بس
متعب طرى على باله بيت من شاف المطر ناظر ذياب وابتسم : يقول الشاعر
ابتسم ذياب : اسلم وش يقول
تكلم متعب وهو يقول قصيدته : "
..
مراسيلك علي البارحه مثل المطر لا صب
تسر الخاطر اللي ضايقنٍ من جوه الحالي
مجيك حول عيوني من الضيقه لنظرة حب
وبدل كتمة الخاطر وخلاني على فالي
ولا نسيت الكلمة اللي قلتها بصدرٍ رحب
أحبك ياحبيبي و أعشق أولك مع التالي
..
ابتسم ذياب : الله الله صح لسان شاعرها
متعب : صحبدنك
جاءهم نايف من ورا وهو يهمس لـ متعب : ورد اختي راحت معكم
متعب عقد حاجبينه ب استغراب : ايه شفيه
نايف : لبيتنا ولا لبيتكم
متعب هز راسه بـ النفي : لا بيتنا ابك ليه ؟؟؟
نايف بتوتر وخوف على اخته : ورد عندها فوبيا من المطر يضيق نفسها اذا امطرت لازم عند امي ولا عندي
متعب حس بشعور غريب : تبيني اروح معك
نايف : لا انا بروح اوصلها البيت
متعب : اجل لا تعود لنا ماهو بزين لك خلك بيتك
تنهد نايف : ابد تم
مشى نايف متجه للبيت وترك متعب جالس قدام المطر ومعاه دفتره وشماغه على كتوفه وشعر الي فيه مويه من المطر فك ازارير ثوبه العلوية وهي تطري عليه ورد مستنكر نفسه كيف يفكر ب انثى كيف قدر يكلم بنت ولا شافها ماقدر يصد عنها تنهد ولا هو عارف نفسه اخذ يكتب أبياته الي تطري عليه من وحي الواقع ويدعي انها من الخيال:
..
" دخيل الغلا اللي راح واللي وقف مرتاب
بسميه عشق وانت مدري وش تسميه
ودخيل العيون اللي عليها الحلا جذاب
تشوف الولع فيهٍ ولا تدري ايش تاليه
ودخيل المكان اللي جمعنا ولا هو اعجاب
اذا لي معزه طاري البعد .. لاتطريه
لو تشوف وضعي عند ماتلتقي الاهداب
لك الله ، لو لك نيه بالجفا تلغيه
..
-
« عند البنات »
بعد عشر دقايق همس وهي تناظر المطر من الشباك بتنزل لكن ماهي قادره تنزل بسبب البنات رافضين عشان لا يخرب جوو الفلم طرت على بالها فكره الشاهي ناظرت البنات : بنات بنزل اسوي لي شاهي من تبي
ورد رفعت يدها : انا تكفين حطي فيه نعناع وحبق اذا فيه
ابيار : انا بعد
ابتسمت همس بفرحة من حست ان نجحت خطتها ونزلت تركض تحت ركضت للحوش من الباب الخلفي وتنزل بسرعة ناظرت المطر وبفرحة تناقز : الله الله مطرر مطررر
كانت ترقص وتلعب مع المطر وتغني بصوت واطي وتدندن وهي تدور بالمطر : " الله يمتعنك بلقاي ويمتعني بلقاك والسحب تمطر من تمتعنا " كملت وهي تدندن وتضحك
~ نايف الي وقف سيارته ودخل من الباب الامامي وقف وهو يشوف الي تضحك وترقص بالمطر وشعرها من كثافته يلعب بالمطر تضاحيكها بلع ريقه وهو مركز فيها ابتسم بخفوت وانرسمت ابتسامة على شفته ماقدر يصد عنها يتأمل ويتأمل عيونها والمطر الي ينقط على اهدابها ابتسم لثواني استغفر ربه وهو يتنحنح : يا اهل البيت درب
فزت همس بخوف وقفت بتجمد ورعب صرخت بشهقة : مين !!!!
نايف بلع ريقه : انا نايف ولد عمتس ادخلي داخل وناديلي ورد
همس عضت شفتها بخوف وتوتر واحراج ركضت تهرب لداخل بخوف اما نايف وقف وهو يتنفس بسرعة : حتى صوتها
دخلت همس وهي تحط يدها على صدرها وينزل ويصعد من الخوف والرعب وسعت عيونها بذهول : نايف شافني يويلي شافني وانا ماني متستره ركضت همس بخوف فتحت على البنات بقوة صرخو البنات بخوف فزو من شكل همس المرعوب ورد مسكتها من زندها : بنت شفيك ليه كذا شكلك-
همس بتلعثم وتوتر وجهه منصفق : هاه مافيني شي بس اخوتس تحت يناديتس
ورد عقدت حاجبينها ب استغراب : اخوي ؟ نايف بالعزبة
همس وهي تركض تتنسدح بسرير نجد وتغطي نفسها بصوت مرتجف : مدري انا سمعته يناديك
ورد تنهدت : انا برجع البيت يلا بنات تبون شي ؟
نجد سلمت عليها : ابد لا سلامتتس حافظتس الله
مشت ورد تحت لاخوها نايف ابيار كانت نايمه على سرير انهار وانهار ناظرت نجد ب استغراب من شكل همس راحت نجد عند همس وشالت اللحاف عنها وشافتها ترتجف : بنت شفيتس ليه ترتجفين
انهار عقدت حاجبينها وهي تركض لدولاب نجد وتطلع لـ همس ملابس قومتها بالغصب : همس قومي غير لبتس لا تتعبين قومي
همس قامت وهي ترتجف اخذت الملابس ودخلت الحمام قفلت الباب عليها وهي ترتجف من الخوف
انهار بلعت ريقها : تروع علامها ذي
نجد بوزت شفايفها: مدري يلا خلينا نشيل ذي الحوسه ونرقد
قامت انهار ومعها نجد ينظفون الحوسة وقفلو الانوار طلعت همس من الحمام وهي تنشف شعرها وعقلها بمكان ثاني نجد فتحت لـ همس مكان : همس تعالي نرقد
راحت همس عند نجد وانسدحت جنبها نجد ناظرت ملامحها همس المرعوبة سكتت ولا فضلت تتكلم معها
-
« يوم ثاني »
بعد اذان الظهر دخلت ام سعود على البنات بصراخ : قومن يا بنات قومن صلو الظهر وانتن راقدات
قامت نجد بتافف : طيب يمه قايمين
ام سعود : احتريكم تساعدوني على الغداء
قامت نجد وقامت معها انهار ناظرت انهار مكان ابيار ما كانت موجوده انهار بصوت مبحوح : وين راحت ذي
نجد وهي تفرك عيونها : الظاهر بيتهم
انهار : بتسبح اجل انا قبلتس وانتي قومي همس
نجد التفت لـ همس مالها صوت اقتربت وهي تسمع رجفاتها عقدت حاجبينها ب استغراب : همس فيتس شي
همس ما كنت ترد بس ترتجف حطت نجد يدها على جبين همس شهقت من حست بحرارة جبهة همس نزلت يدها لعنقها وفعلا حرارتها مرتفعة نزلت تركض نجد لتحت لامها : يمه يمه
ام سعود : وشبلاتس جايه تركضين بشوشتس كذا
نجد : يمه همس مسخنه حرارتها مرتفعة تعالي شوفيها
شهقت ام سعود وهي تقوم : يويلي عنها صادقه انتي امشي امشي
دخلت ام سعود للغرفة واقتربت وهي تمسك همس شهقت : اي والله حرارتها مرتفعة انزلي جيب لي كمادات مويه بارده بسرعه
ركضت نجد تنزل تحت وصقعت بوجهه سيف صرخت : ابعدددد
سيف : وجع وشفيتس تركضين انتي وشوشتس اعوذبالله بس
نجد بصراخ : لا تمر من غرفتنا همس بنت عمي فيها
تافف سيف وهو ينزل تحت للمجلس دخلت المطبخ وطلعت المويه الباردة والكمادات وصعدت فوق ناظرت لها اسيل ب استغراب : نجد وشفيتس
نجد : جابتس الله تعالي همس راقده عندنا وحرارتها مرتفعة
اسيل شهقت : اسالتس بالله ؟؟
YOU ARE READING
كل ليلة تزيّن قصيدي ذهبك
General Fiction-نبذة تعريفية عن رواية : روايتنا تتكلم بين الديرة وبين المدينة الي هي الرياض قرر الجد سليمان استقراره هو وعياله وأحفاده برجوعهم لديره بطلتنا ترجع ورد لسعودية بعد ترك ابوها ديارهم وانتقل فيها هي واخوها نايف لاستقرار في الكويت تخطط لانتقام لابوها...
