خطيئة العشق

58

مر اسبوع .. ما عمرها شافتو ولا هضرات معاه .. حتى عائلتها تواصلات معاهم وعلماتهم انها مسااافرة .. حتى هوما خبروهاش بلي وقع لخولة باش ما يشغلو بالها...

خرجاات من الحمام وتقابلات مع المرايا كتنشف شعرها ... كتحس بتعب جسدي ونفسي باغا غير تنعس ... كملات  شعرها ولبسات بيجامة خفيفة ودافية ..
خرجات من البيت كتجر فرجليها حتى بانت ليها خديجة  خارجة من الكوزينة تضحك..

خديجة: (قربات ليها بابتسامة)  فقتي انعاسة..بصحة دوش

زكية: (بادلاتها ابتسامة بعيااء) وليت كنعس بزاف معرفتش مالي اففف

خديجة: (كتفحص ملامحها) ياكما مريضة

يالله بغات تجاوبها حتى حسات بدنيا دارت بيها ..غمضات عينيها ورجعات فتحاتهم وتكات بيديها على لحييط بتعب..
خديجة شدات فيها بخووف شوشاتها حالتها.. 

خديحة: (كتقيس ليها فوجها) وجهك صفر وكنتي شوية غادي طيحي هاذ لايام كلها ما عاجبانيش .. خاصنا نمشيو لطبيب باينة فيك مريضة ازكية..

زكية: (حركات راسها بالنفي) لا اخالتي انا بيخير متشوشيش عليا ..

خديجة: بلا متحاولي نمشيو لطبيب نشوفو شنو عندك (عاوناتها تجلس) بغيتي يوسف يجي يلقاك مريضة يريب هاد دار فوق راسي..

زكية طلعات فيها عينيها مخنزرة فاش جبداتو ليها .. وجاوبتها باستهزاء..

زكية: على اساس يوسف غير مسوق لياا ههه .هاهو لايحني هنا ومكيسولش فيا..

خديجة: (تنهدات) كيفاش لايحك راك معايا وموصيني عليك.. عرفتي نوضي نعاونك تبدلي باش نمشيو لطبيب.. انا نعيط ليوسف يلحقنا ولا امين...

دغيا ناضت من بلاصتها وشدات فيديها ما بغاتوش يجي غير حيت مريضة...

زكية: (بترجي) بلاش عفاك خلينا نمشيو غير  انا وياك .. مابغيتش يوسف يجي غير حيت انا مريضة وحتى عمي امين بلا ميعرف حيت غايقولها ليه..

خديجة: (طلعات حاجبها باستغراب) اويلي يا  هاد لبنت راك مراتو خاصو يعرف..

زكية:(ردات شعرها بعصبية) لاا انا عارفة فاش يسمعني مريضة ايجي كيجري وانا مابغيتوش يجي غير قبل هادشي صافي نمشيو دغيا ونرجعو (خسرات ملامحها بزعل طفولي) عفاك اخالتي ديري ليا خاطري..

خديجة تنهدات  معرفات مادير من جهة  بغاتو يعرف حيت عارفاه ايخاصم عليها الى مقالت ليه والو  ومن جهة مابغاتش تخسر ليها خاطرها..

خديجة: واخا الالة نمشيو غير انا وياك  غير تهناي

زكية: شكرا بزااف...

داز وقت لا بأس به .. من بعد ما وجدو  راسهم خرجو بجووج ركبو فطوموبيل ديال خديجة ومشاو لعند طبيبة لي كتعرفها خديجة  ..