دخلات لدار عيانة باغا غير طيح تنعس جبدات ساروت تفتح لباب وهو يتفتح فوجها..
نجاة: فين كنتي هااا؟؟؟ (بخوف ممزوج بالغضب) خليتيني غانجهل بالتعياااط (بتفد) مااال وجهك صفررر ؟؟؟
زكية: (بتعب) كنت غير هنا امااامااا .. (دخلات شادة فالحيط) غانطلع نعس حتى حد ميصدعني عفااك اماما....
مشات جهة الدروج وطلعات عيانة.. ونجاة سدات الباب ودخلات بقلة حيلة متبعة ليها العين وقلبها كيتشوى من جهة بنتها....
طلعات زكية لبيتها .. حيدات داك سروال لي كان خانقها وتخشات فالفراش وجرات عليها الغطا .. هزات تيليفونها باش طفيه .. وهي تلقى ليزابيل من عند دنيا و نجاة .. وحتى ميساجات حتى بغات تنزل تيل... وهي تلمح ميساج من عند حمزة....
""💬 سلام زكية انا غدا راجع لمراكش فصباح غير نوصل غانجي عندك نتي لولا ناخذ لأمااانة ""
زفرات بملل بلا متسوق لميساج ديالو طفات تيليفون عارفة يوسف غايبقى يبرزطها.. تلوات فالغطا مغمضة عينيها .. حتى بدات تشمشم شافت مع جنابها وهي تشوف شنو لابسة كان لهودي ديالو لي فيه ريحتو .. بغات تنوض تحيدو وما قداات تنهدات وغمضات عينيها مستسلمة للنوووم....
دازت ديك الليلة بحاال الريح .. كان نهار الحد صابح نهار مشرق ومشمس .. الدار كلها مهوية والشميسة داخلة من فجوات الخوامي... والنافورة لي وسط الرياض زايداه جمالية هي والوريدات الملونين لي فجنبها....
نزلات فالدروج كتكسل نعسات بزاف البارح من رجعات من عند يوسف وهي ناعسة فاقت تعشات ورجعت غرقات فالنوم... لقات دنيا ونجاة كيفطرو .. تعجبو حيث اول مرة كتفيق بكري .. نجاة تبسمات ليها و ومات ليها تجي تجلس حدااها ..
زكية: ( جلسات فالسداري حدى نجاة) صبااح الخيررر...
ردو عليها بـ "صباح النور"
نجاة: زكية مبقيتيش كتاكلي؟ شوفي كيف ضعافيتي...
زكية: غيير لوحم اماما قاتليك طبيبة غير يفوت وداك ساع رجع كيف كنت وحسن ... شفتكم لابسين فين غادين ؟
دنيا: ويلي اصاحبتي ياك قلنا ليك لبارح غادين لبلاد .. راه خديت لعطلة وغانمشي وحتى خالتي اتمشي معايا .. ونتي مبغيتيش؟؟
زكية: ( عاد تذكرات كانت مقلوبة بالنعاس) اااه نسيت .. (شافت فنجاة) ماما اتخليني بوحدي؟؟؟
دنيا: ويالاااه معانا اويلي مابغيتيهاش تمشي تشوووف ختها تبقى مقابلاك باقا موموو...
زكية: ما داوياش معاااك نتي .. كندوي مع ماما..
دنيا: (كتعيب فيها)
نجاة: اوا ابنتي خالتك رمات عليا العار .. قاتلك هي نمشي واخا غير نهااار... يالاه معايا ابنتي الله يرضي عليك .. بدلي الجووو وترتاحي .. ياك كيعجبك تمشي عند خالتك لبلاد .. عاد دابا غاتكون دنيا زينة بالخضورة..
أنت تقرأ
خطيئة العشق
Action💫#مكتملة💫 #خطيئة_العشق كتابة: زينة الحراق - قصة بسيطة بطابع درامي .. رومانسي .. كذلك واقعي .. كتبتها بحب .. وبغيتكم تقراوها بحب .. خيوط خطيئة العشق قدام .. هي خطيئة عشق من الماضي .. واللي بسببها غادي يجيو أشخاص آخرين و غايعاودو يحييوها بطريقة آخ...
