خطيئة العشق

66

من بعد ما طلعو كان عثمان وخليل جالسين فالصالون مراقبين تلفازا بعينيهم كيتفرجو فالماتش ... والبنات فالبيت كيبدلو ليزن ويقادو ليه الحليب..

دخلات خولة عندهم هازا يزن بين يديها وتضحك.. جلسات حدا خليل لي شاف جهة يزن بإهتمام وهو مبتاسم ابتسامة خفيفة .. مرر ابهامو على خد يزن لي كان كيخرج لسانو ويحرك فعويناتو... عاد جات ندى من بعد ما لبسات عليها .. هز فيها عثمان عينو بابتسامة حتى عقدهم فاش لمح بعض الخصلات من شعرها باينين من الحجاب..

عثمان: (نطق وهو معلي حاجبو) ندى واقيلة يزن مخلاكش تقادي  حجابك؟

ندى: (بعدم فهم وهي كتقاد حجابها) مفهمتش لا قاديتو على خاطري !!

حرك راسو بالنفي وقف بلا عكز عليه قرب لعندها .. كيغطي ليها شعرها لي باين من الحجااب .. وهي حشمات وجهات نظرها لخليل لي أصلا ما كانش كيشوف لعندهم ساهي مع تيڤي .. و خولة مشغولة بـ يزن .. 

ندى: (بهمس) عثمان نقااادو غير بوحدي .. خووك ومراتو هنا زعما...

عثمان: (ممسوقش ليها كيقاد ليها فشعرها)  بلعاني كتخليه يخرررج ..

ندى: (تأفأفات) غانعاودو نفس لكاسيطة ثااااني...

عثمان: لمهم ردي لبال لراسك ومتعطليش

ندى: وصافي اويلي راه غير هنا دغيا رجعو

بعد عليها من بعد ما عنكش ليها داك الفولار مشات لمرايا تقادو وهو رجع جلس ..

ندى: خولة مشينا ؟

خولة: (حطت يزن فحضن خليل ووقفات) ااه مشيناا .. خليل سوارت طموبيل !!

خليل: (زفر بصوت مسموع ولاحهم ليها) سوگي بشوية آ خولة ومتعطلوووش تيليفون خليه شاعل كثرة دوران لا ...

خولة: (هزات صاكها ومونطو )كون هاااني ..

تمشاو جهة الباب حتى قاطعها بصوتو...

خليل: خولة كون غير قاديتي لينا قهوة قبل متمشي.. 

خولة ضيقات فيه عينيها.. عارفاه كيبقى يدير هاكا بلعاني.. مشات قادات ليهم القهووة.. حطاتها ليهم ندى وباست ولدها وهي ماسخاتش تفارقو ولفاتو ..
  خرجو بسرعة خايفين يطلعو ليهم ببلان جديد..
ركبو فالطموبيل حطو موسيقى هادية ..

ندى: توحشت ولدي اوووف

خولة: ما كاملاش خمسة دقايق توحشتيه...

ندى: عمررري فرقتووو...

خولة: (عينيها على الطريق وهي مبتاسمة) نحاولو منتعطلووش بزاف خاص ندوزو عند زكية نخرجوها معانا..

جالسة على السرير كتفرج فالمجلة وتسوط بملل وتلعب فشعرها كل مرة تهز تيليفون طل عليه .. كاتلقي يوسف مصوني عليها ولكن رافضة تجاوبو .. كملات تفراج فالمجلة حتى صونا ليها من جديد زفرات بغضب بغات تجاوبو وهي تلقى خولة وفتحات لخط..