أنتِ أنثى (باللهجة الجزائرية)

الحلقـة 9

شدها من تريكوها طلعها لعندو حتى تقابلت مع وجهو وقال: شرايك نديروا عرض على المباشر وغمزلها...هنا عرفت وين لحقت روحها ولات ترجف ....

الراجل: لالة راني نشوف فيك خايفة وين راها الجادورة تاع هذاوين لي كانت تقول ن......

وقبل ما يكمل هدرتو جاه بوكس ثلاثي الابعاد حتى نيفو رعف جبدها من يده شدلها يدها وهو مزير عليها حست يدها راح تتقطع
 
أسيف: فمك تخيطو....
رفع راسو للحظور لي قاعدين يتفرجو وكمل قال...خلاصت المسرحية ايا تفظلو ..دنا ليه الراجل لول لي ضرباتو

وقال: صحيت بات مان (سفق) تقدر تحكم بلاصتك ولا معجبكش العرض هايليك الباب وخلينا نكملو شغلنا معاها...

دينيز: على حساب شوفة أنت متترباش*****(سباتو)

دار ليها أسيف وزاد شد على يدها كثر وقال: ضك أنت متبلعيش.

دينيز: واش دخلك أطلقني خليني نريبلو سنانو يشوف 

مع هذاك الراجل كان رايح يضربها كف أسيف جبدها لعندو ورفدها وهي قاعدة تفرفط بين يديه وتعيط مخليينهم موراهم يحلفو ويغلو غليان من الإهانة لي تعرضولها....راح لطونوبيلتو هي مع شافتو فتحها قوات في العياط وبدات تضرب فيه جا غيث

غيث: وين بيها ؟

أسيف : ركب سوق أنت في طريق نقولك وين.

أسيف ركب دينيز من اللور غلق البيبان ونطالق مع لي بدات طونوبيل تتحرك قوات دينيز في التحراك حكمها أسيف مليح ربطها ربيط بيديه ورجليه وهي الدموع محجرين بين عينيها تخزر فيه خزرات أسيف مقدرش يطرجمهم غرق في بحر عينيها الزروقة الغامقين وستحلى جسدها الصغير وعجباتو ملامحها الجامدة لي يشوف فيها القوة لي تتصنعها ....

دينيز مكانتش مخالفة عليه لأنو جامي في حياتها واحد دافع عليها ولا حوس يحميها تصرف عجبها بصح في نفس الوقت نرفزها بسك هي تحب تعتامد على نفسها متحبش لي يعاونها ...زاد غيث سرعتو وهنا تقلبت دينيز بعدما هدات ناضت تعيط بأعلى صوتها وملامحها تبدلو كأنها مرعوبة أسيف تنفض من الصورة لي ترسمت عليها خاف كشما يصرالها
أسيف: حباااااااااااااااااا­اااااااااااس.........يتبع

                    #أريولة
____________________
بااااارت خفيف في خاااااااطر الدرااااجي ❤😍

رايكم توقعااااتكم فرولاتي 🌺
زعمة دينيز علاه تقلب وجها ؟! واش هو السر شراااااكم تخمووو ابدعوني 😍

متنساااااوش فوت في طريقكم على الأقل 10 و كومونتيييو بين الفقراااااات 💋
تشااااااو في لامان 👋