أنتِ أنثى (باللهجة الجزائرية)

الحلقة 60

نهار جديد كانو قاعدين تاليا وريمان ودينيز في بيت دينيز 

ريمان :علابالكم بعد غدوة عيد ميلاد أسيف حايرة واش نشريلو
 
دينيز :اي صح راح كامل من بالي مزية فكرتيني ..

تاليا : نغنالمو أنت لولة لي تتفكري ..حب آخر زمان ..

دينيز:شوف شوف شكون لي راها تحكي 
المهم لازم نديرو حفلة ..

تاليا : أنا دوك نحكي مع غيث نخيرو بلاصة شابة ونشوفو مع الديكور ..

دينيز : و أنا وريمان نروحو نخيرو واش نلبسو ونكملو الناقص ...

ريمان :اوكي يالله قومو معندناش وقت 
جوزو نهارهم كامل يوجدو كل واحد فيهم بيمن مكلف ....

كان أسيف حابط في الدروج حتى لقى باباه يقرا في الجرنال مراهش يحكي معاه غير حاجة خفيفة ولضرورة فقط أصلا كي ربح مباركلوش ...

مالك : كبرت وولات عندك خبرة ودرب وتزيد تربح ممممم إنجاز كبير..

هو فرحان بيه مي كبرياءو مش مخليه ماشي حاب يتراجع على كلامو مش حاب يعتارف بلي تفكيرو غالط ووليدو نجح في طريق لي خيرها ...

أسيف : وي البوكس نحبو و الحمد الله ربي قدرني ونجحت فيه ...

مالك : إيه هذا ميمنعكش باه تخدم في الشريكة ...

كبس على قبضة يدو يعني بعد كل هذا مزال شاد الصحيح في قرارو مش مسلم فيه مراحش يخليه يتنفس بحرية لازم يبقى في جناحو ...

مالك بقى يتفحص في الجرنال ببرود ويحكي :شايفك سكت نفهم منك راك موافق ...

أسيف حاول يهدي روحو ويهدر بلاعقل:لا لا ماشي موافق من نهار قلتلي وأنا رافض ..

مالك : ممممم يعني آخر كلمة

أسيف : إيه آخر كلمة 

مالك :عارف بلي راك عايش في دار وتاكل في ماكلة دراهمهم جاو من شاركة هذي لي راك كارها ..

أسيف حمارو عينيه وبدا غشو يبان مقدرش يتحكم في روحو أكثر من هكا : يعني يا نكون تحت جناحك يا ماشي مليح ...انتعمن هذي تع بابا ..حواجي تاني من دراهمك يعني إذا مخدمتش في شريكة أنتاعك أنا ماشي مليح يتسما هكا راك حاسبني زيادة في الدار هذي لي عايش معاك لازم يخدم باه ياكل و يرقد راني كاري في دارنا مزية طونوبيل بدراهمي ...مسح على وجهو بغش

مالك : شت كي تفهم ..

أسيف :نن أنت بيك باه معارفك يشوفو ولادك ديما تحت جناحك وتبان تتحكم فينا هذا واش حاب أنت خويا الدومان هذاك حبو دخل فيه أنا ميدخليش في راسي نكرهو وقريتو غير با تخطي راسي بسك صدعتني بيه ...

جات ووعد وفاء يجاراو كي سمعو لعياط ..

أسيف :نقولك حاجة دراهمك شبع بيهم دارك تنعم بيها وشاركتك أخلد فيها علابالي أنت واش حاب هايليك الدار أنا نعيش بحاجة من عرق جبيني نحب نتمرمد تسالني ومن غدوة متزيدش تشوفني تبقى على خير ...

خرج وخبط الباب وعد بقات تبكي لطالما كانت علاقتهم هكا كل واحد فيهم يحب رايو ويشد فيه الصحيح ...

رفد التيليفون عيط لغيث غير ليه يشكي ويسمع
 
أسيف :ألو غيث
 
غيث : واشبيك أسيف تبان مقلق 

أسيف : نتلاقاو وين موالفين ونحكو 

غيث : راني جاي ....قطع

غيث :زين عاون تاليا بيدما أنجي 

زين :وين ؟

غيث :وحد الشغل ونرجع ..

تقريبا نص ساعة كان قاعد قدامو 
غيث :غير الخير يا صاحبي خوفتني عليك ؟

أسيف :سي مالك .........حكالو كلش

غيث: و أنت واش حدير ؟

أسيف :كيما كنت نقول مقبل نسافر 

غيث : أسيف من عقلك تحكي ..تم كنت براسك دوك نن ودينيز واش يصرا فيها؟

أسيف : توالف كيما والفتني وانا قدامها توالفني وانا بعيد ..

غيث :عارف لي تحكي فيه حتى علقتها بيك تعرف واش صرالها من قبل وكيفاه ولات وحتى كيفاه وثقت فيك وحباتك وكلش وأنت دوك ....

أسيف :أنا خلاص زادت القطرة لي تفيض الكاس منقدرش نزيد نعيش معاه.

غيث :بدل سكنة ..بدل ولاية ماشي تروح لبلاد خلاف كامل..

أسيف : نن لازم نكون بعيد باه نكون روحي بروحي ..دينيز طفلة قوية فترة وتجوز عليها نرمال ...كيما تغلبت على لي صرالها مقبل راح تنسى تقدرلها 

غيث : و أنت تقدر تكون بعيد عليها ؟ حتى انت منحت قلبك فرصة وحب كيفاش دوك تروح وتستسلم بعد كل هذا تمدلها ظهرك ...كيفاش تواجها كيفاش راح تحكيلها !؟

أسيف :عارف إذا قابلتها مراح نحكي والو ومراحش نقدر نودعها على هذي راح نروح بلا متعرف و انت متحكيش...

غيث :عارف بلي هي توجدلك في حفلة لعيد ميلادك فرحانة بيك باش تشكرك كي وقفت معاها وانت تقابلها بالهروب هي تحاول تزيد تتقرب منك و أنت ترجع عشر خطوات للور ؟

أسيف :***** نسيت يمات عيد ميلادي يا *** حاير يا غيث و الله حاير ..

غيث :فرحها دينيز متستاهلش تتصرف معاها هك..

شد راسو بين يديه يحسو باش يطرشق من الموقف لي
تحط فيه ......

                     #أريولة
___________________
رايكم توقعااااتكم 😈 زعمة يحظر الحفلة ولا يروح بلاميشوفها ! ردت فعل دينيز زعمة كيفاش تكون ؟!

باه نقوللكم مابقاش و تخلاص لحكاية 😊

متنساوش الفوت وكومونت في طريقكم تهلاااو 😍 باي تشاو في لامان 👋

اقراااااو الرواية تاع غابة كالفودرين من فضلكم 🙇🙆😚