أنتِ أنثى (باللهجة الجزائرية)

الحلقة 62

الحلقة_62
كلهم تفجعو كي شافوها دير هكاك راحت تاليا تعنق فيها وتهديها أما زين مكنو لعصب من جاست أسيف بقى يغلي من داخلو راح شد غيث من كول الشميز

تكلم وهو لاز على سنيه : كنت عارف بلي رايح ومتكلمتش ن**** تاع أسيف يجي نهارو ندمو على الدقيقة لي فكر فيها يروح ويخليها علاش يخمم في روحو برك علاش علقها فيه وراح وخلاها علاش مشرحتلوش وقنعتو باش يبقى على الأقل كان يحكي معاها ...تعرف أقسم بالله كشما يصرالها مندمكم انتوما الزوج وموتكم على يديا .

غيث طبعو باش يبعد عليه : في حسابك مفهمتوش محاولتش نقنعو باه يكون في بالك دينيز نعرفها قبل ماتعرفها أنت ومن نهار عرفتها نعتابرها ختي صغيرة ومقامها مقام ريمان حتى أنا منحبش عليها مي متنساش أنت و أنا عارفين أسيف إذا دار حاجة في راسو يكون واش يكون ينفذ لي يخمم فيه ...مي واش علابالك أسيف حجرة مش عبد كيفنا عندو قلب يحس بيه تعرف علاقة بباباه كيف ديرة مش لازم نفسرهالك مي مام هو راح يعاني في بلاد جديدة بعيدة على ناسو وصحابو وحبيبة قلبو محبش يقابلها خايف يتراجع وهو ماشي وقتو خصو يبني روحو بروحو باه يحطم غرور باباه زين متكونش أناني و الإحساس بالغربة أنت راك مجربو ...

كلام غيث صح زين ملقى ميزيد يقول غير أنو يواسيها ويبذل جهدو باه تتخطى لي صرا وتنسى ...
كانت آمال كبيرة في هذي ليلة باه يعيشوها جميلة وتبقى ذكرى حلوة من حياتهم مي تجري الرياح بما لا تشتهي السفن رجعو لديورهم زين مفارقش دينيز لحظة وهي مستمرة في النحيب تحس كلشي خسراتو الحب لول في حياتها خانها تمنات بقات كيف كانت بنت مخبية وسط لباس ذكوري تعيش كيف تحب واحد ميفرض رايو عليها تمشي غير واش يقوللها راسها متتعلق بحد متحب كتلة متحجرة تعيش كل نهار لنهارو مسحت دموعها حاولت تهدي أنفاسها باه تحكي مليح..

دينيز :زيزو تقدر تروح راني مليحة ضرك خلاص خصني نرقد ..

زين : أوكي براحتك ..سلم على جبهتها : منحبكش تزيدي تبكي ...

هزت راسها وهو خرج وخلاها على راحتها راحت وقفت قدام لمراية تخزر في روحها وتتكلم وحدها : كنت نحب نولي بنت كيف لبنات وهاني وليت نلبس كيفهم نعمل شعري تسريحات كيفهم وحتى مكياج وروج وبفضل شكون هذا وبمساعدة شكون أسيف ...أسيف لي علاجالو قررت نتاخذ خطوة ونحب حتى أنا ونعيش واش يعيشو ناس ونحس كيف يحسو يقولو دنيا تجارب هاه حتى أنا راني نجرب في بالك راح ندفن روحي ونرجع كيف قبل علاجال أنك تخليت عليا ههههه ...ضحت بستهزاء...غالط في حساباتك أنت لي كونت هذي الأنثى و أنت حبيت تكون هكا أما باه نوريك واش قادرة ندير راح نرجع مرأة وعليا لكلام مش غير في مجال البوكس راح تتعرف على دينيز لمرأة لي عمرك تخيلت أني نرجع كيفها ترقب أخباري سي أسيف إذا مندمتش على روحتك هاهو وجهي ..

تبسمت إبتسامة عريضة طبعت قبلة على لمراية كأنها تقبل في روحها ...

قلعت الطيارة هو فيها وقلبو عند دينيز يتسأل كيفاه صرالها مور لخبر حاس روحو غلطان في حقها أما مكانتش عندو شجاعة باش يواجها ويخبرها برحيلو دعى تكون بخير وربي يقدرو على تحمل فراقها ...

                         #أريـولة
__________________
وهاي الحلقة أخرى زعمة دينيز واش راها تخطط !!

رايكم و توقعاااتكم كيف العادة ومتنساوش الفوت مع الكومونت في طريقكم ❤💓

باه نقوللكم كاش حلقتين و تخلاص حكايتنا و نباشر في حكاية جديدة مع أبطال جدد باه تحبوهم هوما ثاني ❤💋 متشوقين ؟!

اتهلااااو في الحلقات باه غدوة ان شاء الله نحطلكم الحلقات 💓

باي تشاو في لامان 👋