أنتِ أنثى (باللهجة الجزائرية)

الحلقة 58

دخلت دينيز وتاليا لدار لقات مرهف و روانا يستناو فيهم بسك طولو بزاف وراه نصاص الليل ....

مرهف : اييي سي شباب انتاعي حتى لدوك باه تدخل لدار ولينا منشوفكش اسيدي وجهك ونسيناه كي داير أنا قلت تبدلتي مي ظهر مزالك ولدي ..
.
حكت دينيز راسها : كنا في السبيطار  راحت عنقاتو ظاهر توحشتني نصفرلك عنك شحال مسمعتش زقزاقاتي ..

روانا :غير لخير واش داكم لسبيطار

دينيز شدت مرهف من كتافو : راح يجي وليدك متبقاش تعيطلي ولدي فاهم ..عقدت حواجبها زعمة تهدد فيه ..روانا مرهف مفاهمين  والو

روانا :شتحكي انت ؟

مرهف: دينيز مديلي زبدة الهدرة وبركاي متروبي في لبن ...(جعت ههه)

دينيز : علابالكم شكون لقيت ؟

روانا ومرهف في وقت واحد:شكون؟

دينيز : لقيت خويا ...أنا لقيت فرد من عيلتي الحقيقية ..

هوما :خوووك !!

دينيز : أقعدو نفهمكم ........راحت تحكيلهم بالتفصيل الممل من نهار عرفاتو ..

مرهف : الحمد الله يا بنتي هاكي لقيتي ريحة والديك ..

روانا مسحت دموعها : هاو ربي ستجاب لدعواتك وأخيرا بعد هذو لسنين لقيتي لي يعوضك عليهم ماعليش ووالديك ربي يرحمهم ...

دينيز : مي كاين مشكل !

مرهف :لي هو بلاك نقدر نعاونك

دينيز : زين حباتو يجي يسكن معانا هنا أنا مانيش حابة نروح نعيش معاه ونخليكم وهو أكيد اذا عرضتلو انا الفكرة راح يرفض

مرهف :هذا مكان ..أنا نقنعو غدوة نروحو نطلو عليه ..

روانا : متخميش راح نجيبوه ..ايا روحو ريحو شوية وغدوة نروحو نشوفوه ..

دينيز : إن شاء الله ..تصبحو بخير

غدوة من داك راحو لسبيطار دخلت دينيز هي لولة

دينيز :صباح لخير زيزو عندي ليك مفاجأة أكيد باش تعجبك

زين : صباح نور وريني نشوف

فتحت الباب دخلتهم : ترااااااا هذو هوما لي رباوني عمو مرهف وطاطا روانا
مرهف خمس معاه وروانا سلم عليها

زين :متشرفين

دينيز : وهذا أسيف وغيث وهذو زوج تعرفوهم (تقصد تاليا و ريمان) دينيز حكت مؤخرة راسها :راني نحس روحي وزيرة العلاقات الودية ههه

مرهف :زين راح نشوفو وقتاش يخرجوك  و مرحبا بيك عندنا ....

جا زين يحكي قاطعاتو روانا : باش تعيش معانا ومثلك مثل دينيز بنتي عمك مرهف كان يعيطلها ولدي هاو ربي بعتلو ولد بحق وحقيق ..

ضحكو كلهم كي تفكرو دينيز كيف كانت وبقاو كامل يحكولو عليها وهو يخزر فيها ويضحك على زبايلها ..

أسيف : هي صح تبدلت فيزيكمو مي عندها واحد كسوحية الراس بالمارطو ويا ربي يتكسر ..

دينيز عكرت فيه وقعدت تتحلف فيه وهو شاخ ضحك على منظرها ...
________________
      بـــعــد شـــهــر بـــالــتـقريــب
كانت دينيز مع أسيف في غرفة التبديل كان يديرلها في البونداج ويحكي معاها

أسيف :دينيز جاهزة

دينيز : وي

أسيف : ركزي في الاول تكتاشفي نقاط ضعفها خلي ضرباتك قوية راكزة مدروسة منستحق حتى غلطة تافهة اذا دخلت رجلك الحلبة...

دينيز :نخرج منها رابحة ..

أسيف : مليح راكي عارفة واش نحب تفكري صح راكي ناجحة مي نحبك تنجحي كثر وكثر نحب لبلاد تتزعزع وهي تهدر عليك نحب كل كبير وصغير يعرف دينيز واش قدرت تعرف ياك مابقيتيش ..

دينيز : دينيز لقديمة ..

سمعو الجرس لي ينادي على الملاكمات كمل لبسها القفزات واللازم راح خارج حط  يدو على مقبض الباب عاود دار لقى دينيز وراه جوست سحبها من خصرها حصرها مع الباب دينيز حلت عينيها على وسعهم مش فاهمة واش يحب يدير

أسيف :فرحيني بيك ...طبع قبلة جنب شفافها

هذي الفازة دخلت دينيز في الحيط روهجتها خبطها أسيف باه تفيق من سرحتها

أسيف :مش وقت لي دوخيلي أخرجي مبارات تستنا فيك ...

دخلت المدراجات كلها معبية بالناس الخصم انتاعها كانت واجدة خذات وضعيتها بدا النزال .....يتبع

                     #أريـولة
___________________
وبدينا مرحلة المباريااااات 😍 زعمة تنجح دينيز !؟

رايكم في الأحداث !! نحتاااج تعليقاتكم باه نعرف تخمامكم وين راهو يدور 💋

المهم تهلاو في لي بارتي متنساوش الفوت 🌸 مبقالي غير نقوللكم تشاو باي في لامان 👋