أنتِ أنثى (باللهجة الجزائرية)

الحلقة 55

بعـــــد ثــلاثــة أيــــام 
(عجبتني كتبتها بالعربية الفصحة كشغل كيما تاع الافلام هههه)

كان قاعد مقابل لبحر يخمم في لي صرا من ثلث يام علاه من نهار شافها إحساسو يقولو هي ..علاه يحسها تشبهلو ..وفي تصرفاتها تفكرو بيها ..هي صح لوكان مزالت معاه راها في عمرها دوك ...علاه راه يحس هكا وقلبو يقولو هي لي تعبت وشبت وانت تحوس عليها اللويزة أنتاعك لقيتها زيين بعد كل هذي لسنين ...حس روحو غالط في حقها بلاك هذي مجرد تخيلات برك و إحساسو 90% غالط ..رفد تيليفون حدد لمن يعيط وقعد يستنا ترفد..

دينيز : ألو ...شكون معايا

زين: أ..أنا..تردد باه يحكي معاها في الأول انبعد كمل: أنا زين دينيز حاب نحكي معاك ..

دينيز : إيه لازم نحكو تفسرلي علاش درت هكاك ..

زين : و أنا على هذي حاب نحكي معاك 

دينيز: وين نتلاقاو 

زين : في ****** 

دينيز : حق الطريق ونجيك ..

ركب طونوبيلتو متوجه لغايتو باش يتلقى بيها خلاص وصل للآخر من هذي لحكاية اليوم يكشفلها كلش وباش يحكي وتحكيلو ويشوف إذا إحساسو في محلو إذا كان صح راه نجح ولقى لي فنى عمرو غير باش يلقاها وإذا لالا....

مجرد الفكرة خلات عينيه يغررو بالدموع بقى في المد وجزر مع أفكارو مركزش مع طريق حتى سمع صوت تزمار الطنوبيل داير حالة وصوت خبطة قوية بعدها غاب على الوعي ....

وصلت للمكان بصح زين مكاش بقات تسنى حتى صونا تيليفونها من جديد ظهر على شاشتو نيمرو تاع زين ..

دينيز : زين راني وصلت و......مخلاهاش تكمل صوت مش صوت زين ..

-ألو مدام أنت آخر وحدة هدر أمعاك مع الأسف السيد هذا دار أكسيدون أرواحي لسبيطار ******.......مدام تسمعي فيا ألو .

النفس نقطعلها من هول لخبر و المصيبة لي طاحت عليها دموعها ممبا مطلبوش الاذن باه يطيحو فاقت كي سمعاتو يقول ألو ...ردت وهي تشهق 
دينيز :نسمع فيك قولي وين ....ااه اوكي دوك نجي ..

طلعت تجري في أول بيس قابلها دموعها محبسوش جسمها كلو يرعش شبيها خايفة عليه هكا وهي ممبا شهرين ملي عرفاتو وصلت وين سبيطار خرجت طايرة ساق أعلى من ختها حابة تشوفو وتطمن عليه واش سر الخوف الزايد هذا عليه شبيها تحس روحها تعرفو من زمان وهو حاجة تخصها وكأنو قطعة منها ...

حالتها كانت ترعب أول فرملية لقاتها ساقساتها 
دينيز:وين راه اللي جابوه دار أكسيدون راه مليح ؟؟ مصرالو والو ؟؟

الفرملية :اقعدي مدموزال نجيبلك ما تريحي شوي راه في غرفة العمليات ..

دينيز :راني مليحة قوليلي وين جاية ..

فرملية :تبعيني نوريلك وين ..

وصلتها قعدت في كرسي كان قدامها عيطت لغيث حكاتلو .. وهي قاعدة شافت تاليا وريمان وقفو عند راسها نخلعو من حالتها وبقاو يهدو فيها زاد تبعهم غيث خرجت فرملية تجري 
غيث :راه مليح ؟؟ 

دينيز : طمنينا عليه ؟؟

فرملية : شكون من عايلتو ؟؟

غيث : علاه تحوسي على عايلتو حنا صحابو ..

الفرملية : نحتاجو دم في أسرع وقت من الزمرة O- معندناش إستعداد نخاطرو بحياتو و نضيعو وقت زيادة على هذا فقد كمية دم بزاااف ..

الزمرة نادرة وهوما زمراتهم مختالفة 

دينيز: أنا نتبرع أنا زمرة أنتاعي O-

الفرملية :مدموزال ارواحي معايا باه ينحولك ...

3سوايع جازو و العملية مزال مخلاصتش غيث : أسيف ...

تخامسو 
أسيف :واش راه ..

غيث : مزال ممدولنا حتى خبر شبيك طولت ؟

أسيف : علابالك كنت مسافر وكي سمعت راني جيت ..وينهم لخرين 

غيث : راهم كيما غرفة العمليات ..

راحو لعندهم قعدين كيف كيف مي كل وحدة وين سارحة تخمم وتدعي دينيز لاشافت أسيف راحت تجري تحظن فيه مام هو رجعلها التحظان غرسها في ضلوعو ويديه مررهم على ظهرها يهدي فيها ...شد راسها بين يديه 

أسيف:واش جابك هنا دينيز ؟؟ لاه رايحة لعندو مكفاكش لي دار فيك ؟ كي سمعتي علاش معيطتيليش لوكان ماشي غيث لي حكالي منسمعش ؟

دينيز:عارفة بلي عندو سبة باش دارلي هكا وهو حكى معايا باش يفسرلي دوافعو مي....طرطقت بالبكا مرة أخرى

غيث: أسيف مانا لا في البلاصة لا في الوقت المناسب باه تحكي هكا ..

عاود خزر في دينيز لقاها تغمض في عينيها بعدها اووووب جات طايحة رفدها بين يديه ضربها بكفوف خفاف باش تفطن لكن والو ..

تاليا : أنا نروح نعيط لفرملية ..

ريمان : هاذا سوغ كي تبرعت بالدم ..

أسيف : تبرعت بالدم ؟؟ لمن ؟

ريمان : لزين 

داوها لغرفة منعزلة دارولها اللازم خرجو وخلاوها ترتاح .....

                     #أريولة
_________________
مسااااءووو حبيباتي 💋💓 وينكم واش راكم ؟!

رايكم في الأحداث !!

متنساوش فوت في طريقكم مع تعليقاتكم 💋 مزالت نحطلكم حلقة ...~