أنتِ أنثى (باللهجة الجزائرية)

الحلقة 13

راحوا لصالون قعدوا كامل دينيز جابت لبرية لي لحقت ومدتها لعمها

مرهف: ااه يا دينيز استدعاء ثاني شكون دنا ليك 

دينيز : كي لعادة قلقوني وضربت 

روانا: يا بنتي شحال من خطرة قلتلك مديريش هدرتهم حكاية في راسك خلاص ضرك راكي كبرتي .

دينيز بقات ساكتة بسك هذي الهدرة ديما تسماعها ومكاين حتى جديد فتح مرهف لبرية لي بعد مقراها وجهوا تبدل وهوما بقاو مخلوعين فيه 

روانا : غير الخير مرهف وجهك راه ميتفسرش
 
دينيز : واش كاين

مرهف: راهم يقولوا بلي فصلوك من المسيد .

روانا: ااااوخظي كيفاش هذي فصلوها ..وهي حاطة يدها على صدرها دينيز بقات ساكتة كأنها توقعت هذا الشيئ وكان علابالها بلي يجي نهار وين يطردوها 

مرهف: غدوة إن شاء الله ونروح نشوف معاهم متقلقيش

دينيز: منيش مقلقة غدوة وتبان أيا تصبحوا بخير 

بعدما خرجت دينيز
روانا : شفت مرهف دلالك وين يوصلك مدخلها تتعلم جيدو من نهار تعلمت متهنيناش ديما يشتكو وانت رجليك حفاو من المرواح والمجي من اللسي وكل يوم بروبلام جديد أنا قلتلك راها طفلة من لول مكنتش حبتها تدخل لجيدو

مرهف: روانا أنت علابالك و أنا علابالي همال غير شدي عليا فمك 

روانا: مي اليوم مراهاش عاجبتني الله يجعل الخير هذا واش نقول 

مرهف: ان شاء الله ميصرا والو .

دخلت ريمان لبيت أسيف باه تعيطلو يحبط يتعشى مي لقاتو في سابع نومة باين عليه عيان ولات غلقت التاقة وخرجت بلاحس.

أما دينيز فتحت باب بيتها بدلت حوايجها وتخشات في فراشها رقدت على كرشها حظنت لمخدة ورقدت تأخر الوقت وكلهم في سابع نومة غير دينيز لي قطرات لعرق على وجها ووجها يبان فيه راها تشوف منام ميعجبهاش .......

طايحة في الارض راسها سايح منو الدم تشوف طونوبيل لاهبة وغاشي بزاف حواليها تسللت من بينهم وهوما من الكارثة لي صرات واحد ملاحظها حادث سير خطير بزاف خلى عدد كبير من الجرحى و القتلة و خسائر مادية كارثة صرات طفلة في عمر السنتين تبكي وتخزر في طونوبيلتهم لشاعلة فيها النار حارت وين تروح كانت فورڨوا مقلوبة بابها لوراني مفتوح من برائتها حسبت والديها وخوها مخبيين لداخلها دخلت الداخل وقدا تعيطلهم من الدحس لي صرا واحد غلق باب الفورڨو وخلاها محبوسة بدات تبكي وتعيط مي واحد مسمعها باتت ليلتها تما مع لبكى والعياط لي كانت فيه عيطت فيحقيقتها لي خلى لي كانوا راقدين ناضوا مفزوعين وراحوا يجروا لبيتها ........يتبع

                     #أريولة
________________________
واش رايكم ؟!
البارت صغير اليوم تقتلني الدراجي 🙈🙊 هذا لي كتبت زعمة واش راح يصرا لدينيز ؟
مزالت أحداااااث نااااار 🔥تستنا 😈 وعفايس متتوقعوهمش 😌

متنسااااااوش فوت في طريقكم وباه نفكركم راني نحط في رواية غابة كالفودرين رواية خيالية من فظلكم أضربو طلة عليها 💖💋

تشااااااااااو في لامان 👋