أنتِ أنثى (باللهجة الجزائرية)

الحلقة 50

كانت راقدة حتى حست تيليفونها يصوني لقاتو أسيف ...
جوباتو ومزال غالبها النوم:ألوو خير مع صباح ربي..

أسيف: بلوطة نوص ساعة تكون حاظرة عندي في صال ..

دينيز: بدا الحكم العسكري بفففف خليني نزيد نرقد شوية ..

أسيف :الوقت بدا تفوت نوص ساعة تعرفي العقاب...

وصلت عندو مع الدقيقة اللخرة..
أسيف:30 تأخير صغير كان راح يكلفك غالي ..

بون عندنا .........ملى عليها جدول نهار بدات تدريباتها تنفذ في كلامو بالحرف الواحد بعدما عيات أعطاها إستراحة جمع قدامها سقساتو

دينيز:أسيف مش قولتلي محظرلي مفاجأة كي تجي وباش تعجبني بزااف

أسيف:إيه قلت ..

دينيز :وينها ؟

أسيف:و أنا جبتك باه نمدهالك ..

ناض من قدامها راح جاب برية عاود قعد سلمهالها

دينيز:واشنو هذا؟

أسيف: إفتحيها

فتحتها لقات ورقة مطوية داخلها كانت إستمارة لقاتها باش تشارك في المسابقة الجاية بدات تصوطي من الفرحة مش مأمنة لي تشوف فيه بين يديها 

أسيف : وهاكي راح تشاركي نستحقك تفرحيني وتجيبي الميداي دوري ..

دينيز:إن شاء الله..أسيف نسقسيك في نهائي كي كان متغلب عليك الخصم وطحت في الأرض واش لي خممت فيه باش رجعت ودرت عليه ..

تبسم أسيف عارفها تلاحظ كلش :من الاول خممت فيك ..

دينيز تكاكات مع روحها :ك..كيفاه..أنا؟

أسيف :ايه انت تفكرت اصرارك والارادة لي عندك هاذو حجات ملاح فيك نحبك متخسريهمش وثاني حاجة.......سكت

دينيز :كمل علاش سكت؟

تنهد أسيف:ثاني حاجة بابا السي مالك تعرفي دينيز واشنو تحسي كي يكون باباك معارض لي تخدم فيه هو يحسبو حاجة تافهة في حياتك وانت تحسبيه قداسة وحاجة نص محياتك ؟؟ يحب يفرض قراراتو عليك وبان هو صح وانت طول عمرك خاسرة ؟؟السبب كان هو باش نبينلو راني ناجح في الدومان لي خيرتو وباه نزيد نطور ونخلي كل الناس تحكي عليا باه يعرف واش ربى وواش راه عندو في الدار...

حطت دينيز يدها على كتافو تواسي فيه :مي رغم كلشي باباك ويجي النهار لي يحن عليك ويعرف روحو غالط ...

أسيف:شوفي واش حققت ومجاش ممبا باركلي تخيلي ملي جيت الحد الآن مزال مقابلتوش..

دينيز:بلعقل برك أحمد ربي عندك عايلة من لحمك ودمك تعرفهم كي تشوفهم صباح وعشية وبصحتهم لاباس هذيك هي الدنيا وما فيها ..غيرك يحلم بوالدين كان لي ماتو كاين لي مش عارف اذا يتنفسو ولا تحت التراب حتى ميعرف عليهم شي ....

حبطت دمعتها كي تفكرت روحها بزربة مسحتها أسيف حس عليها
دار جيهتها حظنها وهي تم وين زادت قوات في البكا ومنها تحكيلو معناتها وهي عايشة في وهم أنهم مزال عايشين ورغم كل سنين مزال مفقدتش الأمل ...
     
                       #أريـولة
____________________
وهذا البارت الثاني 😚 شرايكم كي دينيز راح تشارك في المسابقة ؟ زعمة يجي نهار لي تتلقى فيه عايلتها !!

جاوبو على الأسئلة و مدولي توقعاتكم نحو المستقبل 💙

أيا هيا بونوي ....~
باي تشاو في لامان 👋 البارت قصير سمحولي 😅