أنتِ أنثى (باللهجة الجزائرية)

الحلقة 10

لزوج ستغربوا من ردت فعلها مع العيطة لي عيطها أسيف حبس غيث وحالة دينيز تقول وحدة مهبولة شادة راسها بيديها...

عينيها مغمضتهم وتعيط ، فتح أسيف الباب وخرجها مع لي خرجها ناضت تضرب فيه بطريقة هستيرية وتبكي .

أسيف مدناش ليها خلاها تاخذ راحتها وغيث يخزر فيهم لزوج مافاهم والوا كي عيات من الضرب طاحت في الارض تبكي وتشهق حبط لمستواها أسيف وعنقها مفاقش لعمرو حتى لقى روحو محاوطها بين يديه وربت على ظهرها باه تهدى ..غيث حل فمو ..بقى باهت في واش راه صاري....

أسيف: شششششش مصرا والوا خلاص .

دينيز: جج..يبل..ي v..يلو..يا ...بصوت متقطع بيه غصة

أسيف: هذا كامل على جال vيلوك دوك يجبولك.

أسيف خزر في غيث لي فهم واش لازم عليه ركب طونوبيل وراح يجيبلها vيلوها.

أسيف: هاو راح يجبهالك خلاص ريحتي.

مسحت عينيها بطريقة طفولية حاولت تخبي الخوف لي جتاحها .

دينيز: متخزرش فيا هكا قدرة على شقاية ومتزيدش تدخل فيا ولا في مشاكلي وماشي كي بكيت وعيطت معناها راني خايفة لالا أنا لي يدنا ليا يخلصها غالية مبقيتش دينيز لي يعرفوها ضرك وليت نعتامد على روحي ومكانش لي يجرأ يدنا ليا مبقيتش ضعيفة كيما عرفوني خلاص دينيز لي كانت ماتت.

أسيف: وين بيها بهاذي العقلية مهما تسيي تخبي بصح تبقاي طفلة

خزرت فيه بجدية دينيز: طفلة وقوية ..منحبش ليستصغرني ...

أسيف: كي قوية لبكى علاه ؟؟ وكي تقولي متخافيش لبكى والعياط هذاك لاه الكل ؟!

دينيز : حاجة متخصكش ..الحاجة لي لازم تعرفها راني قلتلك عليها.

أسيف: صح تضربي مي متلحقيش قوة الراجل ومهما ديري تبقاي طفلة خطيك من هذي التصرفات واللبسي لبسة تليق ببنت ماشي ذكر .

دينيز: دبر على سروالك كيفاش تلبسوا مدبرش عليا.

أسيف: لسانك طويل ولاحظت السبان عندك كشغل راكي تهدري نرمال.

دينيز: واش دخلك يا **** نقول لي عجبني أووو.

أسيف : ظاهر والديك مدللينك بزاف ولي تقولي عليها تحظر.

هنا عينين دينيز ولاو حمر في لحظة نقضت فوقو كي الأسد لي يفتارس في فريسة يحوس يسكت بيها جوعو....ستغرب من التصرف إنتاعها شكلت يدها على شكل قبضة مع جات تضربو حبست .
قالت وهي ترفع فيه من تريكوه حتى قابلها ونفسهم تخلط مع بعض هي عينيها يقدحو نار الكلمة لي تستفزها والديك لي تحرمت منهم ومتعرفش حتى معنى حنانتهم هدرت وهي مزيرة على سينها : والديا خط أحمر منسمحلكش تزيد تجبدهم ..فاهم(بالعياط)

أسيف بقى مخلوع فيها كيفاه لطفلة تنقض عليه هكا وهو البوكسور المشهور يخزر في عينيها لي تبحر في بحرهم جامي في حياتو قابل وحدة كيفها فمو عجز على الهدرة ومالقى مايقول قاطعهم غيث بوصولو

غيث: واش كاين هنا ؟

ناضت دينيز نفظت يديها حكت مؤخرة راسها نحات لغيث الvيلو من يدو ركبت فيها

دينيز: أنساو واش صرا واش شفتوا ديروا روحكم ماشفتوني متعرفوني.

مرجعولهاش بقاو مخلوعين فيها ولي كان مبريزي كثر أسيف لي بزااف أسئلة راها دور في راسوا........ يتبع

                    #أريولة
_______________
توحشتكم 💓💜 وانتوما متوحشتونيش😏 ديزولي على الروطار 😅 المهم الحلقة طويلة نوع ما مدولي رايكم وكومونتيو بين الفقرات بنييييز 😍 الأحداث بدات تطور زعمة علاش صرا لدينيز هكا ؟!

واش بيها !!

وكيفاه راح يكون لقائهم المقبل في توقعكم 😋 ؟
جاوبوا على هذي الأسئلة باش نشوف وين راكم دورو ، حقاااااا قبل ما نودعكم راني حطيت الرواية الخيالية لي كنت حكيتلكم عليها روووحوووو أقراوها 😍
10فوت للبارت ينزل البارت لي بعدو ...تشاو في لامان 👋