كانت سارا ومعها منار في طريقهما الي مكتب سارا ... ولكن ما كان يلفت انتباه منار هو ضحك سارا المستمر دون ان تتكلم معها نهائيا ... كانت تستغرب ما يحدث منها ... وما ان وصلوا الي مكتبها ودخلوا واغلقوا الباب عليهم ... حتي انفجرت منار ...
منار " بمنتهي العصبية " : ممكن بقي افهم ايه اللي بيحصل بالضبط ...
سارا : طب مالك متعصبة كدا ليه ...
منار : متعصبة ليه ... لا المفروض ما اتعصبش وانا كنت زي كيس الجوافة ما بينكم هناك ...
سارا : طب اهدي بس وفهميني ايه اللي مضايقك بس ...
منار : سارا بصي احنا اصحاب من قبل ما نكون مديرة ومروؤستها صح ...
سارا : طبعا ... دا حتي انتي صاحبتي الوحيدة من بعد ما الست مها اتجوزت وسافرت مع جوزها ...
منار : حلو ... وما دام انا صاحبتك الوحيدة ... يبقي ما تستهبليش فيها وتعملي نفسك مش فاهمة انا بتكلم معاكي علي ايه ...
سارا : صدقيني انا مش عارفة بجد انتي بتتكلمي علي ايه ... اهدي كدا وفهميني بدل ما انتي طايحة كدا ...
منار : ماشي هفهمك ...
سارا : ايوة اقعدي كدا وقولي ...
منار : اسمعي بقي ... معتقدش انك كنتي هتحبي الموقف لو كنتي مكاني وسامعة ناس بتتكلم قصادك بالالغاز وانتي واقفة زي الاطرش في الزفة كدا ...
سارا : الغاز ... الغاز ايه بس ...
منار : الغاز ايه ... وليكي عين تسألي كمان ... بجد هتجننيني ...
سارا : طب وضحي الغاز ايه بجد مش فاهمة منك حاجة ...
منار : ماشي هتني معاكي ... عايزة تفهمي الغاز ايه ...
سارا : يا ريت ...
منار : الغاز الست سارا والسيد مكرم ...
سارا : اههههههههههه ... انا ومكرم والكلام اللي ...
لتنفجر في الضحك ...
منار : وكمان بتضحكي ... اضحكي من انتي ليكي حق مش انا اللي كنت واقفة زي الحمارة في النص ما بينكم ...
سارا : بس ما تزعليش ... عارفة انا بضحك علي ايه ...
منار : علي ايه ...
سارا : اصلي الكلام كان واضح ومش الغاز ولا حاجة وانا فكرتك فهمتي من غير ما اوضحلك حاجة ...
منار : لا يا ستي ما فهمتش والكلام ما كانش واضح ولا حاجة وكان بالالغاز ... ايه تحبي افكرك ...
سارا : يا ريت ...
منار : ماشي شوفي ... الاول هو يقولم نفرحلك وبعديها تردي انتي وتقولي تفرحلي والا تسرقني ... وبعديها بشوية كدا تقومي حضرتك قايلة مفيش كلام يتقال بعد اللي اتقال ... كل دا وانا واقفة زي البتاعة في النص مش فاهمة حاجة ... طب منظري انا ايه قصاد نفسي ... ما تردي ... لا وتقوليلي مفيش الغاز ... لما دي مش الغاز تبقي ايه بقي فهميني ...
