نوائب الدهر

11

الـسـلامُ عـلـيـكـم🌻🌼

نوائب الدهر
عبرات_العباديه
الــبــارت_11_
                     alabadyia_09

بذراعين مفتوحتين
اسـتـقـبـلتُ العـالـم
إلّا انــه
لم يفهم لغة العِـنـاق
فابتعدتْ عصافيره هاربة
وكأننـي فـزّاعـة.

~~~~~~~~~~~~~~~~~~~~~~~~~~~~~~~~

سمانه _ ظليت صافنه ودموعي تنزل صافنه بعيونه وهوَ عاكد حواجبه وصدره يرتفع وينخفض يتنفس بسرعه ظليت اشهك وصوت بچيي صار عالي ممتعودة يضربني هاي اول مره يسويهه.

عافني وطلع كعدت ع الجربايه واشهك بحسرة وقهر يكلي صديقه يعني يفضل صديقه عليه غطيت وجهي بإيدي مقهورة تمددت ع الجربايه ولفيت راسي بالبطانيه ظليت ابجي واصرخ اكتم صوت صرخاتي بالمخده واشهك بقهر.

حسيت الباب انفتح ودخل للغرفه تقرب مني شال الغطه همس

- سمانه

جريت الغطه منه بنتره وحطيته على راسي واستمريت ابجي رجع همس بأذني من وره الديباج

- سمانه كلشي ولا زعلج فقدتيني اعصابي وخليتيني اضربج ليش هيج

صرخت بصوت عالي

- وخرررررر عنييييي

زمخ - ووسسسممم لتصيحين مو صوججج صوجييي اني اجيت كبررت راسج حقيييرة

طلع ورگع الباب وراه ظليت اشهك بقهر مرتاحيت من بداية زواجي لهسه بس وياه وهسه هوَ هم صار عليه لعد شهالحظ الي عندي المفروض هوَ يوكف وياي ..تالي هيج يغدر بيه ليش.

اندك باب الشقه كام فتحه لان هوَ كاعد بالصاله سمعت صوت هبه تگله - حسام امي تصيح سمانه تكول خل تجي تطبخ الغده صيحها

سمعته كالهه

- فوتي وكليلهه

- لعد ليش متكلهه انته اني مستعجله اريد اروح

نتر بيهه

- كتللج فوتييي وكليلهه

دكت الباب رادت تدخل اني عدلت صوتي وصحت

- جايييه

مردت تدخل وتشوف حالتي يظلن يتشمتن بيه طلعت وهوَ سد الباب وراهه كمت بدلت لبست دشداشة جديده اول مره البسهه بيهه ضيگ عليه شمرت الشال على راسي ومقدمة شعري كله طالع هيج وقت ادري حمويني طلعو.

حطيت مكياج اخفي آثار الدموع مااريد اصير شمااته الهن شفت أثر اصابعه على خدي دمعت عيوني ونزلت دمعتي مسحتهه وكملت مكياج .. طلعت من الغرفة ومشيت من يمه هوَ عيونه تشخصت عليه صافن فتحت باب الشقه وهوَ صاح

- تعاااااي

التفتتله ببرود

- هاي وياي؟