نوائب الدهر

33

الـسـلامُ عـلـيـكـم 🌻🌼

نوائب الدهر
عبرات_العباديه
الــبــارت_33_
alabadyia_09

وفُتنت بمــاذا سأكــتبُ يا تُرى
وأنا عليك من الحروفِ غَيــورُ
ليَكُن سكوتي في هواكِ طريقتي
فالشعرُ فيك وإن علا .. مبتــورُ

امنيات _ وكفت منتفضه ورافضه كلامه رفض قطعي باوعتله بإستصغار وهزيت راسي بأسف كتله :

- انته واخوك وجهان لعملة واحدة

- اخويه ديتعذب من وراج ماصدگ لگه الي تلم بيته واطفاله وانتي عفتيه اني مرايد شي غير راحة اخويه

- تريد راحة اخوك وظلم بنات الناس، كافي ظلم اتقو الله بنات الناس مو لعبه عدكم وبكيفكم تتحكمون بيهن

- اذا رجعتي لجمال حترتاحين اكثر بالعكس

- مستحيل ارجع لنفس الوحل مستتتتحيييل

رفع ايده يقاطعني ومخلي حد لكلامي :

- لتستعجلين بالجواب يمكن تغيرين رأيج منا لباچر وتوافقين على شرطي انقذي صديقتج لان ماإلهه احد واحتمال اهلهه يكتلوهه وضميرج يأنبج جانت گدامج فرصه تساعديهه ومساعدتيهه وجمال يحبج محاطينج بإيد ابو طبر حتى تخافين منه

- محد شاف العذاب الي اني شفته

- هوَ شنو العذاب عذابيشش والله يايضربج سبحان الميضرب من يعصب وانتي لسانج مو إلج ترادديه

- بس ميحقله يضربني بهالطريقه الوحشيه

- هيه ايده ثگيله ومتعررفين شگد يتندم من يضربج يجيني هنا يشكي عوزه بس دمعته توگع وتعرفين الزلمه شكد دمعته صعبه

رفعت حاجبي ورديت على كلامه بحدة :- صعبه ع الزلمه الحوك مو ع ال....

وسّع عيونه حيل وخزرني بغضب دار راسه وصاح :- كمليهه كملي ليش سكتتي

رفعت اكتافي وسحبت نفس :- لا مااريد اكملهه المهم وصلت

ضحك بإستهزاء :- عمي زين من جمال ومتحمل لسانج الله يساعده

- واني الله يساعدني عليكم

ظل يخزرني بنظراته المخترقه واني دنگت اخذت جنطتي وطلعت من ادارته بدون مااحجي شي ومقرره لو يذبحوني على قبلة الصبه ماارجع لجمال بس من وصلت للبيت وعرفت اديان ظلت تتوسل وتبچي اني على قدر المستطاع احاول اطنشهه واحاول اقسي گلبي عليهه واگول تستاهل وهاي جزاء اعمالهه بس گلبي اخخ من گلبي كلما تصرخ وتشهك تنحط علّة فول العلل مالتي.

بالليل اني نايمه ونومي خفيف حسيت الباب مال الغرفة انفتح وخطف شي من يمي لان اني نايه بالگاع فتحت عيوني وگلبي وگف توقعته جني بس شفته خيال والباب انفتح گعدت على حيلي باوعت للسرير مال اديان ماهيه گبل ركضت نزلت الدرج اركض لگيتهه بالمطبخ فاتحه الگلوب وتدور بالجرارات اجيت من وراهه صحت بيهه :- شدتسوين