نوائب الدهر

14

الـسـلامُ عـلـيـكـم 🌻🌼

نوائب الدهر
عبرات_العباديه
الــبــارت_14_
                          alabadyia_09

البكاء المحبوس يُنشئ وجه شاحب
يطوي وجهك كالورقة المبلولة عندما تَجُف.

~~~~~~~~~~~~~~~~~~~~~~~~~~~~~~~~

سمانه _ بعد إسبوعين وره مابطلت خطبو لاآدم ابن خالته اخذهه على حب الدنيا مخبوصه عدنه والبيت متروس خطاطير والبنات كلهه تبدل وتسرح بشعرهه وتتمكيج واني محتاره جيبي مي جيبي عصير واركض منا ومنا حتى بعدني ممبدله وملابسي مالات البيت عركت بيهن كدما نظفت كلما اريد اروح ابدل يصيحوني والتهي بالضيافه.

حسام مشفته ابد طول اليوم اركض.. ميعاد وشلتهه كاعدات على جهه ويتمكيجن وسوالف وضحك ويشمرن بسامير عليه اني ممهتمه ابد.

حسام كاعد بالاستقبال يم اخواله واعمامه اجه يبدل واني بعدني حتى حصرتني البجيه تعبت حيل.

واكفه ع السنك واغسل بالكلاصات وارجع للصينيه اترسهه بالكلاصات واحط يمهن بطل عصير.. دخل خيال للمطبخ التفتت لكيته حسام تفاجئ شافني كال

- ها شنو بعدج ممبدله

- لا وين الحك ابدل

- دفوتي بدلي وتعالي بدليلي هم

- خل اكمل البيدي

- دعوفيه عوفيه البنات يكملن

سحب ايديه من الصينيه خلاهه ع السنك واخذني من ايدي لفوك دخلنه لشقتنه انطيته ملابسه وبدلت فستان مال مناسبات بس مستور وسويت شعري تسريحه بسيطه نزلنه سويه اني امشي كدامه وهوَ ينزل وراي باوعت لجوه لكيت ميعاد لابسه فستان مال حفلات مصلخ وجسمهه كله بارز خزرتهه والتفتت على حسام لكيته صافن عليهه عاكد حاجبه.

هيَ باوعتلي وضحكت هزت متنهه بثقه ومشت من يمنه اني محجيت شي هوَ دنك وطلع لبره واني رحت سلمت ع النسوان لكيت امي جايه عازميهه سلمت عليهه وبقيت كاعده يمهه لما رحنه لبيت اهل العروس عقدو ولبسو الحلقات وركصنه شويه اني مركصت مالي واهس كلش ضجت رجعنه للبيت نظفت وصعدت لفوك.

ظل آدم يحظر لزواجه يوميه تطلع عمتي ويه ضي خطيبته لما كملو النيشان وحضروله الشقه مالته وأثثوهه حسام انطاه هديه غساله وثلاجه ونص الاثاث عليه بإعتباره الجبير وبمكان ابوهم.

كملو كلشي واليوم زواجه هم نفس الخبصه مال العالم عشينه المعازيم وزفينه العرسان لشقتهم وظلينه نركص جوه.. احتريت كلش رحت لفوك بدلت لبست لبستي الثانيه فستان طويل ماروني ومفتوح من ظهره نزلت لجوه بعدني دامشي ع الدرج وسمعت صوت خشن مال رجال يدندن يم المغسله جوه الدرج.. نزلت بعد لجوه قربت اذني سمعت صوت

- مشتاقيتلي كلبك ميحن عليه مو چنه احلى ثنين وانته كتلت روحك علمودي وعاركت الدنيا كلهه..شبيك حسام شغيرك هيج