نوائب الدهر

2 ج2

الـسـلامُ عـلـيـكـم 🌻🌼

نوائب الدهر
عبرات_العباديه
الــبــارت_39_
alabadyia_09

حسنًا أيّتها الحياة
‏ضعي أوراقكِ على الطاولة
‏وَدَعينا نعيدُ اللعب من جديد ...!!!

امنيات _ مر اسبوع ثاني واني انشلع كلبي اروح للكليه الصبح وارجع الظهر ميته تعب ماالحك انام لازم اساعد البنات بالبيت والبيت شكبره تعبت حيل .. كلت لجمال نرجع واصريت على قراري وافق وكدر يقنع امه بالليل جمعت غراضنه وطلعنه لبيتنه .. هم نفس الشي لكيت البيت طبقة تراب وكعدت انظف من جديد وجمال يصيح عليه عوفيه للصبح بس اني مااكدر انام اذا ممخلصه شغلي .. الساعه ب2 كملت الشغل ودخلت للغرفه لكيته منوم الجهال وكاعد منتظرني وكفت ع المراية فتحت شعري ورفعت ايديه ألف بيه التفتت عليه وسألته

- لعد ليش منمت

- منتظرج غير

- حروح اسبح عركت

- لا لا تعاي خبلتيني

طفر عليه بسرعه سحبني من ايدي يمه لفني بحضنه وجبرني انام .. كعدت الصبح ركض ركض سبحت وبدلت ملابسي تريكنه وطلعنه للكليه.

مر اسبوع على هذا الروتين اليومي واليوم جمعه جمال طلع الصبح واني بقيت بالبيت ريكت الجهال وكعدت اطبخ بعدني توني طفيت التمن من ع النار واندك الباب حطيت شال على راسي ورحت وكفت ورة الباب كلت بصوت ناصي :

- منوو ؟

- انييي

الصوت مو غريب عليه وصوت بنيه ناعم استغربت كتلهه من ورة الباب

- منو انتي ؟

- اني اديان شبيج امنيات دفتحي الباب متت من الحر

فتحت الباب لكيتهه واكفه بالباب بأناقتهه وكشختهه واللبس والمكياج تفاجئت ولا عبالك نفسهه اديان الاعرفهه بوستني ودخلت للبيت فتحتلهه باب الاستقبال ودخلتهه وجهه مورد وحليانه وفوك كل هذا صايره نازكه وتحجي بأنوثه بعدما جان جبار البداخلهه حيٌ يرزق .

كيفت بيهه قدمتلهه الضيافه وعيونهه تفتر بالبيت اني وياهه كعدنه نسولف والجهال يمنه يكمزون .. ظلت تسألني عن علاقتي بجمال ومرتاحه لو لا واني اجاوب بأريحيه ممتقيده وياهه.

سألتهه عن حياتهه هيَ هم مرتاحه ويه زوجهه وظلت تحجيلي عنه صارت ب12 الظهر كامت دتطلع صادفت طلعتهه وي جية جمال اول مفتحت الباب صار بوجهنه ديصف السيارة هيَ شافته ارتبكت والتفتت عليه كالت :- عزه خاف زوجج ميقبل اجي

- ياا ليش ميقبل عادي عمري هلا بيج بكل وقت

سكتت ودارت وجهه لفت نفسهه وطلعت حتى بدون متسلم على جمال رغم فاتت من يمه .. تفاجئت تصرفهه وهوَ هم شافهه وجهه انكلب كلاب عكد الحاجب وخزرني اني بس فاهيه كلشي مفاهمه .. دخل للبيت وجهه معبس وميتحاجه راح تمدد ع التخم واني صبيت الغده دزيت احمد صاحه .. اجه كعد ع الطاولة ياكل ع الصامت وابد مرفع راسه باوع بشكلي مدنك ويهز رجله بتوتر صفنت عليه امره غريب.