نوائب الدهر

19

الـسـلامُ عـلـيـكـم 🌻🌼

نوائب الدهر
عبرات_العباديه
الــبــارت_19_
                                  alabadyia_09

بيا وكت ينزل سعرنه ؟
انـريـد نـنـسـه . . .
انـريـد نضحك من گلبنه
انـريـد وادم موش بس احنه نحبهم
انـريـد وادم هـم تـحـبـنـه !!

~~~~~~~~~~~~~~~~~~~~~~~~~~~~~~~~~~~~

أمنيات _ أجفان ثقيلة، أطراف باردة كأنما مكتسية بالثلج، عقل متحجر من الألم والندم، جسد هزيل،..
غشاء اسود صار على عيوني رغم مفتحتهن واني نايمه ع الگاع وهيَ تفتر بيه ،، عقلي صار مثل كرة الطائرة من تفتر حسيت نفسي خلص حودع الدنيا وربي يرحمني وينتشلني من هذا العذاب بس صابني احباط وألم شديد من فزيت على ريحة عطر قوية وقطرات مي تنتثر على وجهي ومبلله نص من مقدمة تيشيرتي.
شلت جفن عيني بثقل وفتحت نصف من عيني أدركت مكاني..
▪ اني هسه بحضنه ومتچي نص جسمي على افخاذه ولازم راسي بكفوفه ويطبطب على خدي يصحي بيه.. رجعت غمضت عيوني اريد افقد الوعي .. صار يضربني على خدي قوي ويصيح بنبرة خوف وصلت لمسامعي

- امنيات خليج ويايه لتغمضين

كلما اريد اغمض عيني يصحيني بهالجمله دخلني بحالة فزع وخوف.. إنشلت من الگاع وصرت بحضنه وگع راسي وظل يتلولح بين ايديه وجسمي كله راخي وثگيل احس نفسه انگطع وتعب وهوَ شايلني.

دخلني للحمام وخلاني جوه المي وفتح الدوش على راسي جفلت من برودة المي ورجفة سرت بجسمي مرتعشه. لميت ايديه على جسمي وشفافي يتطاگگن سويه من الالم ركض وكّف المي وظل محتار شنو يسوي كرفص كدامي ويطبطب على خدي بضربات خفيفه

- امنيات بس احجي سمعيني صوتج دخيييل الله

حاولت انطق كلمه. احس أوتار حنجرتي كلهه متحجره وجمد الدم بمكان واحد.. جليت حنجرتي وبصعوبه حچيت.. ظهر صوتي يرجف متخللته لفحات من الرعشه

- ارحمنييي

ظل صافن عليه والدمعه بطرف عينه على حالي صار عصبي ضرب على افخاذه وصاح بصوت متجرح

- شسوي فهمينيي شسووووي

انخبص وميعرف شيتصرف ،، شالني ورجعني للغرفه بدل ملابسي المبللات واني محاسه بشي حالة اول مره تصير بيه اشبه للصخونه احس نفسي فاصله عقلي يفصل ويرجع ماادري شصار بيه حتى شكيت صار عندي ارتجاج بالجمجمه نومني ع الجرباية وطلع.

ماجذبت خبر للّيل كمت اهذري وارجف ميته برد وراسي احسه شثگلاته من الوجع. صداع كلش قوي حتى اجفاني ثگلت عليه وأعصاب رگبتي كلهه متشنجه ظل هوَ الليل كله محتار بيه يسوي كمادات ويشربني علاجات اخر شي نقذني من انطاني حبة منوم خلتني انام على وجهي للصبح محسيت بشي.

گعدت ضوه الشمس بالغرفه لگيت نفسي غرگانه من العرك وجسمي كله بايد.. جبرت نفسي كمت اخذتلي ملابس وسبحت صحصحت وطلعت من الحمام باوعتله شلون نايم بمكانه ومعالم الراحه مرسومه على وجهه ظليت اعاتبه بگلبي شلون گلبك انطاك تنام وانته مفلش راسي بضربتك ! شلون بشر لااحساس ولا ضمير..