نوائب الدهر

24

الـسـلامُ عـلـيـكـم 🌻🌼

نوائب الدهر
عبرات_العباديه
الــبــارت_24_
                       alabadyia_09

"‏إنها ليست مجرد تنهيدات
تلك التي نطلقها مع النسمات،
إنـهـا جِـراحـنـا."

~~~~~~~~~~~~~~~~~~~~~~~~~~~~~~~~~~~~

امنيات _  اطلق كلماته الجارحه عليه وعيونه احسهه تريد تنفجر من العصبيه اني وسعت نظري عليه مصدومه من كلامه مااشوف الا بابا رافع ايده وضاربة راشدي بكل قوته !!!

شهكت بصدمه من صوت الراشدي العالي الي وصل لمسامعي ومزق طبلة اذني بهتت ملامحي خوف من ردة فعله هوَ ظل مصدوم وعيونه تشخصت على بابا بكل عصبيه وظل يزأر عليه مثل الاسد لا هوَ بگده ويگدر يضربه ولا هوَ يكدر يتجاوز عليه لزم مكان الضربه فرك مكانهه بحركات سريعه اصدرت صوت .. سكت وطال سكوته ردة فعله وهدوءه الغير معتاد جان شي صادم بالنسبه إلي استمر الصمت والتوتر يملي الجو وبس عيونه تتنقل بيني وبين ابويه رفع حواجبه مرتين ورمش بعيونه هز راسه بتباطؤ فسرت هزة راسه هذا وعيد النه دنگ راسه عض شفته قوي وهمس بصوت خافت

- مشكور عمي كلش مشكور

بابا عاط بعلو صوته: - لا عمك ولا اعرفك اطلع بررره

التفت عليه باوعلي بنظره فسرتها عود يگلي "شفتي ابوج شسوه" بعدت نظراتي عنه وهوَ ظل يخزرني بعيونه داحس بقوة خزرته المخترقه وجهي شفتهه بطرف عيني رغم اني ملتفته على الجهه المعاكسه لطرفه القريب.

خله وطلع سد الباب وراه بكل غضب اني بس صافنه واترقب تحركات كل شخص. كعد بابا ع التخم وحط ايديه على راسه محمّل بالهموم وتثاقل حمله بينه اني واختي اني وكفت مقابيل بابا وظليت ابرر موقفي :

- بابا والله العظيم مجرد زميل شافنه اني وصديقتي وعزمنه بالكافتيريا اني مردت اروح بس هيه لحت وكالت جوعانه انته تدري بيه متجي مني المو زينه وماانزل راسك بس هوَ طعن بعرضي

رفع راسه وكال بتعب :- بإعتبار انتي هسه عرضه وعيب عليه هيج يحجي

- اني من حجيت وياه ممعتبره نفسي عرضه، لا اني اعتبر نفسي مطلكه لا عرضه ولا شي لان محد يگدر يطعن عرضه بس الناقص

- احنه اخذنه كلمه من امه وكلنالهه تطلكين ووافقت هسه انتي بفعلتج هاي يطلعون همه اهل الحق وهسه حتكول مامتيهين عرضنه

- بس اني ممسويه شي غلط

دخلت امي وسط نقاشنه وتدخلت بالكلام وظلت تدافع بقوة فتحت ايديهه وبسطتلي ظلت تصف وتعد :- الصوج منج شعندج رايحه ويه ولد غريب