نوائب الدهر

بارت إضافي

الـسـلامُ عـلـيـكـم 🌻🌼

نوائب الدهر
عبرات_العباديه
بــارت إضافي
alabadyia_09

‏"وقميصُ يُوسف لايأتِي
إلا لِمن كانَ صبرُه يعقُوباً "

سمانه _ شلعت كلب حسام بإصراري على عدم دخوله الشقه وخليته يتحرمص صار شهر واني رافضه اصالحه واطبخ بيه على نار هاديه، شغلاته الخاصه كلهه توصله ليمه بدون ميطلب وملابسه مغسولة ومكوية كله جاهز الا اني مااكدر اتقبله وهوَ بس اعصابه مشدوده ويذب حسرات من يشوفني واني مستمتعه بعذابه حتى يعرف اني مو هينه وبسهولة يكدر يستردني إله.

كلما امر من يمه يشمر عليه دارمي عن القساوة واني بداخلي ميته ضحك بس ملامح وجهي قاسيه ومااضحك ومن استفرد وحدي اشبع ضحك صار شاعر النوب نزلت الظهر حضرتله اكله وحطيت الصينيه ع الميز بدون مااصيحه وهوَ كاعد ع الكرسي صافن عليه شلون اشتغل التفتت لناحيته اريد اجيب جدر الخبز من ع الميز وهوَ كاعد يمه ظليت واكفه ومحتاره اروح اجيبه لو لا بعدين تشجعت وتقدمت وكفت مقابيله ومدنكه راسي ع الجدر فتحته وسحبت كرصتين سفطتهن بإيدي وسديت الجدر بقوة طلّع صوت، رفع عيونه عليه تنهد وكال :

- قـاسي صـرت وياي والعيشه گـشره
هالــمـرة مـوش بلــوم هـالـمـرة مـرّة

رفعت كتفي بغرور وجريت عيني اتكبر ..اخذت الخبز للصينيه حطيتهن بيهه وطلعت تاركته هوَ لوحده ياكل بدوني وهالشي كلش زاعجه ومعقده من البيت كله.

كعدت بالصاله علما يكمل غداه اروح اغسل المواعين كمل اكل ودخل للصاله لكاني كاعده ممدده رجليه وحاطتهن وحده فوك اللخ واهز بيهن بهدوء اجه وكف فوك راسي واني ظليت بتدنيكتي ولا انتبهتله. ضرب برجله على طرف رجلي يريدني انتبه رفعت راسي وهزيته بتساؤل أشرلي براسه عود كومي.. وكفت على حيلي صرت كدامه ظل يتفحص بجسمي كام يفتر حولي يقيس ويشبر بطولي وكف بصفي وحط متنه على متني واني بس صافنه عليه شديسوي قاس متني وشبره رجع التفت عليه كال :

- صايره بطولي

رفعت حاجبي واباوعله شنو غايته من هاي سوالفه

أردف :- جنتي بكد اصبعي وزعلتي هسه صرتي بطولي وبعدج زعلانه مو هواي

ابتسمت وخفيتهه بسرعه قبل ليشوفهه

- لا مصايره بطولك بعدني صغيره

- دهاج قيسي وشوفي تعالي للمرايه تعالي

سحبني من ايدي واني اسحب بيهه مااريد اروح وياه وكفنّي يم المرايه وظل يشبر ويأشرلي :- هاج باعي هذا متنج صاير بصف متني

- شنو طفر شسالفه لتدنك اوكف عدل وقيس

ظل يثني رجليه حتى يصغر حجمه ويصير بكدي وعود صرت بطوله واني ممسامحته سوالفه تنطق الصخر كتله :- هسه غير تكول اني بطولك عود من اصير اطول منك اسامحك