South Boys #1: Kiss Master (Published and to be adapted soon into mini-series)

Chapter 39

"SHHH." Idinikit ni Arkanghel ang isang daliri sa mga labi ko.

Nakaawang ang mga labi ko sa pagkabigla kaya hindi ko naiwasang malasahan ang daliri niya. Maski si Arkanghel ay nagulat at namilog ang kulay abong mga mata sa akin.

Sa pagtingala niya ay napatitig ako sa leeg niya kung saan kitang-kita ko ang pagalaw ng kanyang Adam's apple.

Nag-iwas ako ng paningin. Ang mali lang, sa baba ako napatingin. Wala nga pala siyang pang-itaas na damit kaya mas lalo lang akong na-stress.

Ibinaling ko na lang ulit sa iba ang paningin ko. Ang dim ng ilaw sa kwarto niya dahil lampshades lang yata ang nakabukas. Malamig din dahil sa AC na dinagdagan pa ng bagyo.

Ibinaling ko ang aking mga mata sa lampas ng balikat niya. Ang natatanaw ko lang ay ang outside view sa sliding glassdoor ng veranda niya. Kitang-kita ko mula rito ang malakas at walang tigil na pag-ulan sa labas.

Ilang saglit lang ay nakarinig kami ng pagkatok mula sa pinagsasandalan niya sa aking pinto. Napahinto ako sa paghinga.

"Kuya?" boses ni Ma'am Ingrid.

Lalo na akong hindi makahinga nang marinig na tila pinipihit ni Ma'am Ingrid ang doorknob mula sa labas.

"Kuya, gising ka pa?" Kasunod niyon ay mga katok ulit.

"Yeah," paos na sagot ni Arkanghel sa mommy niya. Para siyang hirap magsalita.

"Nagising ka ba nang mawalan ng kuryente?" May pag-aalala sa boses ni Ma'am Ingrid.

"Kagigising lang." Tumingin siya sa akin. "Nagising lang."

Hindi naman ako ang may kasalanan kung bakit nagising siya, ah? Iyong kapatid niya kayang salot kaya!

"Dahil sa brownout, Kuya?" tanong muli ni Ma'am Ingrid. "Pasensiya ka na at palpak ang generator. Hindi pa kasi naaasikaso iyan mula nang bumalik tayo ng Pilipinas e. Wala ka naman bang naiwang work sa PC mo?"

Napahingal na ako dahil hindi ko na kayang pigilan ang aking paghinga. Nahingahan ko tuloy si Arkanghel sa leeg. Naging malalim ang sumunod na pag-alon ang Adam's apple niya.

"Wala," sagot niya na ramdam ko na sa akin nakatitig.

"Okay, Kuya." Nakarinig ulit kami ng pagpihit ng doorknob. "Bakit nagla-lock ka na naman ng pinto? Alam mo namang hindi ka dapat nagla-lock dahil bumabalik ang mga bangungot mo, di ba?"

Doon ako napatingala ulit. Napatitig ako sa abong mga mata ni Arkanghel na nakatitig sa akin. Bangungot? Nakakaranas siya ng mga bangungot? Kailan pa?

"I'm fine, Mom. You may leave. Matutulog na ulit ako."