في خيمت الشيخ الي جات اشجان بدري تزين مجلس الشيخ وترتبه وتجهز القهوه والفطور
الشيخ : سلمت يدك يابنيتي الله يوفقك
اشجان : ماسويت شي ياشيخ هذا الواجب
ابو سامر : والله يابو زيد اني فرحان لخوله واني اشوف خوله مثل اشجان
ابتسم الشيخ : ايييه تستاهل خوله كل خير وولد خالها ينقال عنه رجاال كفو
دخلوا الشباب سامر وساهر وزيد : صباحكم خير
الشيخ بابتسامه من القلب : اقلطوا ياعيالي اقلطوا
ساهر متضايق جلس بدون كلام والكل ملاحظ وزيد مثله
سامر : اسلم ياعمي
ابو سامر : خير شفيكم ليكون مانمتوا
سامر : نمنا يبه نمنا مير مدري وش فيهم
الشيخ بابتسامه : عندي لكم خبر زين اليوم بيجونا ضيوف
سامر بابتسامه : منهم ياعمي نعرفهم
الشيخ : اييه خال كنعان واهله
سامر : عسى خير
ابو سامر بفرحه ماتنوصف : كل الخيير جايين خطاب لخوله
فهم سامر وش مضيق خلق توامه وابتسم : زيين نتعرف على ااا هو وش اسمه خطيب خوله
الشيخ بابتسامه ووجه متهلل : اسمه ادهم رجاال كفو وشيخ القبيله بعد عمه
سامر : ليه وعيال عمه الشيخ
الشيخ : عياله صغار مايجوزوا للمشيخه والشيخ لزوم يكون رجال يحسبها صح لان ابسط خطاء
بتكون له اضرار علشان كذا ابوكم رفض المشيخ
سامر بابتسامه : لييه يبه ماتبي الشيخ
ابو سامر : مالي بوجع الراس
ضحك الشيخ من قلب : قوول الصدق ولا اكلمهم انا
ناظر سامر ابوه وغمز له : وش علاج وجع الراس هذا
ابو سامر : وووولد
سكت اشوي وتنهد : كنت انا الشيخ لسنتين وبهذي السنتين تزوج عمكم وماكنت مهتم
حالي حال زيد ما اداني طاري الحريم
زيد انتبه لهذي النقطه : ووش صار ياعمي
ابتسم ابو سامر الي يشوف نفسه في زيد : شفت عمتك ام سامر عند الراعي تدور
نبته تاملتها كيف تشوف النبات وتلمسه ولما كشفت عن وجهها تذوقت النبته حسيت شي داخلي اهتز
ومن ذيك المره كنت اتمشى قريب من خيمتها وانزادت الصدف لين قررت اتزوجها وتركت المشيخ
الشيخ : وبقول لكم شي كان ابوكم يرفض يتزوج رغم اني كنت اشوف عيونه تلاحق الحرمه
ومايحب احد يجيب طاريها ابد ليين تقدم واحد يخطبها صارت حالته حاله لين عرف انها رفضت
تقدم لها على طول
ساهر : اثريك يابوي مو سهل ابد
كملوا كلامهم ضحك وزيد فكره بعيد عنهم قصت عمه تشبه حاله لكن هو مايحب خوله
ولا يريدها زوجه بس مايريد تتزوج حد غيره يبيها تظل كذا
الشيخ : زيد زيد ياولدي
ابتسم سامر وراح لعند زيد ودفه بقوه
فز زيد ومسك سامر من رقبته بيد ويد رفعها يلكمه
سامر بضحك : زيد لااا كنت امزح معك
ناظره زيد بحده : لا تعيدها
الشيخ : زيد ياولدي وشفيك من زمان اناديك ماترد
ناظر زيد للبعيد : مافيني شي مير سرحت شوي
الشيخ : بروح انا وعمك وسامر لعند ابو كنعان نشوف اذا نقصهم شي بترافقنا
فكر زيد اشوي وناظر ساهر الي عاقد حواجبه : اييه بجي
ابو سامر : اجل يلا مشينا
،
،
عند ابو كنعان كان يشوف كنعان كيف يذبح الذبيحه
الشيخ : صباحكم خيير باذن الله
ابو سامر : شدوا حيلكم واحنا معاكم
اتقدم ابو كنعان وسلم عليهم وتقدموا الشباب يسلموا
كنعان بابتسامه : اعذروني ياجماعه دم الذبيحه مغطيني
الشيخ : ماعليك ملامه ياولدي الله يقويك
راح ابو كنعان والشيخ وابو سامر يشوفوا خيمة الضيوف وسامر راح مع كنان
كنعان مبتسم يقطع الذبيحه : وش فيك يازيد منت على بعضك
ابتسم زيد نصف ابتسامه : مدري ياخوك راسي يوجعني من امس
وقف كنعان واخذ صحن اللحم : مايوجعك راسك الا اذا تضايقت بودي الصحن لخوله وارد لك
راح كنعان وضل زيد يتامل خيمة الضيوف القريبه جدا من خيمة ابو كنعان
جلس قريب من الخيمة ومعطي الباب ظهره وسرح في تفكيره
،
،
بعد ماحط كنعان اللحم حقت الذبيحه اخذتهم خوله وتفكر كيف بتسوي الغداء وحدها
خوله تكلم نفسها : اااه ليتهم صبروا لين تتعافى رجلي وينك يا اشجان ليه ماجيتي
طلعت خوله من الخيمه وتقدمت ببطى من كنان الي معطيها ظهره واول ماقربت نطت عليه
وضمته من الخلف وبصوت ناعم مسترجي : كناااان فديتك ياخوي ودي بـ
سكتت اول ماحست بشي غريب وقفت وانصدمت تجمدت اطرافها وكل الي قدرت
تقوله : زيـــد
،
،
عند ابو كنعان : وش رايكم في الخيمه
الشيخ : ماشاء الله زينه مير بتكفيهم
ابو سامر : الا ماقلت لنا كم الي جايين
ابو كنعان : اييه بتكفي والي جايين ابو ادهم وحرمته وبناته الثنتين وعياله الاثنين
الشيخ بتفكير : مابتكفيهم الخيمه
ابو كنعان : لاا بتكفيهم وزياده ابو ادهم وحرمته في الخيمه وبنياته عند خوله يتوانسون
وعياله عند عيالي
ابو سامر : من الحين يابو كنعان اي شي ينقصك تقول لنا على طول لاتنسى احنا اخوانك
ابو كنعان ضم ابو سامر : ونعم فيك ماتقصروا ابد وطول عمركم تعتبروني اخ
الشيخ : وش له هذا الكلام يابو كنعان تعال تعال نتقهوى وننتضرهم
،
،
عند كنان وسامر الي ملوا المي وراجعين
سامر : ماشاءالله كبرت خوله واحنا نشوفها هي واشجان صغار
ابتسم كنان على طاري اشجان : اييه صاروا حريم وهذي خوله بتنخطب
سامر يحاول يسحب كلام : من فرحتكم يعني موافقين
ضحك كنان : والله ادهم رجاال ماينرد بتشوفه اليوم وتتعرف عليه وتعرف ليه بنوافق
سامر هز راسه : اييه بنتعرف عليه لزوم نتعرف عليه
،
،
تنهد زيد وعيونه تجول منتظر كنعان يفكر وش يقوله وش مضايقه اذا هو مايدري
وش مضايقه حس بجسم خفيف ينط فوقه ويضمه من خلفه تجمد اول ماسمع صوتها
الناعم الرقيق وماقدر يتحرك او يصدر صوت لين ابتعدت فجائه التف ناظرها
بدون برقع والشيله مو مغطيه شعرها كثير عيونها الوساع مكحله وريحت عطرها لصقت فيه
شاف الصدمه بعيونها : خير شايفه جني
تو استوعبت خوله صدمتها ورفعت الشيله لفوق وغطت وجهها وبارتباك واضح : فكرتك كنان
زيد برفعة حاجب : ما اعتقد اني وكنان نفس الجسم
انقهرت خوله منه بدل مايعذرها يعتقد انها متقصده : ماشفت جسمك ولا ماقاربتك
راحت داخل الخيمه منقهره وش قصده صدق خبيل
طل كنعان وشافها معصبه : خييير تو كنتي شاقه الابتسامه وش صار
خوله والقهر مبين : رجلي المتني ومحد يساعدني مدري وشلون بجهز الغداء
ابتسم كنعان وتقدم وضمها : افااا اساعدك انا وش له العصبيه وتزعلي نفسك
ناظرته خوله وتجمعت الدموع : انت ماتعرف تطبخ
ابتسم كنعان : مو مشكله انتي تجلسي تطبخي وانا اجيب لك الي تحتاجي
انشقت ابتسامة خوله ونزلت دموعها
كنعان فتح عيونه على وسعهم : وش اعتبر ملامح وجهك دموع وابتسامه مافهمت
ضحكت خوله من قلب ووصلت ضحكتها للي واقف برى
خوله : انزين فديتك
كنعان : بطلع وارجع دقيقه بس
طلع كنعان لزيد : زيد
التف زيد ورفع حاجبه : للحين ماكملت
ضحك كنعان : والله شكلها واصله عندك
التف زيد عنه : اييه واصله كثير
كنعان بتفكير : مدري وش اقولك يازيد بس خوله وحدها ورجله المته من قامت ماجلست
وانا وعدتها اساعدها
ناظره زيد وكتف يداته : حرمه متعوده تشتغل مافيها شي تدبر عمرها
ابتسم كنعان : هههههههه اييه حرمه سنعه خوله مير رجلها تالمها وماعاد تقدر تضغط عليها اكثر
ابتسم زيد ويقول لنفسه خوله سنعه يازيد تخيل ورد يناظر كنعان : والحين
كنعان زم شفايفه : صعبه اخليها وحدها متلعوزه برجلها
زيد : اشجان جايه بعد اشويه بس اكيد ساهر ملعوزها
كنعان : اجل انت روح هات اشجان وحطها رهينه عند خوله بدلي ههههههه
زيد بقلت صبر : هذا وماعندك غير اخت واحده اجل لو ثنتين
ضحك كنعان من قلبه على زيد الي قافله معه
تقدم سامر وكنان منهم كنان : خييير ضحكونا معاكم
زيد : ايييه بضحكك الان سامر فز روح اسحب اشجان بسرعه
سامر بغرابه : ليه هي للحين ماجت غرييبه والله
زيد : توكل بسرعه علشان الاخ كنعان يخاويني
كنان بابتسامه : خلاص انتم توكلوا وسامر يجيب اشجان وانا ادخل عند خوله
الكل : تم
،
،
عند خوله الي تفكر هتان وعنان مالهم حس وين اختفوا خرجت من الخيمه من الباب حقت الشق
وراحت للخيمه الي جهزوها تتفقدها وشافت ابوها والشيخ وابو سامر
خوله : السلام عليكم
ناظروها ورحبوا فيها وردوا السلام
خوله : اخباركم عساكم بخيرين
الشيخ : نحمدالله اخبارك انتي
ابو سامر : بخير مير انتي اخبارك
خوله : يسركم حالي
الشيخ : مبروك ياخوله ان شاءالله يكون فيه الخير لك
ابو سامر : ربي يكتب لك الي فيه الخير
احرجت خوله ونزلت راسها
ابو كنعان بابتسامه : احرجتوا خوله وتو بدري على المباركه
الشيخ بفرح : ادهم رجال كفو والكل يمدح فيه باذن الله تتم هل الخطوبه
خوله تصرف الموضوع : الا ماشفتوا هتان وعنان
ابو كنعان عقد حواجبه : ماشفتيهم
خوله : لا والله ادورهم ماشفتهم
ابو كنعان : شوفيهم خلف الخيمه اكيد ماصدقوا انشغلنا
هزت راسها بتفهم واستاذنت وراحت
لفت لوراء الخيم وشافت عنان وهتان ممددين وشكلهم نايمين وتحتهم لحاف خفيف
هزت راسها بتحلف وردت للخيمه ناظرها كنان
باستغراب : خوله وين كنتي
خوله بابتسامه خبيثه : وش رايك نمزح مع اخوانك
ابتسم كنان : خوووله وش ناويه
خوله ببرائه : ابد بس قلت نغير جو
دخلت اشجان وهي تضحك : سلااام
بس سكتت اول ماشافت كنان ونزلت راسها
كنان : هلا وعليكم السلاام اخبارك شجن
تجمدت اشجان وتقول لنفسها فوق مايناظر ويزيد يدلعني
ضحكت خوله بخفه : اقووول ترى صديقتي جت وراك ماتروح
كنان ناظرها بخبث : وراك قبل اشوي كنا بنمزح مع اخوانك
تقدمت منه خوله وبنفس ابتسامته : اجل خذ سطل المي الي هناك
اشجان : يمه شكلكم يخوف
ناظروها الاثنين وبعدها ضحكوا
خوله : لااايفوتك شجن تعالي معانا
ابتسمت اشجان بحرج وبتردد : زين بس بناظر من بعيد
كنان : تنوري حتى لو تبي تكوني الاوله
ماعرفت اشجان وش تسوي وخرجت على طول
وخوله وكنان يضحكوا ويجهزوا
،
،
طلعت اشجان وناظرت سامر : سامر تنتظر احد
سامر عض شفته السفلى : الا متى يجون الضيوف
اشجان : مدري والله بس الاكيد قبل الغداء
تنهد سامر وتفكيره يروح لـ ادهم : وانتي ليه ماتساعدي وين رايحه
اشجان بابتسامه : خوله وكنان بيغطسوا هتان وعنان بالمي
ابتسم سامر : ليه وش مسويين
اشجان : بدل مايساعدوا نايمين وراء الخيمه
طلت خوله وكنان حامل السطل المي
كنان : سامر تعال شف كيف بصحيهم
سامر : ولو تحب اساعدك ماعندي مانع
كنان بضحكة : والله لو تاخذ السطل الثاني تسوي خير
اخذوا السطول المي وراحوا لوراء الخيمه وشافوهم الكبار
وراحوا معاهم عند هتان وعنان الي نايمين بامان وقف سامر فوق راس هتان
ووقف كنان فوق راس عنان رفعت خوله يدها علامت استعدوا والكل ماسك ضحكته
وابو كنعان يهز راسه بعدم اقتناع واول مانزلت خوله يدها كبوا السطول المي
فز هتان وعنان وكلا يجري وماسك ثوبه والباقي يضحكوا من قلب
جروا لين استوعبوا الي يصير ولفوا يناظروهم يضحكوا عليهم ناظروا بعض
وقالوا بنفس الوقت : خوله
رجعوا واول ماوصلوا لعندهم عنان : ووووييين خوله
كنان بضحك من قلب : ههههههه لاتلمسها هههههه
عنان غمض عيونه وعاقد حواجبه : يعني هربت
سامر : هههههههه ايش ذنبها احنا الي كبينا المي
هتان : ايييه بس الي امرتكم خوله بس هين وين بتروح يعني
راحوا هتان وعنان يركضوا يدوروا خوله الي تحاول تمشي باسرع قوتها للغدير
وصلت للغدير واتكت على صخره تحاول تاخذ نفس بس اول مارفعت وجهها شافتهم يجروا له
خوله بخوف من شكلهم : ياويل حالي وش سويت
اخذت نفس ونادت : كنعااااان كنعااان
اول ماقربوا منها هتان وبحددده : والله مارحمتك اليوم ياخوله
عنان بصوت عالي : لو صار فينا شي فيه حد يصحي كذا
خوله بخوف : والله قلت بنضحك معاكم مافكرت بتخافوا كثير
هتان : وش الي يضحك هاااه
قبل تنطق وتتكلم خوله جاهم صوت من وراها : لاترفع صوتك انت وياه عليها
