بعد يومين من الاحداث خوله طول الوقت بشقها واشجان كل يوم تزورها وزيد قرر يشغل حاله بالتدريبات
وصل مرسول من قبيلة ادهم وكان بيده عقد التملك وماباقي غير خوله تبصم عليه وبعده باربعه ايام بيكون العرس وزفت خوله لقبيلة ادهم والعرس بيكون متواضع وزفتها بتكون قليله علشان ماتجذب الانظار
تنهد ابو كنعان وهز راسها بالموافقه واخذ العقد وراح لخوله فيه
ابو كنعان : خوله يابنتي
وقفت خوله وعيونها متعلقه بالورقه الي بيده : هلا
ابو كنعان تبسم بهدؤ : خوله بسالك وودي تجاوبين بصدق
خوله بتوتر : عسى خير يابوي
ابو كنعان : هذا عقد زواجك انتي تبي ادهم او ماتبيه
خوله وزعت نظرها عى كل شي عدى ابوها : ان كنت ابيه او ما ابيه هذا الزواج بيوصلنا باهل امي وبيزيد حبل الوصل بيننا
ابو كنعان : وقلبك ياخوله
خوله : القلب ، القلب يابوي امره سهل ان كان حب ادهم فجزاه خير وان كان ماحبه فالاحترام اساسا كل علاقه ان كان زواج او اخوه او صداقه
ابو كنعان : والحب لازم يابنتي مافيه شي يكمل بدون حب
خوله تبسمت : الحب يبه يعني اهتمام احترام تعاون توافق واخلاص وذي الاشياء بين اي ازواج يابوي مو شرط يكون حب المهم صفات الحب موجوده
ابو كنعان : والغيره والرقه والشغب ماهن من صفات الحب
خوله : بتيجي مع الايام يبه
ابو كنعان قبل تهزمه مشاعره الابويه مد الورقه لخوله لاجل تبصم عليها
اخذتها خوله بهدوا طاغي وبصمت عليها وردتها مبتسمه
تبسم ابو كنعان بوجهها واخذ الورقه وراح وماقدر يقول مبروك
قعدت خوله وضمت حالها وش المشاعر الغريبه الي بها وش السكون الي سكنها اخذت برقعها وتلثمت وطلعت متجهه للتلال البعيده
،
رد ابو كنعان للمرسول واعطاه الورقه وراح المرسول في سبيل حاله راد لادهم
ابو سامر : متاكد انك سويت الصواب
ابو كنعان : ماهو دايم نسوي الصواب اوقات الغلط نشوفه صواب
ابو سامر : دامك تدري ليه مكمل
ابو كنعان : دامها قويه ومكمله وشلون اوقف
ابو زيد : الله يقوي قلوبكم وباذن الله مايصير غير الخير
،
وقفت خوله بجمود تناظر التلال الخضراء والسماء المغيمه والهواء البارد تنفست بعمق ونطقت بخفوت تواسي حالها : لعله خيره لعله خيره
: وين الخيره بفرقاء الحبايب
التفت خوله وناضرته بسكون : اوقات تكون الفرقاء خيره
زيد : اجل مبروك بذي الفرقاء
خوله : يبارك بعمرك عقبالك
زيد : اييه عقبالي ، قريب قريب باذن الله
تحركت خوله لاجل تروح السكون الي بقلبها تحسه مو طبيعي
زيد : قبل الفرقاء ودي بشي منك
وقفت خوله وكان زيد وراها : فراقنا شي عادي ماحنا الا عيال قبيله واحده
زيد : والحب
خوله : مابيننا حب
زيد : والي حصل بالرحله
خوله : كان اهتمام بوريث القبيله الشيخ زيد
زيد : ودقات القلب
خوله : اي قلب باي موقف بيدق بدون اراده
زيد : تنكرين ياخوله انه يدق لي وحدي
خوله بتردد : القلب يدق طول ما الشخص يتنفس
زيد : وانا ماني هواك
خوله : ززيد
زيد : وش له ماتعترفين ليه
خوله : وش بيفيد انا لادهم مو لغيره والحب والقلب لادهم مو لغيره
زيد : قوليها بوجهي اذا كنتي صادقه وناظري بعيوني واذا ماقدرتي باثبت انك كذابه وقلبك لي
خوله التفت بتوتر وترددت تناظره
زيد بثقه : ناظري بعيوني وتكلمي
خوله رفعت عيونها وتلاقت نظراتهم وتو بتفتح فمها تتكلم الا ان زيد تحرك بسرعه
ضمها وهي في حالت ( ْ) فــ ( ُ ) بــ ( ّ ) حتى ( ِ ) اضلاعها
خوله السكون الي هي فيه والجليد الي كاسي مشاعرها ذاب بصدمه ماتوقعت زيد يسوي كذا وبدون شعور لاجل تفصل كل شي : ما احبك ومالك مشاعر عندي كل القصه انك بعيوني مثل كنعان اتركني ابعد عني صرت متقرفه حالي
تركها زيد وناظر بعيونها : تكذبين
خوله ومازالت مثل ماهي : انت اخر رجال ممكن يكون زوجي
زيد : بتردين لي لانك لي ومو لاحد ثاني
خوله : لو رديت باخذ الراعي ولا اخذك
تركته خوله وراحت بقدر القوه الي ظاهره فيها بقدر الضعف الي تحس فيه
اما زيد ابتسم بخفه ماينكر ان كلامها جرحه بقدر انه واثق بحبها له مير ياخوله اذا كان بتتزوجين الراعي عليا فانا من الحين بخطب ياخوله وواحده من صديقاتك وبنشوف من بيقهر الثاني اكثر
،
في العصر انتشر خبر خطوبة زيد من وسن والخبر ذا كان الكل فرحان فيه عدا زيد الي يتبسم غصب وخوله الي باركت لصديقتها بابتسامه منكسره وكنعان الي يدري ان كل ذا غلط ومايدري شلون يوقف كل ذي التعقيدات
،
مرت الايام وصار يوم عرس خوله والكل من الصباح يتجهز واشجان دموعها مو راضيه توقف وخوله مثل الجثه تتحرك بروح ميته اخوانها حزينين وكلا يبتسم لها لاجل مايبين حزنها اما ابو كنعان الي حزيين ومايقدر يسوي شي يحس بتعب ومنتظر خوله تنزف لاجل ينفرد بحاله وينزل دمعه حايره بعينه وسامر الي سعيد انها بتختفي من القبيله ومن حياة توأمه
اما زيد من الصباح عاقد حواجبه ومعصب وعلا ابسط شي يصارخ
مابين المشاعر الصاخبه والهاديه الحزينه والسعيده والرافضه والمتردده مابين الدموع والبسمه
صرخه بداخل كل شخص يحاول يكبتها بداخله
،
بعيد عن القبايل تبسم الزعيم : وصار اليوم الموعود
ابو الزعيم ضحك : ايييه اهم شي كل شي يمشي بحذافيره لانتاخر ولا نتقدم
الزعيم بابتسامه حاده : لزوووم كل شي يكون مثل ماخططنا لزوووم عرسي يتم اليوم
ضحك ابو الزعيم ويتخيل احفاده بحظنه
مخططات شريره ومؤمرات تحدث من خلف الستار فهل تكتمل المخططات ويفوز الشر اما تتوحد قلوب الطيبون وينتصر الحق
،
بقبيلة ادهم والكل فرحان ويتجهز وادهم منتظر عروسه بفارغ الصبر والبهجه ملت الكل ومابين الي يجهزون الاحتفال ومابين الي ملتمين حول ادهم ويشاركوه سعادتهم ومابين وبين غفل الجميع على اهم شي
ماذا لو غفلوا عن شي مهم ماذا لو غفل عن سبب مهم ماذا لو غفلو شي قد يسبب كوارث بلحظة سعيده
،
عند خوله الي تزينة ولبست جلابيه مزينه تدل انها العروس تزينت تكحلت ورتبت حواجبها ونزلت خط من شفايفه لذقنها ونقطة عن اليمين واليسار ثلاث بثلاث وكان ذا الخط يسوونه المتزوجات وهذا دلال انها صارت مسؤوله رفعت خوله وناظرتهم من حوله ماتشوف بوضوح ماهو بسبب الدموع لان عيونها جافه مير بسبب الشيله الكبيره الي تنزل على العروسه وتغطيها من راسها لتحت خصرها
قرب منها ابو كنعان وضم وجهها بكفوفه يحارب دموعه بصعوبه : مبروك يا اجمل عروس وترى صرتي حرمه كبيره عندك مسؤوليات الله الله بزوجك وحبي الكل وعيشي بسعاده وبساطه
ضمها ابو كنعان ويتمنى يخبيها بصدره خايف عليها مير لازم يتم الي يصير ابتعد عنها وقفى وقرب منها هتان مسك كفوفها وباسهم وبهدؤا : خوله مهما يصير خليني ببالك وباي وقت تحتاجيني تاكدي اني بكون موجود
قرب كنان وحاوط كتوفها : انتي قبيله بين اربعه جبال خلك واثقه من حالك واسندي باي جبل بتلاقيه سند وعون
تبسم كنعان وقرب منها وباعدهم عنها وضمها وهمس لها : والي خلقك وخلق عيونك كلمه واحده منك وبفصل فيها كل شي ودك تكملي او توقفي
خوله بخفوت : الي يوقف بنص الطريق يتاذئ حييل ياخوي وانا ماعاد فيني حيل لاي اذئ
ضمها كنعان اكثر وغمض عيونه بضيق وابتعد عنها وتبسم : عنان لا اوصيك
عنان مبتسم بفرح لانه الي بيوصل خوله : بعيوني خوله
قربت خوله من الشيخ وسلمت عليها وقربت من ابو سامر وسلمت عليه نزلت راسها وراحت لهوداج الجمل
اما اشجان ابكي بالم واحساسها يزيد سؤ وسامر متمسك بها لاجل ماتتصرف بتهور
تحرك الجمل وتحرك عنان وثلاثه فرسان مرافقينهم وبدئت رحلة الزفه الي مايندرى وش بتكون نهاية ذي الزفه
،
من فوق التلال يناظر هوداجها ويحس بقهر بسبب عجزه صارت لغيره بسبب كتمه للمشاعر والحين والحين وش يسكن ذي المشاعر حس بنار صدره تشب وناظر كنعان الي وقف قربه وبكل حقد نطق :
عسى بفستانها اشواك وفي ثوبه عقارب سود
ونار تحرق الكوشه وتحرق شقهم حته
وموت باليلة الدخله تبرد حرتي ياكود
ولا احس انها بحضنه ويلامس خد لامسته
علي اهون اذا ماتوا ولا بنفس السرير رقود
ترى صعب(ن) علي اتخيل الي ماتخيلته
هز كنعان راسه بأسى هذا نقطه في بحر من الي بداخل زيد مير لزوم يتحمل ماعنده غير ذا الحل ولابه غيره
،
قرب هوداج خوله من قبيلة ادهم تمعن عنان بالنظر وعقد حواجبه : وش صاير مو معقول
طلت خوله من هوداجها وناظرت وبخفوت : غزووو
