وفياض والبقيه راحو لمجلس الرجال يتغدون ويفكرون بحل
،
كنعان مسك خوله من يده وعقد حواجبه : وش كنتي تسوين هنا معاهم ياخوله
خوله بصدمه وتوتر من كلام اخوها : وش تقول ياكنعان ترى الحرمه قالت لي ادور العشبه في المرعى وباصدفه لقيت زيد
كنعان : والحرمه وينها منك
خوله عقدت حواجبها : راحت تدور العشبه بين التلال
كنعان بعصبيه : خوله اخر مره اشوفك قرب زيد بذات او احد غيره
خوله بصدمه : وشلون وانت الي كنت تامني عند زيد وش فيك ياكنعان
كنعان : انا حذرتك ياخوله وتحملي الي يجيك من بعدين
تركها كنعان بعصبيه مايدري من يشتم حظها الي ربطها بادهم ولاحظ زيد الي حب خوله ولا حظه الي طاح بين ثلاث نيران خوفه على خوله والمه على زيد وحزنه على ادهم
،
ابتسمت الحرمه وتناظر خوله واقفه متصنمه قربت منها تناديها : خوله ابشرك يابنتي لقيت العشبه
خوله ابد ماتحركت كانت متصنمه بهدواء ماقبل العاصفه
الحرمه بغرابه : خوله تسمعين يابنتي وش صار لك
حطت الحرمه يدها بكتف خوله لاجل تلفها لها لكنها انصدمت من خوله التفت وضمت الحرمه تبكي على صدرها ماتدري وشو بضبط الي يبكيها مشاعر الزيد الي صدمتها او عصبيت كنعان الي اول مره تراها او احساسها بالضعف لبعدها عن والدها واخوانها وصديقت عمرها بكت بكل الم بكت تخرج كل الم كان قديم او جديد بكت تخرج المشاعر والافكار الي بقلبها والي ماتعرف عنها شي شهقاتها وصوت بكاها قطع قلب الحرمه كانت خوله ضعيف ولاول مره تبكي كذا
،
فياض ناظرهم جميع : وين كنعان وزيد
متعب : مدري شعنده زيد كل اشوي يختفي مع حد
ذيب : الي فيه كافيه خلوه بحاله خلونا بالنفق ذا
هزاع : ذيب زيد بخير
ذيب : اي بخير لاتقلقون عليها
جاسم : والحين وشلون نعرف من الي يساعد الغزوا بهذا النفق
تنهد فياض : لزوم اسوي خطه لاجل اعرف منهو الخاين
ذيب : عندك خطه
فياض : لا حاليا
ذيب : اجل قول نسوي خطه ماهو تسوي وحدك
ابتسم فياض : اي نسوي خطه كلنا
هزاع : خلونا نتقهوى ونريق ويهدا بالنا بذا التوتر مابنقدر نسوي شي
جاسم : صدقت وانا بقهويكم واحلى قهوه من يديني
،
عند زيد الي وقف بوجه كنعان بعد ما اختفى من ناظر خوله
زيد : وش صار وش فيك
كنعان ببرود : زيد باعد من قدامي بروح
زيد : كنعان لاتحاول تخفي عني شي حافظك ياخوي
كنعان زم شفايفه : وش صار الي صار صار ودي تباعد عن اختي ماودي ادري انكم اجتمعتو مره ثانيه
زيد بصدمه : كنعان ياخوي وش تقول احنا مالتقينا ترى هي صدفه
كنعان : الي سمعته يازيد باعد عن خوله
زيد رمش كم مره : كنعان ليكون تشك فيني وفي خوله
كنعان : واثق منكم مير ماني واثق من مشاعركم وترى خوله بتصير عروسه قريب فباعد عنها لمصلحت الجميع
زيد قبض يده يخفف عصبيته وبهدواء عكس الاعصار الي بداخله : الله يوفقها
ناظره كنعان من فوق لتحت وتركه وراح اما زيد ضل واقف يحس جسمه متجمد عكس صدره الي شب نار تقدم اكثر لكنه انصدم من الي شافه
كانت خوله بحضن الحرمه تبكي وتشاهق
حس زيد بغيض لكنعان وكاد هو السبب الا الاميد انه السبب ليتك ياخوله بحضني تنهد وقعد خلف شجره غمض عيونه بحرقه وخانته دمعه وكانت اول مره تنزل دمعه بحياته حسها مثل الجمره الي تحرق اي شي قدامها قعد يتمنى كل شي يتغير الوقت والمشاعر والمكان تمنى من كل قبله يموت ادهم حس بكتمه تخنقه كل ماسمع بكاء خوله وشهقاتها
،
عند فياض والي عقله شغال يفكر وشلوون حد من افراد قبيلته يغدره ويغدر القبيله كلها وش الحل
الشيخ : فياض ياولدي بنلقى حل لاتضايق حالك
ابتسم فياض يطمن والده : ادري يبه بنلقى حل
ذيب حط يده بشعره : فياض مافيه احد يحقد عليك او يكرهك
فياض عقد حواجبه : مادري
متعب : حاول تتذكر تهاوشت انت واحد من القبيله
فياض غمض عيونه لثواني : اييي اخو سالم
هزاع : ليه وش كان السبب
فياض : كان على سالم ليه اثق في سالم وهو لا وشي من ذا القبيل
متعب : وليه تثق في سالم اكثر من اخوه
فياض تنهد : لانه راعي مشاكل ومتفاخر بحاله بزياده
ذيب ناظر لفياض وحد عيونه : ترى اعتقد ان المشكله اكبر من كذا انت يافياض ماهو من النوع الي يفتعل مشكله بكل سهوله
ناظر فياض للبعيد وعقد حواجبه : سالم ولد خالتي ونواف اخوه اصغر منه سالم انسان هادي ويعرف شلون يتصرف بسرعه قوي وبنفس الوقت متواضع تقدم يخطب فاطمه اختي ووافقت والبسمه شاقه حلقي
وبعد يومين تقدم نواف يخطب فهده ورفضته لكنه لحقني للمرعى وبارزني بقوه ويوم اني هزمته هددني انه بيخطف فهده وغصب عني بيتزوجها بذاك اليوم انجنيت وكنت بطرده من القبيله لولا خاطر خالتي الي قعدت تبكي عندي وسالم الي ترجاني تركته ومن ذاك اليوم ماعاد يقابلني اكثر وقته يطلع للبر ونادر يجي يسلم على خالتي ويروح
هزاع : ووين كان يوم الغزاه هجموا
فياض عقد حواجبه : مادري
ذيب : ايييه اتركه عليا يافياض والله اني جايب خبره قبل تغيب الشمس
وقف ذيب واخذ غترته وانطلق لخارج الخيمه
ناظرهم فياض : وشلون بيجيب الخبر
ابتسم متعب : لاتخاف ترى ذيب عند كلمته
هزاع : والحين النفق وش بنسوي به
فياض ابتسم بحقد : بحط فيه جثت الخاين
ضحك هزاع : وكاد بتنزع قلوبهم من الخوف
الشيخ : فياض ياولدي ودي اطلب منك طلب
فياض : اامر يابوي ماتطلب
الشيخ تنهد بحسره : لاجل خاطر خالتك ياولدي لاتقتل نواف بالقبيله ولاتدري خالتك انك قتلته
فياض بعصبيه : لكنه يابوي ساعد الرجال لقتلك
نزل الشيخ راسه بحزن : مير ياولدي الولد يبقى ولد ماتقدر تتخلا عنه وخالتك مابيدها شي وماعندها غير سالم ونواف اقتل نواف برى القبيله وماحد يدري ومايوصل خالتك خبر
ناضر فياض لابوه الي التجاعيد ملت وجهه والشيب غزاه نزل نظره للارض : تم يبه الي تبيه يصير
دخل جاسم مبتسم بالقهوه : كاني تاخرت
هزاع : ايييه حشى ما كانها قهوه
جاسم رفع حاجب : كان ماودك تتقهوى بكيفك
دار نظره جاسم : وين ذيب
متعب : راح يدور على الخاين
فتح جاسم عيونه بصدمه : وشلون تكلمتو كل ذا وانا اسوي القهوه
هزاع ضحك : قلت لك مير خل حاجبك المرفوع يقلك بالي حصل
حط جاسم القهوه بوسط المجلس وقعد بين هزاع ومتعب : الحييين تقولو وش صار
دخل كنعان مبتسم يخفي البراكين الي بصدره : وش الي صار هههه
فياض ابتسم : شكينا بواحد وراح ذيب يتاكد
كنعان : ماشاء الله بذي السرعه صدتوه
فياض : بمساعدتهم لقطناه
كنعان : يعني انتهت المشكله
هزاع : مانقدر نقول انتهت لكن شارفت على الانتهاء
كنعان : اجل ريحة القهوه تناديني ليه تاركينها تبرد
ضحك متعب : والله جاسم مارضى يكمل جميله ويصب لنا القهوه
ابتسم فياض ووقف : انا بقهويكم جاسم زعلان
جاسم يسوي نفسه زعلان : اي وشلون تسوون كل ذا وانا غايب يالخونه
ضحك هزاع : اقوول اهجد من الزعل بذا الوقت لسى باقي بنتناقش على اشياء
قعد جاسم وشد ظهره بفرحه : وش هي
هزاع : وشلون ساويت القهوه اخاف اتسمم
ناظره جاسم لثواني ومن ثم قفز لفوقه يحاول يبطحه في الارض وهزاع يهده عنه والبقيه يضحكون
،
عند خوله الي باعدت اللثمه عن وجهها وغسلته بمي وتنفست بهدواء اخذت اللثمه وتلثمت من جديد
الحرمه : وش صار ياخوله ترى وجعتي قلبي من بكاك
ابتسمت خوله تتناسى الي حصل : ابد مير حبيت افضفض شوي من الي بقلبي
تنهدت الحرمه وتدري ان خوله تكذب : زين يابنتي تعالي نرد لقيت العشبه هزت خوله راسه بهدواء وتحركت مع الحرمه رادات لشق الحريم
ابتسم من بعيد وبداخله يرتب مشاعره واولوياته ومتاكد انه حط خوله باخر اولوياته
ومايدري وش يغير ترتيبه بكره
،
عند فهده تنهدت وناظرت للبنات : حنا جينا ناخذ مي من الغدير او نناظره بصمت
ناظرنها البنت بهدواء
فهده بعصبيه : وذي القرب المي منو بيملاهن
ابتسمت فاطمه بحالميه : تاخر ودي اشوفه
فهده بعصبيه : انتي صاحيه والله لو يسمعك فياض ليكسر فمك ياهبله
فاطمه ابتسمت : تراه خطيبي وعرسي اذا هدت الدنيا تزوجته وباذن الله قريب
هزت فهده راسها بياس : وانتن وش تنتظرن
ابتسمت نجلا : مشتاقه حيل لبنتي
هند حطت يدها تحت فكها : منتظره فارس احلامي الي يمكن هزاع يرفضه
فهده : وليه يرفضه
هند ابتسمت بحزن : مدري اي حد يتقدم لي هزاع يرفضه
نجلا : وماتدري ليه
هند رفعت راسها وناظرت للسماء : ماكنت ادري غير لما يرفضهم
فاطمه : وليه ماله حق يرفض بدون سبب
فهده : وكاد ماوده يفقدك
هزت هند اكتافها : مدري عنه لكن احس ان به سبب كبير وراه
نجلا : مو مشكله ياخبر اليوم بفلوس بكره ببلاش
فهده : وكاد به شي مافيه اخ ماوده يفرح لاخته انتضري
فاطمه : وينه ليكون ماهو جايي اليوم بعد
فهده باستهزاء : تشوفين الوضع شلون ترى ماهو بفاضي لك
نجلا : هههههههه حرااام تكسري بخاطرها
فهده : اصحيها من احلامها
هند : اتركيها تحلم وش لك
ضحكت فاطمه : تعلمي منهن
ابتسمت فهده وهزت راسها بالنفي
قرب منهن رجال يجري مسرع لاتجاه فهده مسكه والبنات يصرخن
فاطمه الي توسعت عيونها من الصدمه : نووواف
