كانت خوله ونجلا قاعدات يضحكن دخلت عليهن اشجان
تلتقط انفاسها من الجري : ياخوله ياخوله
ناظرتها خوله بخوف : وش صار ياشجان
اشجان : الرجال عند المرعى ويبونك هناك
خوله : اخوي هناك
اشجان : اييييه كلهم حتى جدي الشيخ
وقفت خوله وتلثمت زين
نجلا : لحظــہہ ياخوله برافقك
خرجت خوله ونجلا معاها نطت لفوق الخيل وناظرت لنجلا
ابتسمت نجلا : ترى اعرف للخيول وعندي خيل
راحت نجلا وردت بخيلها وابنتها معاها وانطلقن باتجاه المرعى
وصلن للمرعى وهدين الخيول لاجل تاقف
خوله بشموخ : سلام عليكم
الجميع : وعليكم السلام
خوله : اخبارك ياعمي الشيخ
ابتسم الشيخ : بخير يابنتي علومك
خوله : بخير دامك بخير
ناظرت خوله لكنعان : سم ياخوي وش تبي طالبني
ابتسم كنعان وقرب من خيلها : يعتقدون ياخوله انك
منتي بقادره تحمي نفسك وودي تبارزي متعب
لاجل تثبتي لهم وتكملي الرحله معانا
خوله بهدواء : ماودي ابارز
الشيخ : ليه يابنتي ترى انا موصي متعب ماياذيك
خوله : ترى ياعمي الشيخ ماهو بقادر ياذيني مير ماودي ابارز
الشيخ : ليه يابنيتي ودي اشوفك تبارزين لاجل ارتاح يوم اشوفكن
رايحات معهم
خوله : مير ياشيخ ابوي موصيني ما ابارز الا عدو وش له ابارزه
ابتسم الشيخ : اعتبريه تدريب يابنيتي بتردين طلبي
ناظرت خوله لكنعان وهز راسه لها لاجل تبارز
خوله : مير ياشيخ ان ربحت بالمبارز ودي اطلب
الشيخ : اطلبي وتدللي يابنيتي ان ربحتي او خسرتي
نزلت خوله من فوق خيلها تاكدت من لثمتها ودورت عيونها
على الموجودين وكانو الشيخ ومتعب واثنين ماتعرفهم
وزيد وذيب وجاسم وكنعان وهي ونجلا واشجان
ماهي بمشكله عدلت البرقع وضبطته زين اخذت سيفها
وخرجته من الغمد اخذ كنعان الغمد وابتسم يطمنها
ابعدت عنهم وناظرت متعب وحدت عيونها
ضحك متعب بخفه يدري انها ماهره باستخدام السيف
والخنجر والجرح الي بصدره يشهد مير وده يعرف لاي
حد تعرف تستخدم السيف اخذ سيفه وقرب منها
متعب بابتسامه مايله : تهجمين او اهجم
خوله بحده : نهجم الاثنين
ابتسم متعب وهجم بسرعه وقوه عليها كانت خوله تتصداء
ضرباته ومنتظره متى يعيد نفس الحركات لاجل تعرف شلون
تهجم عليه بضربه واحده
ابتعد عنها متعب مستغرب منها تصد ضرباته وماتهجم
ابتسمت خوله بغرابه لاجل تزيد استغرابه
قرب منها مره ثانيه واخذ هجوم مختلف وهذا الي
ماعجب خوله وقفت السيوف بشكل اكس دفته خوله بكل
قوتها وبدات تهاجم تضربه من اليمين وتردها بسرعه من
اليسار مير متعب منتبه لكل خطوه تسويها ويصد كل
ضرباتها وقفت سيوفهم مره ثانيه بشكل اكس وركلته
خوله وماتركت له مجال حتى انه يناظر عيونها واخذت السيف
بتنزله من فوقه مير انه رفع سيفه وصد ضربتها ودفها رجعت
خوله خطوتين وردت له بسرعه تضربه بالسيف صد ضربتها
مره ثانيه ودف نفسه على ظهره ورفع رجلينه ودفها من بطنها
تراجعت خوله كم خطوه من دفته لها ابتسمت له بتحدي والشر
يطل من عيونها
ناظرها متعب واثقه من نفسها ودايم ثابته ومكاره بحركتها
مير لزوم مايخسر قدام حرمه
قطعت خوله تفكيره وتقدمت منه بسرعه عطته ضربه من اليمين
وردتها من اليسار مشت سيفها لاجل يمشي سيفه مير انه دف
سيفها ردت له توجهله ضربات وتدور حوله لين ركز على دورانها
حوله حاول يوقفها ويخرج من شباكها واول ما حاول يبتعد اشوي
منها ركلته ووجهت له السيف واول ماصد الضربه وكان على الارض
خرجت الخنجر وحطته برقبته ناظرت له بتحدي وابتسمت بانتصار
الشيخ : ماشاء الله عليك يابنتي صدق انك ند فرسان
ابتعدت خوله مبتسمه : واللحين ياشيخ دام اني فزت ودي بطلبي
الشيخ مبتسم : اامري وتدللي
خوله : مايامر عليك ظالم ولايتدلل عليك عدو
متعب ماوقف من مكانه وبابتسامه : مير ذا ماهو بفوز عادل
خوله بهدواء : اجل وش تشوفه
متعب : كنا نتبارز بالسيوف من وين طلعتي ذا الخنجر
خوله : ساحة المبارز يعني موت او حياه ولاجل ما اموت يصير استخدم
اي شي لو كان حقيقه كنت ميت بمكانك
الشيخ : كلام خوله عين العقل ذي حرب يصير تستخدم اي شي
متعب : مير ماهو بصدق كنا نتدرب
زيد مبتسم : التدريب يعتبر ساحة قتال واذا ماودك تعترف بهزيمتها
لك مايصير تقول لها غشاشه
ابتسم متعب ورفع حاجب : ليه انت انهزمت منها من قبل
ضحك زيد بخفه : انا اعتبر مدربها وشلون انهزم منها
خوله تقطع حديثهم لانه لو طال مابيصير خير : ياشيخ
الشيخ باعجاب بشخصيتها وقوتها : سمي يابنتي
خوله قربت من الشيخ ونزلت سيفها وبصوتها الرقيق
والناعم : طلبي ياشيخ ماودي به الحين ودي توصي
وارثينك بالمشيخ يضل هذا الطلب لي للزمن متى ماجيت
وضاقت بي الايام اقدر اطلب شي يعونني ويساعدني
ابتسم الشيخ وحط يده فوق راسها : من دون ماتطلبي
يابنتي هذي قبيلتك الثانيه وبوقت ضيقك هذا وساعك
وبوقت المك هنا دواك واذا ثقلت عليك الايام تعالي هنا
لاجل نخففها وترى متعب هو بعدي في المشيخ وهذا
ماهو بطلبك وحدك ودي اطلب منه هذا الطلب ان حصل
شي في يوم وجيتي هنا تشكي ودي يحطك فوق راسه
ابتسم متعب وناظر خوله : وعهد عليى متى ماطلبت
خوله العون اني لها سند
زيد وشوي وياكل متعب بنظراته : وش له ياخوله تطلبي
ذا الطلب وحولك احنا كثير
ناظرت خوله لعيون زيد والخوف بصوتها : اخاف يجي يوم
ويصير شي ماهو الي لكم وش اسوي وقتها وانا حرمه
وما اعرف غير ذي القبايل الي مشينا عليها
ذيب يناظر خوله : ترى ياخوله قبيلتي تحت امرك ومايجي
اليوم الي تخافين فيه وانا وقبيلتي موجودين
خوله ابتسمت : سلمت ياذيب مير اني مادل الطريق
والخوف اليا دورت على قبيلتك وتهت او فات الاوان
ابتسم متعب ووقف : اي قبيله بتلاقينها ماعتقد انها برادتك
واللحين تعالي يانجلا ودي اشوف اذا تذكرين وشلون تمسكين
السيف وتحركينه
اتقدمت نجلا بخجل من متعب وبهمس : وش فيك يامتعب ماتذكر
وماقدر ابارز قدام الرجاجيل
متعب رفع حاجب : ترى لو يصير شي بتبارزي رجاجيل ماهو
تبارزي قدامهم
خوله ابتسمت لنجلا وعرفت انها مستحيه : اتركوني انا ونجلا
لاجل نتدرب اشوي واعلمها المبارز وكاد انها ناسيه وشلون تبارز
الشيخ : زين يابنتي واللحين تعالوا ياعيالي نرد للمجلس
قربت خوله من كنعان : اقول ياخوي ليه قلتلي ابارز متعب
كنعان مبتسم من قلب : بتعرفين مع الايام
ناظر زيد خوله : خوله ماتثقي بنا لاجل تطلبي هذا الطلب منهم
ابتسمت خوله وكان ببسمتها شوية مشاعر حس بهم زيد : اخاف
يازيد يجي يوم وافقد حد فيكم مستعده اجمع كل القبايل لاجلكم
ابتسم زيد ويحس بقلبه يدق بسرعه
تركتهم خوله وردت لنجلا اما كنعان ناظر زيد وابتسم وهز راسه وراح
زيد مبتسم بقوه وماعرف شلون يعبر بفرحته
ناظر ذيب وضحك بخفه وحط يده بشعره يهزه وراح وراء كنعان
،
،
بعد مغيب الشمس كانت خوله ونجلا قاعدات يضحكن
خوله : ماتوقعت انك بتبارزين يانجلا بذي المهاره
ضحكت نجلا : كنت ناسيه لو انك ماذكرتيني باساسيات
المبارزه ماقدرت اسوي شي
خوله : تدري فرحانه حدي يانجلا
نجلا : وش سبب ذا الفرح كله
خوله مبتسمه من قلب : اول واهم شي انك بترافقينا
وثاني شي اني غلبت اخوك حتى وان قال انه غش
ضحكت نجلا من قلبها : احم اول واهم شي حتى انا
فرحانه بروحتي معكم وثاني شي ترى متعب كان متساهل
معك وانتي غششتي من وين طلعتي الخنجر
ضحكت خوله : ترى انا دوووم احمل خنجر اخفيه في
مكان في جسمي مير مع الرحله ذي احمل اثنين ماهو بواحد
ناظرتها نجلا باندهاش : وين تحطيهم
ابتسمت خوله وبهمس : لاتقولي لحد احط واحد برجلي اليمين
والثاني حطيته بظهري وودي منك تاخذي واحد يبقى معك
نجلا : تصدقين ماتوقعت انك ذكيه لذي الدرجه وبكره بطلب
من متعب يعطيني واحد
ابتسمت خوله لنجلا ونجلا بدورها تضحك
قطع عليهم ذا الجو صوت متعب : وش تسوين انتي وياها هنا
التفت خوله بسرعه لاجل تغطي وجهها
ناظرت نجلا متعب : اقول ياخوي من السلوم انك تطلع صوت من
بعيد ووش الي جابك بذي الحزه
ناظرها متعب بحده : سمعن ابوي وده بكن والمفروض دامكن منتن
بالخيمه تغطن وجيهكن زين
التف متعب ورد من وين ماجاء
خوله تقلد صوته : المفروض دامكن منتن بالخيمه تغطن وجيهكن زين
متعب من وراها : ترى مارحت لاجل تضحكين
صمتت خوله باحراج ونجلا ضحكت بقوه
،
عند الشيخ دخل متعب مبتسم وقعد
الشيخ : هاه ياولدي وينهن
متعب : وكاد يدخلن الحين
هز الشيخ راسه واخذ الفنجال ورشف منه
نجلا من الخارج : يابوي
الشيخ : ادخلن يابناتي
دخلت نجلا وخوله وقدمن يسلمن على الشيخ
ووقفن قدامه
الشيخ : قعدن يابناتي
وكان الشيخ يشير ليساره والمكان خالي
والشباب على يمينه
الشيخ : اخباركن يابناتي
نجلا : نحمد الله يابوي
اما خوله بعدها مستحيه من متعب
الشيخ : وانتي ياخوله اخبارك
رفعت خوله نظرها للشيخ وابتسمت : نحمدالله
ياعمي الشيخ اعلومك ان شاء الله زين
الشيخ : الحمدلله يابنتي
صمت الجميع لثواني معدوده
كنعان : اقول ياعمي الشيخ وش كنت اتريد منهن
ابتسم الشيخ : اييييه كان ودي اسال خوله
خوله تبسمت : سم ياعمي
الشيخ : سم الله عدوينك وشلون شفتي مبارز نجلا
خوله : تعرف الاساسيات وتعرف شلون تصد الضربات
وهذا اهم شي لاني مابتركها بالرحله ذي ياعمي
متعب : خايفه عليها يبه وانا وين رحت
ابتسم الشيخ : كان ودي اتوكد من نجلا لاجل ماتكون عبئ
والحين سمعوا ياعيالي لزوم تكونوا حذرين معاكم حرمتين
وكلكم عيال مشايخ وان دروا قطاع الطرق بكم صادوكم
ذيب : حنا ياعمي نغلب قبيله كلن منا ند ميه فارس
كنعان : لاتخاف ياعمي بنحطهن بعيوننا
الشيخ : ايييه ادري بكم ماتقصرون مير الحذر واجب
جاسم : باذن الله نحسب حساب كل خطوه ياعمي
الشيخ : نجلا وخوله تبين شي لاجل الرحله ابيكن
تتاكدن من كل شي زين
نجلا : زين يبه مير ودي بخنجر
ابتسم الشيخ : ايييه وبتقدرين تستخدمينه مثل خوله
نجلا ابتسمت : اييه يبه ترى خوله علمتني شلون استخدمه
الشيخ : خوله ودي اشوف خنجرك
خوله : ممكن ياعمي الشيخ اطلع لاجل اجيبه
الشيخ : اعتقدت انك تحملينه دوم
خوله : ايه احمله دوم مير ما اطلعه قدام احد لاجل
محد يدري بمخباه
ابتسم لها الشيخ وهز راسه بالموافقه
سرقت نظره خافته لزيد وطلعت
مستغربه صمت زيد وكاد ان به شي معقوله يكون تعبان
خرجت الخنجر وردت للخيمه وتقدمت من الشيخ وعطته
اخذه الشيخ وابتسم : اشوف الخنجر وكاني اشوفك ياخوله
تدري انه يمثلك
ميلت خوله راسها : وشلون
الشيخ : نقوشه ناعمه ورقيقه مير انه حد وقوي
ناظرت خوله للسيف وابتسمت : ترى ياعمي ذا
سواه ابوي بنفسه لاجلي
ابتسم الشيخ : لاجل كذا انتي واذ الخنجر مثل بعض
رد الخنجر لداخل الغمد حقته ورده لخوله اخذته خوله
ورت قعدت قرب نجلا وناظرت لزيد وردت تناظر الارض
الشيخ : متعب اعط نجلا الخنجر حقي وبكره الفجر
باذن الله بتتحركون ومثل مارحتم بخير ابيكم تردو
لي بخير كلكم مابي حد يصيبه شي زين
الكل : زين
الشيخ : وابيكم تحطوا خوله ونجلا بعيونكم
الكل : تامر
وقف الشيخ ووقف الكل : قعدوا ياعيالي انا بروح
لشقي استريح وانتم لزوم تناموا بدري
جاسم : تامر ياشيخ
كنعان : خوله تعالي نروح للغدير اشوي ودي بك
طلعت من خوله ضحكه صغيره فرحانه لانه كان
ودها تكلمه
ابتسم الشيخ واخذ بيد نجلا وطلعوا من المجلس
تقدم كنعان من خوله ومسك يدها وطلعوا
ذيب ابتسم بلعانه : ودي اطلع اشم هواء
ناظره زيد ورفع حاجب بدون مايتكلم
وطلع من المجلس
ميل ذيب رقبته : وش فيه ذا ماتكلم من اول
بالعاده مايسكر فمه
ابتسم جاسم : تراه متضايق اتركه بالحاله
متعب رفع حاجبه : وش الي ضايقه
جاسم : يقول حاسس بشي كايد منتظرنا
ضيق متعب عيونه وناظر للبعيد وش ممكن يصير
،
،
ابتسمت خوله لكنعان وضمته : وليه الخوف ياخوي
باذن الله مايصير شي وترى كلكم فرسان تهابكم
الليالي السود
مسك كنعان اكتافها وباعدها عنه شوي وناظر لعيونها
كنعان : اييه مير مدري ليه متضايق حتى اني من بعده
تضايقت وصرت خايف ياخوله تتاذون انتي واخت متعب
اخذت خوله نفس : ترى ياخوي ان حصل شي وصدق
احساس زيد لزوم ننجرح بس ما اعتقد ان فيه حد منا
بيموت
كنعان بقلق : الخوف لو انخطف واحد منا بذات لو وحده منكن
صمتت خوله ماتبي تكابر قدام كنعان او تضعف قدامه
مير ماتدري وش هو الحل
كنعان : خوله ردي لنجلا وانا بروح للمجلس انام احس براسي دوخه
ابتسمت خوله : روح ياخوي وانا باملي الجربه مي وارد
كنعان : اجل بنتظرك
خوله : ماله داعي ترى الخيمه قريبه روح ياخوي
هز كنعان راسه واتجه رايح لمجلس الشيخ
غمضت خوله عيونها تحاول تحرر افكارها مع نسيم الليل
: الهواء بارد ردي للخيمه لاجل تنامي بنتحرك الصباح
التفت خوله بابتسامه وصوت متلهف : زززيد
اتفاجاء زيد بفرحتها بشوفته وابتسم : يالبيه
تداركت خوله نفسها وحست بالحرج : ا ام اخبارك
قرب زيد وقعد قربها : بخير وانتي اعلومك
ابتعدت عنه اشوي وقعدت : وش فيك يازيد
ناظر زيد لعيونها : وش الي فيني
ارتبكت خوله ونزلت عيونها : مدري ا احسك متضايق
ابتسم زيد وبصوت هادي : مير لما كلمتك ارتحت
خوله تحاول تتهرب : مير احسك مهموم
زيد : قعدتي معك نستني الهم
وقفت خوله بحرج : لزوم ترد لمجلس الشيخ لاجل تنام بدري
لزوم ترتاح بتكون رحلتنا طويله
وقف زيد وقرب منها : ودي توعديني ياخوله
ناظرت خوله لعيونه وماقدرت تباعدهن
زيد : اوعديني ماتبتعدي عني لو حصل شي
خوله بصوت ناعم : اوعدك
زيد : اوعديني لو حصل شي وامرك تهربين تروحين
هزت خوله راسها بمعنى لا
زيد : خوله ارجاش لاتقمرين وتبقين
خوله وصوتها مهزوز ودموعها لمعين بعيونها : ماقدر
ماقدر اتركك واروح مقدر نموت مع بعض او نعيش مع بعض
التفت خوله وراحت تركض لخيمة نجلا
اما زيد ابتسم يحس قلبه انتعش من كلماتها مير
ماوده تنفذها مستحيل يتركها تتاذى او يصير لها شي
رد يناظر للغدير واخذ نفس عميق
،
،
بطلوع الشمس كانوا يجهزون الخيول وكلن يرتب حاله
عند خوله ونجلا كانن يتاكدن من الزاد اذا بيكفيهم لرحلتهم
خوله : نجلا بروح املي الجرب مي
نجلا : زين وانا بروح اجيب الصبوح
هزت خوله راسه وراحت تمشي لين وصلت للغدير
قربت من الغدير وقعدت تملي الجرب مي
سمعت اصوت من بعيد تقترب تاكدت من خنجرها
وردت تملي المي
اقتربوا من الغدير ثلاثه رجال يسقون خيولهم ويضحكون
وكانت اصواتهم واصله لها
الاول : ناظروا هذي هي الحرمه الي تبارز
الثاني : ههههههه هذا الناقص الحريم تزاحم الرجاجيل
الاول : تخيل سمعت انها غدرت متعب وطلعت خنجر كانت
مخفيته وغلبته بالمبارز
الثالث : ههههههههه اشك انها حرمه ذي من بيرضى بها
زوجه له لحصل هواش بينهم قامت تبارزه ههههههههههه
ضحكوا بقوه وعيونهم عليها وقفت خوله والدموع بعيونها
التفت بتروح وانصدمت بمتعب خلفها عاقد حواجبه
ابتعدت منه وراحت تجري
رفع متعب نظره للثلاثه الرجاجيل ورح لقربهم
متعب عاقد حواجبه وبحددده : انتم الثلاثه بتروحون لاطراف
القبيله تحرسونها لاسبوع كامل وكل واحد منكم ابيه يكون بطرف
وان عدتم ذا الكلام واقسم بربي لاربيكم من اول وجديد مفهوم
هزوا الثلاثه رواسهم بطاعه وخايفين من تهديد متعب
راح متعب يلعن فيهم بغضب
تذكر انه في يوم جرحها مثلهم ويمكن اكثر غمض عيونه وهز راسه
( صدق الي قال : الي مايعرف الصقر يشويه )
،
،
عند خوله الي همست لنفسها بهدوا : المفروض اكون اتعودت
على ذا الكلام المفروض ماعاد احس بذا الالم ليه ليه
غمضت عيونها بالم ورفعت طرف اكمام جلابيتها تمسح دموعها
مثل الطفله
وقف قدامها وغطاها بظلاله رفعت خوله راسها وابتسمت رغم الدموع
الي تنزل : ز زيد
انخفض زيد لمستواها وقعد قدامها : وش له الدموع من زعلك
ناظرت خوله لعيونه وتحس بجاذبيه قويه بعيونه : مافيه شي
زيد ابتسم لها بحنيه : والدموع ذول من وين جو
ضحكت خوله بخفه : كذا جو وحدهم
زيد رفع حاجب وقلب لجدي : خوله من زعلك
ناظرت خوله لتحت : ابد نفس الكلام كل مره يجرحني مدري
ليه المفروض اكون تعودت بس ب بس مدري ليه تنزل دموعي
فهم زيد ان الموضوع بسبب قوتها : وليه تزعلي ودموعك تنزل
وش همك بكلامهم ترى انتي بعيوني اجمل حرمه قابلتها
رفعت خوله راسه واناظرته بصدمه : ز زيد
زيد : ماودي تنزل دموعك مره ثانيه تراها غاليه
وقف زيد وراح يمشي مبتعد عنها ونظرات خوله مافارقته
ونظرات من بعيد تراقبهم
،
